ފުވައްމުލައް ސިޓީގެ މަގުތައް ހެދުމުގެ މަޝްރޫޢު ހަލުވިކަމާއިއެކު ކުރިއަށްދަނީ
27 އެޕްރީލު 2022 | ބުދަ 09:55މި މަޝްރޫޢަކީ 331.05 މިލިއަން ރުފިޔާގެ މަޝްރޫއުއެއް
ފުވައްމުލައް ސިިޓީގެ މަގު ހެދުމުގެ މަޝްރޫޢު ކުރިއަށްދަނީ
ފުވައްމުލައް ސިޓީގެ މަގުތައް ހެދުމުގެ މަޝްރޫޢުގެ ހަލުވިކަމާއިއެކު ކުރިއަށްދާ ކަމަށް މި މަޝްރޫޢުއާއި ހަވާލުވެފައިވާ ކުންފުނި، މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން މައުލޫމާތުދީފިއެވެ.
އެމްޓީސީސީ އިން މައުލޫމާތުދިން ގޮތުގައި ފުވައްމުލައް ސިޓީގެ އެތެރޭގެ މަގުތައް ހެދުމުގެ މަޝްރޫޢުގެ 71 އިންސައްތަ މަސައްކަތްވަނީ ނިމިފައިއެވެ. އަދި އޭޕްރީލް 27 ވީ ބުދަދުވަހު އެސްފޯލްޓް ޕްލާންޓް ޕްރޮޖެކްޓް ސައިޓަށްވަނީ ގެންދެވިފައެވެ. މި މަޝްރޫޢުގެ ދަށުން، 122,659 އަކަ މީޓަރުގެ ސަރަޙައްދެއްގައި ސަބްބޭސް އެޅުމާއި، 95،239 އަކަ މީޓަރުގެ ސަރަޙައްދެއްގައި ތާރު އެޅުމާއި، 27،450 އަކަ މީޓަރުގެ ފުޓްޕާތް ހެދުމުގެ އިތުރުން މަގުމަތީ ނިޝާން ހަރުކުރުމާއި، މަގުބައްތި ހަރުކުރުމާއި، 19،940 މީޓަރުގެ ފެންހިންދާ ނިޒާމެއް ޤާއިމުކުރުމުގެ މަސައްކަތް ހިމެނޭއެވެ.
ފުވައްމުލައް ސިޓީގެ މަގުތައް ހެދުމުގެ މި މަޝްރޫޢަކީ 331.05 މިލިއަން ރުފިޔާގެ މަޝްރޫޢުއެއް ކަމަށް އެމްޓީސީސީ އިން މައުލޫމާތުދެއެވެ.
