ކުރިޔަށް އޮތް ރިޔާސީ އިންތިޚާބުގައި ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވާދަކުރައްވާނެކަމަށް ގަލޮޅު އުތުރު ދާއިރާގެ މެމްބަރ އީވާ އަބްދުﷲ ވިދާޅުވެއްޖެއެވެ.

އެމްޑީޕީގެ ޗެއަރޕާސަން އިންތިޚާބުގައި ވާދަކުރައްވާ މާފަންނު އުތުރު ދާއިރާގެ މެމްބަރ އިމްތިޔާޒު ފަހުމީގެ ކެމްޕެއިން ޖަލްސާގައި ކުޅުދުއްފުށި ސިޓީގައި ވާހަކަދައްކަވަމުން އީވާ ވިދާޅުވީ 2023ގެ އިންތިޚާބުގައި ރައީސް ނަޝީދު ވާދަކުރައްވާނެކަމަށެވެ. އަދި އިންތިޚާބުގައި ވާދަކުރުމަށް ބާއްވާ ޕްރައިމަރީގައި ރައީސް ނަޝީދު ބައިވެރިވެވަޑައިގަންނަވާކަމަށެވެ.

ސޯޝަލް މީޑިޔާގައި އާންމުވެފައިވާ 37 ސިކުންތުގެ ވީޑިއޯގައި އީވާ ވިދާޅުވެފައިވަނީ 2023 ގައި އެންމެންވެސް ބޭނުންވަނީ އެމްޑީޕީގެ ވެރިކަމެއްކަމަށެވެ.

ރައްޔިތުންގެ މަޖިލީހުގެ ނައިބު ރައީސްކަންވެސް ކުރައްވަމުން ގެންދަވާ އީވާ މިމޭރުމުން ވާހަކަދައްކަވާފައިވާއިރު މީގެކުރިން ރައީސް ނަޝީދު ވަނީ 2023 ވަނަ އަހަރުގެ ރިޔާސީ އިންތިޚާބުގައި ވާދަކުރައްވާނެކަމަށާއި ޕްރައިމަރީގައި ވާދަކުރައްވާނެކަމަށް ވިދާޅުވެފައެވެ. މިދިޔަ އަހަރުގެ ރައްޔިތުންގެ މަޖިލީހުގެ ދެވަނަ ދައުރުގެ ޖަލްސާތައް ނިންމާލަމުން ބޭއްވި "އާސްކް ސްޕީކާރ" ޕްރޮގްރާމްގައި ރައީސް ނަޝީދު ވަނީ ވެރިކަމުގެ ނިޒާމު ބަދަލުނުވާނަމަ 2023 ވަނަ އަހަރު އޮންނަ ރިޔާސީ އިންތިޚާބުގައި ވާދަކުރުމަށް ޕްރައިމަރީގައި ވާދަކުރައްވާނެކަމަށް ވިދާޅުވެފައެވެ.

2021 ވަނަ އަހަރުގެ ޖުލައި މަހުގެ 25 ވަނަ ދުވަހު މިމޭރުމުން ވާހަކަދައްކަވަމުން ރައީސް ނަޝީދު ވަނީ ބަރުލަމާނީ ނިޒާމެއް ގާއިމުކުރުމުގެ މަސައްކަތާ ގުޅޭގޮތުންވެސް ވާހަކަދައްކަވާފައެވެ. ނަމަވެސް އޭފަހުން ބަރުލަމާނީ ނިޒާމީ ގެނައުމާއި ގުޅޭގޮތުން މާބޮޑެތި ވާހަކަތަކެއް ދައްކަވާފައެއްނުވެއެވެ. ނަމަވެސް ނިޒާމަށް ބަދަލު ގެނައުމަށާއި ރިޔާސީ އިންތިޚާބު ކާމިޔާބުކުރެވޭ ކެންޑިޑޭޓް ކަނޑައެޅުމުގައި މިހާރު އޮންނަ އުސޫލު ބަދަލުކުރުމަށް ގާނޫނު އަސާސީއަށް ގެންނަން ބޭނުންވާ ބަދަލުތަކާއި ގުޅޭގޮތުން ރައީސް ނަޝީދު ވަނީ އެމްޑީޕީގެ ގައުމީ މަޖިލީހަށްވެސް ކަންތައްތަކެއް ހުށަހަޅުއްވާފައެވެ. އަދި ގާނޫނު އަސާސީއަށް ގެންނަންޖެހޭ ބަދަލު ގެނެއުމުގައި ގޮތެއް ނިންމުމަށް 4 އޮގަސްޓް 2022ގައި ކޮންގްރެސް ބޭއްވުމަށް ވަނީ އެ މަޖިލީހުގައި ނިންމާފައެވެ.

މިހާރު އެމްޑީޕީއަށް އައު ޗެއަރޕާސަން އެއް ކަނޑައެޅުމުގެ ކެމްޕެއިންގެ ފޯރިގަދަވެފައިވާއިރު ޕާޓީގެ ތެރޭގައި އުފެދިފައިވާ ދެ ފެކްޝަންގެ ވާދަވެރިކަން ވަނީ ބޮޑުވެފައެވެ. ރައީސް ނަޝީދު އާއި ރައީސް ޞާލިހުގެ ގުޅުން ގޯސްވެފައިވާއިރު ދާދިފަހުން ރައީސް ނަޝީދު ވިދާޅުވެފައިވަނީ މިއީ ފެތެމުންދާ ސަރުކާރެއްކަމަށެވެ. މިވަގުތު ޕާޓީއަށް އެންމެ ރަނގަޅީ ފެތެމުންދާ ސަރުކާރަކާއެކު ނެތުންކަމަށް ވަނީ ވިދާޅުވެފައެވެ. އޭގެފަހުން ކުރެއްވި ޓްވީޓެއްގައި ވިދާޅުވެފައިވަނީ އެމްޑީޕީ އާއި އެމަނިކުފާނުވެސް ބޭނުންފުޅުވަނީ ވަރަށް އާދައިގެ ކަމެއްކަމަށެވެ. އެއީ އެއްވެސް ސަރުކާރަކުން ހިޔާނާތްތެރި ނުވުމާއި އެކަކު އަނެކަކު ތަފާތު ނުކުރުމާއި އަނިޔާވެރި ނުވުމެވެ. އަދި އެމްއެމްޕީއާރުސީ އާއި މި ސަރުކާރުން ހިންގި ކަމަށް ބުނާ ވެންޓިލޭޓަރުގެ ކޮރަޕްޝަންގެ މައްސަލަ ބެލިއްޖެ ނަމަ އިތުބާރު ލިބޭނެ ކަަމަށް ނަޝީދު ވިދާޅުވެފައިވެއެވެ.

2018 ވަނަ އަހަރުގެ ރިޔާސީ އިންތިޚާބުގައި އެމްޑީޕީގެ ކެންޑިޑޭޓެއް ނެރުމަށް ބޭއްވި ޕްރައިމަރީގައި ރައީސް ނަޝީދު ބައިވެރިވެވަޑައިގަތެވެ. ނަމަވެސް އެފަހަރު ނަޝީދަށް އިއްވާފައިވާ 13 އަހަރުގެ ޖަލު ހުކުމާ ގުޅިގެން ރިޔާސީ އިންތިހާބުގައި ވާދަކުރެއްވުމުގެ ޝަރުތު ހަމަނުވާ ކަމަށް އިލެކްޝަންސުން ކަނޑައަޅައި، އިންތިހާބު ހުއްޓުވަން ކޯޓު އަމުރެއް ނެރުނެވެ.

އެހެންކަމުން އއ.އުކުޅަހުގައި ބޭއްވި ކޮންގްރެސްގައި އޭރު އެމްޑީޕީގެ ޕީޖީ ކަމުގައި ހުންނެވި އިބްރާހީމް މުހައްމަދު ޞާލިހަށް އެޕާޓީގެ ޓިކެޓް ދިނުމަށް ނިންމީއެވެ.