ބަޓަރޑް ނޫޑްލްސް

ނޫޑްލްސްގެ އެކި ވައްތަރު ބޭނުންކޮށްގެން ތަފާތު ޑިޝްތައް ތައްޔާރު ކުރެއެވެ. ފެޓުޗިނީ ނޫޑްލްސް ނުވަތަ ޕާސްތާ އަކީ ދިވެހިންގެ މެދުގައި ވެސް މަގުބޫލް ކާ އެއްޗެކެވެ. ހާއްސަކޮށް އެކި ހަފްލާތަކުގެ މެނޫގައި މިހާރު އާންމުކޮށް ހުރެއެވެ. މި ފަހަރު ގެނެސްދޭން މި އުޅޭ ރެސިޕީ އަކީ ވެސް ކާލަން ވަރަށް މީރު ޑިޝްއަކަށް ވާނެއެވެ. މި ޑިޝް ތައްޔާރު ކުރާއިރު، ބައެއް ބާވަތްތައް އެމީހެއްގެ ރަހަތަކާ ގުޅޭ ގޮތަށް އިތުރު ކޮށްލެވިދާނެވެ. މަސް އަޅައިގެން ކާން ބޭނުންވާ މީހުންނަށް އެ ބާވަތް އިތުރު ކޮށްލެވިދާނެވެ. އަދި ފެޓުޗިނީ ނޫޑްލްސްގެ ބަދަލުގައި އާންމުކޮށް ދިވެހިން ބޭނުން ކުރާ ކޮންމެވެސް އެއް ވައްތަރެއްގެ ނޫޑްލްސް ނުވަތަ ޕާސްތާގެ އެހެން ވައްތަރެއްވެސް ބޭނުކޮށްލެވިދާނެވެ.

ފުރަތަމަ ނޫޑްލްސް މަޑުކޮށްލަން ފެނު ކައްކާލާށެވެ. ގާތްގަނޑަކަށް 10 ވަރަކަށް މިނިޓް ކައްކާލެވުނީމާ ހުންނާނީ ރޯފިލާފައެވެ. ދެން ނޫޑްލްސް މަޑުވުމުން ފެންގަނޑު އުކާލާފައި އެހެން ތެއްޔަކަށް ނޫޑްލްސް އެޅުމަށްފަހު އޭގެ ތެރެއަށް ބަޓަރު، ޗީޒް، ލޮނު އަދި އަސޭމިރުސް އަޅައިގެން އެއްކޮށްލާށެވެ.

އެއަށްފަހު ފިޔާ އަދި މިރުސް އަޅައިގެން ވަޅޯކޮށްލުމަށްފަހު، ކުރިން އެއްކޮށްލި ނޫޑްލްސް ތެރެއަށް އެއްކޮށްލާށެވެ. ދެން ތައްޓަކަށް ނޫޑްލްސް އެޅުމަށްފަހު އޭގެ މައްޗަށްވެސް ޗީޒް އާއި އަސޭމިރުހާއި ލެމަން ގްރާސް އަޅައިގެން ގާނިޝްކޮށްލާށެވެ. ލެމަންގްރާސްގެ ބަދަލުގައި ކޮންމެސް އެހެން ވައްތަރެއްގެ ފަތެއްވެސް ބޭނުންކޮށްލެވިދާނެވެ.