ލަންޑަންގައި ހުންނަ އޭޝިއާ އަދި އޯޝަނިއާ ސަރަހައްދުގެ އެންމެ ފާހަގަކޮށްލެވޭ ޑިޕްލޮމެޓަކަށް ޑރ.ފަރަހްނާޒް
26 އެޕްރީލު 2022 | އަންގާރަ 05:37ފޮރިިން މިނިސްޓަރު އަބްދުﷲ ޝާހިދު ވަނީ މިކަމާއި ގުޅިގެން ޑރ.ފަރަހްނާޒަށް މަރުހަބާ ވިދާޅުވެފައި
ޑރ.ފަރަހްނާޒް ފައިޒަލް
ލަންޑަންގައި ހުންނަ އޭޝިއާ އަދި އޯޝަނިއާ ސަރަހައްދުގެ އެންމެ ފާހަގަކޮށްލެވޭ ޑިޕްލޮމެޓަކަށް ޑރ.ފަރަހްނާޒް ފައިސަލް ހޮވިވަޑައިގެންފިއެވެ.
ލަންޑަންގައި ގާއިމްވެ ތިބޭ އެކި ސަރަހައްދުތަކުގެ ޑިޕްލޮމެޓުންނަށް ޚާއްސަކޮށްގެން ޑިޕްލޮމެޓް މެގަޒިނުން ކޮންމެ އަހަރަކުން ބާއްވަމުން އަންނަ މި އިވެންޓް ފާއިތުވި ދެ އަހަރު ކޮވިޑްގެ ސަބަބުން ނުބާއްވަައެވެ. މިއީ ލަންޑަންގައި މަސައްކަތްކުރާ އެކި ގައުމުތަކުގެ ޑިޕްލޮމެޓުންގެ މަސައްކަތް ފާހަގަކޮށް ހިތްވަރު ދިނުމުގެ ގޮތުން ދެމުން އަންނަ އެވޯޑެކެވެ.
އެވޯޑަށް ނޮމިނޭޓް ކުރަން ޖެހެނީ އެ ސަރަހައްދެއްގެ ގައުމުތަކުން ލަންޑަންގައި މަސައްކަތް ކުރާ ޑިޕްލޮމެޓުންނަށް ފާހަގަކޮށްލެވޭ ނަމެކެއެވެ. އެގޮތުން މި އަހަރު އޭޝިއާ އަދި އޯޝަނިއާ ސަރަހައްދުން އެވޯޑު ލިބުނީ ރާއްޖެއަށެވެ.
ޑރ.ފަރަހްނާޒް ވިދާޅުވީ މިއީ ރާއްޖެއަށް ވަރަށް ފަޚުރުވެރި ވަގުތުކޮޅެއް ކަމަށެވެ.
ފޮރިިން މިނިސްޓަރު އަބްދުﷲ ޝާހިދު ވަނީ މިކަމާއި ގުޅިގެން ޑރ.ފަރަހްނާޒަށް މަރުހަބާ ވިދާޅުވެފައެވެ. އަދި ރާއްޖެއާ ގުޅުންހުރި ކަންކަމުގައި ޑރ.ފަރަހްނާޒްގެ މަސައްކަތަށް މިނިސްޓަރު ތައުރީފު ކުރެއްވިއެވެ.
އިނގިރޭސިވިލާތަށް ދިވެހިރާއްޖެއިން ކަނޑައަޅާފައި ހުންނަވާ ސަފީރުކަމަށް، ޑރ.ފަރަހްނާޒް އައްޔަން ކުރެއްވީ 2019ވަނަ އަހަަރުގެ އެޕްރީލް މަހުގެ 18ވަނަ ދުވަހުއެވެ.
ޑރ.ފަރަޙްނާޒް ފައިސަލަކީ މީގެ ކުރިން، އިނގިރޭސިވިލާތަށް ދިވެހިރާއްޖެއިން ކަނޑައަޅާފައި ހުންނަވާ ސަފީރުކަމާއި، ޑެންމާކް، ފިންލެންޑް، ފަރަންސޭސިވިލާތް، ނޯވޭ، ސްޕެއިން އަދި ސްވިޑްން އަށް ދިވެހިރާއްޖެއިން ކަނޑައަޅާފައި ހުންނަވާ ނޮން-ރެޒިޑެންޓް އެމްބެސެޑަރުކަން ކުރައްވާފައިވާ ބޭފުޅެކެވެ. ޑރ.ފަރަޙްނާޒް ޕީ.އެޗް.ޑީ ހާސިލް ކުރައްވާފައިވަނީ ޕޮލިޓިކްސްގެ ދާއިރާއިން، އިނގިރޭސިވިލާތުގެ ޔުނިވަރސިޓީ އޮފް ހަލް އިންނެވެ.
