ސިފައިންނާއި ހުޅުމާލެ ވެޓަރެންސް މެޗު އެއްވަރު

މައިލޯ އެފްއޭއެމް ވެޓަރެންސް ލީގުގައި ދިވެހި ސިފައިންގެ ކްލަބާއި ހުޅުމާލެ ވެޓަރެންސް ބައްދަލުކުރި މެޗު އެއްވަރުވެއްޖެއެވެ.

މިއަދު ހަވީރު ކުޅުނު މި މެޗު ނިމުނީ 1-1ގެ ނަތީޖާއަކުންނެވެ. މެޗުގައި ފުތަމަ ލަނޑުޖަހައި ލީޑު ނެގީ ހުޅުމާލެ ވެޓަރަންސް ޓީމުންނެވެ. ފުރަތަމަ ހާފުގެ 23 ވަނަ މިނެޓުގައި ހުޅުމާލެ ވެޓަރެންސަށް ލަނޑު ޖަހައިދިނީ އިބްރާހީމް މުހައްމަދުއެވެ. ނަމަވެސް ދެވަނަ ހާފުގައި ސިފައިންގެ މުހައްމަދު އަމީން ވަނީ ލަނޑެއްޖަހައި ހުޅުމާލެ ވެޓަރެންސާ އެއްވަރުކޮށްފައެވެ.

މި ފަހަރުގެ މުބާރާތުގެ ލީގު ބުުރުގައި ސިފައިން ކުޅުނު ހަ މެޗުގެ ތެރެއިން ހަތަރު މެޗުން ވަނީ އެއްވަރުވެފައެވެ. ސިފައިން ބަލިވީ ފުރަތަމަ މެޗުގައި ދަ ގްރާންޑޭ އަތުންނެވެ. ދެން އެ ޓީމު ކުޅުނު ފަސް މެޗުގެ ތެރެއިން ހަތަރު މެޗު ވަނީ އެއްވަރުވެފަ އެވެ. ސިފައިން މޮޅުވީ ޕޮލިސް އަތުންނެވެ. ސިފައިން ލީގު ބުރުގެ ހަތަރު ވަަނައިގައި އޮތީ ހަތް ޕޮއިންޓާ އެކުގައެވެ.

ފައިނަލުގެ ޖާގަ ޔަގީންކޮށްފައިވާ ހުޅުމާލެ ވެޓެރަންސްއިން ވަނީ ލީގު ބުރުގެ ހަ މެޗު ނިންމާލިއިރު، 14 ޕޮއިންޓް ހޯދާފައެވެ، ފައިނަލުގެ އަނެއް ޖާގަ ހޯދާފައިވާ މޯލްޑިވްސް ސޮކަރ މޭޓްސްއިން ވަނީ ކުޅުނު ފަސް މެޗުން 11 ޕޮއިންޓް ހޯދާފައެވެ. ސޮކަރ މޭޓްސްއިން ލީގު ބުރުގައި ކުޅޭ ފަހު މެޗުގައި ބުދަ ދުވަހު ހަވީރު ކުޅޭނީ އީގަލްސްއާއެވެ. ފައިނަލް މެޗު އޮތީ އަންނަ ހޮނިހިރު ދުވަހު ހަވީރުއެވެ.

އެފްއޭއެމާ ގުޅިގެން ކްލަބް އިވެންޓްސްއިން މިފަހަރުގެ މުބާރާތް އިންތިޒާމުކުރާއިރު، މުބާރާތް އަލުން ބާއްވަންފަށާފައި މިވަނީ ތިން އަހަރުގެ މެދުކެނޑުމަކަށްފަހުއެވެ. 40 އަހަރުން މަތީގެ ކުޅުންތެރިންނަށް ޚާއްސަކޮށްފައިވާ މުބާރާތުގައި މިފަހަރު 7 ޓީމު ވާދަކުރެއެވެ. ކޮންމެ ޓީމެއްގައިވެސް 35 އަހަރުން މަތީގެ ދެ ކުޅުންތެރިން ހިމަނަން ފުރުސަތު ލިބެއެވެ.