އަންނަ މަހު އޮންނަ ޓީޓީ މުބާރާތަކީ، ދީމާއާއި ރަފާ ހޯދައިދިން ރަން ވަނަތަކުގެ އަގުވަަޒަންކުރަން އޮތް ފުރުސަތެއް- މިނިސްޓަރ މަހުލޫފް

އަންނަ މަހު ރާއްޖޭގައި އޮންނަ ޓީޓީ މުބާރާތަކީ ދީމާއާއި ރަފާ, ޓީޓީ ޓީމަށް ހޯދައިދިން ރަން ވަނަތަކުގެ އަގުވަަޒަންކުރަން އޮތް ފުރުސަތެއްކަމަށް ޔޫތު މިނިސްޓަރ އަހުމަދު މަހުލޫފް ވިދާޅުވެއްޖެއެވެ. އަންނަ މަހު ރާއްޖޭގައި އޮންނަ މުބާރާތަކީ ސައުތު އޭޝިޔަން ޖޫނިއަރ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕެވެ. މިއީ 2019 ވަނަ އަހަރު ބާއްވަން އޮތް މުބާރާތެވެ. ކޮވިޑާއި އެނޫންވސް ސަބަބުތަކާހުރެ މުބާރާތް ފަސްވީއެވެ.

މުބާރާތާ ގުޅޭގޮތުން މިއަދު ނޫސްވެރިންނަށް މައުލޫމާތު ދެއްވަމުން މިނިސްޓަރ ވިދާޅުވީ, މުބާރާތް ރާއްޖޭގައި ބާއްވަން ބޭނުންފުޅުވި އެންމެ މުހިއްމު ސަބަބަކީވެސް އެ ކުޅުންތެރިން ރާއްޖެއަށް ހޯދައިދީފައިވާ ރީތި ނަން ކަމަށެވެ. އެކުޅުންތެރިން ހޯދައިދީފައިވާ ކާމިޔާބީތަކާއި, ރަން ވަނަތަކުގެ އަގު ވަޒަންކުރަން ދިވެހި ސަޕޯޓަރުންގެ ކުރިމަތީގައި އެފަދަ ކާމިޔާބީއެއް ހޯދުމުގެ ފުރުސަތު ފަހިކޮށްދޭން ބޭނުންވީކަމަށް މިނިސްޓަރ ވިދާޅުވިއެވެ. އެފުރުސަތުގެ ބޭނުން ހިފައި, ދިވެހި ހުރިހާ ރައްޔިތުންވެސް އަންނަ މަހުގެ 9-11ށް އެކުޅުންތެރިންނަށް ވަގުތުކޮޅެއް ހުސްކޮށްދެއްވުމަށް މިނިސްޓަރ އެދިވަޑައިގެންނެވިއެވެ.

މިނިސްޓަރ ވިދާޅުވީ އިންޑިޔާފަދަ ވަރުގަދަ ޓީމުތަކާއެކު ވާދަކުރަން ޖެހުނަސް ރާއްޖޭގެ ކުޅުންތެރިން ރަނގަޅު ކާމިޔާބީއެއް ހޯދާނެކަމަށް އުއްމީދުކުރައްވާކަމަށެވެ. އެކަން ވާނީ ދިވެހި ސަޕޯޓަރުންގެ އެހީތެރިކަމާއެކު ކަމަށްވެސް ވިދާޅުވިއެވެ. މުބާރާތަށް ދިވެހި ކުޅުންތެރިން ތައްޔާރުކުރުމަށް މީގެ އަހަރެއްވަރު ކުރިން ރަނގަޅު ކޯޗަކާއެކީގައި ތަމްރީނުތައް ހަދަމުން އަންނަކަން މިނިސްޓަރ ފާހަގަކުރެއްވިއެވެ. އަދި މިހާރުވެސް ކުރީގެ ޓީޓީ ޗެމްޕިއަން ކޮރޭޝިޔާގެ ޒޯރާން އެހީގައި ކްރޮއޭޝިޔާގެ ރަނގަޅު ކުޅުންތެރިންތަކަކާއެކީގައި ގައުމީ ޓީމް ތައްޔާރުވަމުން ދާކަންވެސް ފާހަގަކުރެއްވިއެވެ, އިތުރު ކޯޗެއްވެސް މިވަގުތު އެކުޅުންތެރިންނަށް އިރުޝާދާއި ލަފާ ދެމުން ދެއެވެ. މީގެއިތުރުން މިދިޔަ މުއްދަތުގެ ތެރޭގައި އެކި މުބާރާތްތަކަށް އެކުޅުންތެރިން ފޮނުވައިގެން, ތައްޔާރުވާން މަސައްކަތްތަކެއް ކުރެވިއްޖެކަމަސް މިނިސްޓަރ ވިދާޅުވިއެވެ. ބޭނުންވެގެން އުޅޭ ނަތީޖާ ނެރުމަށް މިއަދު މިހާހިސާބަށް އައިއިރު ރަނގަޅު ކަންތައްތަކެއް ކުރެވިއްޖެކަމަށް މިނިސްޓަރ މަހުލޫފް ވިދާޅުވިއެވެ. މިނިސްޓަރ ވިދާޅުވީ ކުރިއަށް އޮތް ޖޫނިއަރ މުބާރާތަކީ ވަރަށް ބޮޑު މުބާރާތެއްކަމަށެވެ.

ޓޭބަލް ޓެނިސް އެސޯސިއޭޝަންގެ ރައީސް އަލީ ރަޝީދު ވިދާޅުވީ, މިމުބާރާތް ބޭއްވެނީ ސީދާ މިނިސްޓްރީއާއި މިނިސްޓަރުގެ އިސްނެންގެވުމުގެ މަތިންކަމަށެވެ. އަދި މުބާރާތުގެ ކަންކަން މިނިސްޓަރ ވަރަށް ގާތުން ބައްލަވަމުން ގެންދަވާކަމަށެވެ. މުބާރާތަށް ރާއްޖޭގެ ޖޫނިއަރ އަންހެން ކުޅުންތެރިން ތައްޔާރުވަނީ ސީދާ މެޑަލް ހޯދަންކަމަށް އޭނާ ވިދާޅުވިއެވެ. ފިރިހެން ކުޅުންތެރިން ސީދާ މެޑަލް ހޯދަން ތައްޔާރުވާން އަދި 2 އަހަރެއްވަރު ނަގާނެކަމަށްވެސް އެސޯސިއޭޝަންގެ ރައީސް ވިދާޅުވިއެވެ.

މުބާރާތުގައި ހިމެނެނީ 19 އަހަރުން ދަށް (ޖޫނިއަރ ކެޓަގަރީ)އާއި 15 އަހަރުން ދަށް (ކެޑޭޓް ކެޓަގަރީ)އެވެ. މުބާރާތް އޮންނާނީ އަންނަ މެއި މަހުގެ 9-11ށް ޒުވާނުންގެ މަރުކަޒުގައެވެ.