ރެސްޓޯރެންޓްގެ ތެރޭގައި މަރާލި ބިދޭސީ މީހާގެ ހަށިގަނޑު ގައުމަށް ފޮނުވާލައިފި
އޭނާގެ ހަށިގަނޑު ގައުމަށް ފޮނުވާފައިވަނީ އޭޕްރިލް މަހުގެ 21 ވަނަ ދުވަހު
ބަންގްލަދޭޝް މީހާ މަރުވެފައިވަނީ ލިބިފައިވާ ޒަޚަމްތަކަށް ހޮސްޕިޓަލްގައި ފަރުވާދެމުން ދަނިކޮށް
ހުޅުމާލޭގައި ހިންގާ ޚާންޖީ ރެސްޓޯރެންޓްގެ ތެރޭގައި މަރާލި ބަންގްލަދޭޝް ވެއިޓަރުގެ ހަށިގަނޑު އޭނާގެ ގައުމަށް ފޮނުވާލައިފިއެވެ.
ފުލުހުން ބުނީ އޭނާގެ ހަށިގަނޑު ގައުމަށް ފޮނުވާލީ އޭޕްރިލް މަހުގެ 21 ވަނަ ދުވަހު ކަމަށެވެ.
ބަންގްލަދޭޝް ވެއިޓަރުގެ ހަށިގަނޑު އޭނާގެ ގައުމަށް ފޮނުވާލާފައިވާއިރު, ހުޅުމާލޭގެ ޚާންޖީ ރެސްޓޯރަންޓްގައި ހޮނިހިރު ހަވީރު އޭނާއަށް ހަމަލާދީ މަރާލިކަމަށް ތުހުމަތުކުރެވޭ ޕާކިސްތާނުގެ ޝެފް މުހައްމަދު އާބިދު ފުލުހުން ވަނީ ހައްޔަރުކޮށްފައެވެ.
މިހާދިސާއާ ގުޅިގެން ފުލުހުން އޭނާ ހޯދަމުންދާކަން އިއުލާންކޮށްފައިވަނީ ހޮނިހިރު ދުވަހުގެ ރޭ 9:30 ހާއިރުއެވެ. ހޮނިހިރު ދުވަހުގެ ރޭ ދަންވަރު 2:23ގައި ފުލުހުން ކުރި ޓްވީޓެއްގައި ބުނެފައިވަނީ, މިހަމަލާގައި ތުހުމަތުކުރެވޭ ޕާކިސްތާނު މީހާ ކަމުގައިވާ އުމުރުން 26 އަހަރުގެ މުހައްމަދު އާބިދު ހައްޔަރުކޮށްފައިވާކަމަށެވެ. ހަމަލާދިނުމަށްފަހު މުހައްމަދު އާބިދު ވަނީ ފިލާފައެވެ. ފުލުހުން ބުނެފައިވަނީ އާބިދުއަކީ ވަރަށް ނުރައްކާތެރި މީހެއްކަމަށެވެ.
ޚާންޖީ ކެފޭގައި މަސައްކަތްކުރާ މިދެމީހުންގެ ތެރެއިން މަރާލާފައިވާ ބަންގްލަދޭޝް މީހާއަކީ އެ ކެފޭގައި ވެއިޓަރެއްގެ ގޮތުގައި މަސައްކަތްކުރަމުން ދިޔަ މީހެކެވެ. ބަންގްލަދޭޝް މީހާ މަރުވެފައިވަނީ ލިބިފައިވާ ޒަޚަމްތަކަށް ހޮސްޕިޓަލްގައި ފަރުވާދެމުން ދަނިކޮށެވެ. މައުލޫމާތު ލިބިފައިވާ ގޮތުގައި އާބިދު ބަންގްލަދޭޝް މީހާއަށް ހަމަލާދިނީ ހިނގި ދެބަސްވުމެއްގެ ތެރޭގައެވެ.
މިހާދިސާއާ ގުޅިގެން ރާއްޖޭގައި ދިރިއުޅޭ ބަންގްލަދޭޝްގެ ރައްޔިތުން ހޮނިހިރު ދުވަހުގެ ރޭ ވަނީ, ރާއްޖޭގައި ހުންނަ ބަންގްލަދޭޝްގެ އެމްބަސީ ކައިރިއަށް އެއްވެ މުޒާހަރާވެސް ކޮށްފައެވެ.
މި މައްސަލަ ސީރިއަސް މައްސަލައެއްގެ ގޮތުގައި ބަލަމުން އަންނަކަމަށް ފުލުހުން ވަނީ ބުނެފައެވެ.
