އިންޑިއާ އައުޓް ބެނަރ ނަގަން ކޯޓު އަމުރު ދިން ފަނޑިޔާރަށް އިދިކޮޅު ކޯލިޝަނުން ބިރު ދެއްކި މައްސަލަ ފުލުހުން ބަލަން ފަށައިފިއެވެ.
ފުލުހުން ބުނީ ރައީސް އޮފީހުގެ ކުރީގެ ސްޕޯކްސްޕާރސަން އައްބާސް އާދިލް ރިޒާ ކޮށްފައިވާ ޓްވީޓަކީ ފަނޑިޔާރަށް ބިރު ދެއްކުމުގެ ގޮތުން ކޮށްފައިވާ ޓްވީޓަކަށްވާތީ އެކަން ސީރިއަސް މައްސަލައެއްގެ ގޮތުގައި ބަލަމުން އަންނަ ކަމަށެވެ.
ބޮޑުތަކުރުފާނު މަގުގައި ހުންނަ, ކުރީގެ ރައީސް އަބްދުﷲ ޔާމީންގެ ގެކޮޅުގައި ހަރުކޮށްފައިވާ އިންޑިއާ އައުޓް ބޮޑު ބެނަރ ކޯޓު އަމުރުގެ ދަށުން ފުލުހުން ނެގީ ބުރާސްފަތި ދުވަހުއެވެ. މި ބެނަރ ހަރުކުރީ އަންގާރަ ދުވަހުގެ ހަވީރުއެވެ.
ބެނާރ ނެގުމަށް ކޯޓުން ނެރުނު އަމުރުގައި ގާޒީގެ ނަމާއި ސޮއި އޮތް ބައި ފޮޓޯއާއެކު ހިއްސާ ކުރަމުން އައްބާސް އާދިލް ރިޒާ ކުރި ޓްވީޓްގައި ބުނެފައިވަނީ، ގާޒީގެ ނަން ހަނދާން ނެތިދާނެތީ ކުރި ޓްވީޓެއް ކަމަށާއި، ވަރަށް ރަނގަޅަށް ބަލައި ފާސް ކުރަން ވާނެ ކަމަށެވެ. އަދި "މަޖީދީ މަގުގައި ހުރިހާ ގާއްދާރުން ވާޖަހާ ދަމަންވާނެ" ކަމަށެވެ.
ސިޔާސީ ބޭނުމެއްގައި, ވަކި ގައުމަކާ ދެކޮޅަށް ރާވައިގެން ހިންގާ ކެމްޕޭނުތަކަކީ ގައުމީ ސަލާމަތާ ގުޅުންހުރި, އަދި ނުރައްކާ އޮތް ކަމެއް ކަމަށްވާތީ އެފަދަ ހަރަކާތްތައް ހުއްޓުވުމަށް ކަނޑައަޅައި, ތަންފީޒުކުރުމަށް ދައުލަތުގެ ކަމާބެހޭ އެންމެހައި އިދާރާތަކަށް އަންގައި، ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ބުރާސްފަތި ދުވަހު ވަނީ ގަރާރެއްވެސް ނެރުއްވާފައެވެ.
ގަރާރުގައި ފާހަގަކޮށްފައިވާ ގޮތުގައި, ގައުމީ ސަލާމަތަށް ނުރައްކާވާފަދަ ކޮންމެ ހަރަކާތަކީ ދިވެހި ސަރުކާރުން އެކަމެއް ހުއްޓުވަންޖެހޭނެ ކަމެއް ކަމުގައިވާތީ، ދިވެހި ދައުލަތުގެ ފުދުންތެރިކަމާއި ފާގަތިކަމަށާއި ރާއްޖޭގެ ގައުމީ ސަލާމަތަށް ކުރާ ނޭދެވޭ ކޮންމެ އަސަރަކީ ދިވެހި ކޮންމެ ރައްޔިތަކަށް ލިބިގެންދާނެ އަނިޔާއެކެވެ.
ވުމާއެކު، އެއްވެސް ޖާއިޒު މަގުސަދެއް ނެތި, ސިޔާސީ ބޭނުމެއްގައި, ވަކި ގައުމަކާ ދެކޮޅަށް ރާވައިގެން ހިންގާ ކެމްޕޭނުތަކަކީ ގައުމީ ސަލާމަތާ ގުޅުންހުރި, އަދި ނުރައްކާ އޮތް ކަމެއްކަން ވަނީ ފާހަގަކޮށްފައެވެ.
ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި ރައީސް މުހައްމަދު ނަޝީދުވެސް ވަނީ މިކަމާ ގުޅޭ ގޮތުން ވާހަކަފުޅު ދައްކަވާފައެވެ. އެމަނިކުފާނު ވިދާޅުވީ، އަވަށްޓެރި ގައުމަކާ ގުޅޭ ގޮތުން ބަދުބަސް ބުނެ ބެނަރތައް ހަރުކުރުން ފުލުހުން ނުކުމެ ވަގުތުން ވަގުތަށް ހުއްޓުވަން ޖެހޭ ކަމަށެވެ.
އިދިކޮޅުން ގެންދަނީ އިންޑިއާ އައުޓް ޖަހައި މާލޭގެ އެކި ސަރަހައްދުތަކުގައި ބެނަރ ހަރުކޮށް މަގުމަތީގައާއި ފާރުތަކުގައި ލިޔަމުންނެވެ.
