އަފްޣާނިސްތާނުގައި ދިން ބޮމުގެ ހަމަލާތަކެއްގައި ގިނަ އަދަދެއްގެ ބަޔަކު މަރުވެއްޖެ

އަފްޣާނިސްތާނުގެ އެކި ސަރަހައްދުތަކުގައި ބޮމުގެ ހަމަލާތައް ދިނުމުގެ ސަބަބުން އެތައް ބަޔަކަށް އެކި ވަރުގެ އަނިޔާލިބި, ގިނަ އަދަދެއްގެ ބަޔަކު މަރުވެއްޖެއެވެ.

ރިޕޯޓުތައް ބުނާގޮތުން ބުރާސްފަތި ދުވަހު އަފްޣާނިސްތާންގެ އުތުރުގައި އޮންނަ މަޒަރް-އި-ޝާރިފްގެ ޝީއާ މިސްކިތެއްގައި ގޮއްވާލި ބޮމުގެ ސަބަބުން ގިނަ އަދަދެއްގެ ބަޔަކަށް ވަނީ އަނިޔާވެފައެވެ.

އެންމެފަހުގެ ރިޕޯޓުތަކަށް ބަލައި އަލްޖަޒީރާގައި ރިޕޯޓުކޮށްފައިވާ ގޮތުން, މިހަމަލާގައި އަނިޔާލިބުނު މީހުންގެ އަދަދު 40ށް އަރައެވެ. އަދި ހަމަލާގައި މަރުވި މީހުންގެ އަދަދު 10ށް އަރާކަމަށް މަޒަރް-އި-ޝާރިފްގެ މައި ހޮސްޕިޓަލާ ހަވާލާދީ ރިޕޯޓުތައް ބުނެއެވެ.

އެގޮތުން މިސްކިތަށް ހަމަލާދިން އިރު މިސްކިތުގައި ތިބި ގިނަ އަދަދެއްގެ މީހުން ހޮސްޕިޓަލަށް ގެނެސްފައިވާކަމަށް އޭނާ ވަނީ ބުނެފައެވެ.

އައިއެސްއައިއެސްއަށް ވާގިވެރިވާ އިސްލާމިކް ސްޓޭޓް އޮފް ޚޮރަސަން ޕްރޮވިންސް (އައިއެސްކޭޕީ)ން މިހަމަލާގެ ޒިންމާ ނަގާފައިވާ ކަމަށް އަލްޖަޒީރާގައި ރިޕޯޓުކޮށްފައިވެއެވެ.

މީގެ އިތުރުން އަފްޣާނިސްތާނުގެ ވެރިރަށް ކާބުލްގެ މަގެއްގައި ބުރާސްފަތި ދުވަހު ގޮއްވާލި ބޮމެއްގެ ސަބަބުން ކުޑަ ދެކުދިންނަށް ވަނީ އަނިޔާ ލިބިފައެވެ.

ކާބުލް ޕޮލިސް ސްޓޭޝަންގެ ތަރުޖަމާނު ޚާލިދު ޒަދްރަން ކުރެއްވި ޓްވީޓެއްގައި ވިދާޅުވެފައި ވަނީ, ބޮން ގޮއްވާލާފައި ވަނީ ގިނަ އަދަދެއްގެ ޝީއާ މުސްލިމުން ދިރިއުޅެމުންދާ ސަރަހައްދެއްގައި ކަމަށެވެ.

މީގެ ދެދުވަސްކުރިން ހަމަ މިސަރަހައްދުގައި ތައުލީމުގެ ޚިދުމަތްތައް ފޯރުކޮށްދޭ އިދާރާތަކަށް އަމާޒުކޮށް, ދިން ބޮމުގެ ހަމަލާތަކުގައި 6 މީހުން މަރުވެ 17 މީހުންނަށް އެކިވަރުގެ އަނިޔާތައް ލިބިފައިވާކަމަށް ރިޕޯޓުތައް ބުނެއެވެ. މީގެ ތެރޭގައި ގިނައީ ކުޑަކުދިންނެވެ.

އަފްޣާނިސްތާންގެ ކުންދުޒް ސިޓީގައި ބުރާސްފަތި ދުވަހު ދިން ބޮމުގެ ހަމަލާގައި 4 މީހުން މަރުވެ 18 މީހުންނަށް އެކިވަރުގެ އަނިޔާތައް ލިބިފައިވާކަމަށް ރިޕޯޓުތައް ބުނެއެވެ.