ފަހުވަގުތު ލަނޑުޖަހައި، ދަ ގްރާންޑޭ އީގަލްސްއާ އެއްވަރުކޮށްފި

މައިލޯ އެފްއޭއެމް ވެޓަރެންސް ލީގުގައި އީގަލްސްއާ ބައްދަލުކުރި މެޗުގެ ފަހު ވަގުތުގައި ލަނޑުޖަހައި, ދަ ގްރާންޑޭ އެއްވަރުކޮށްފިއެވެ.

މެޗު ނިމުނީ 1-1ގެ ނަތީޖާއަކުންނެވެ. މިއާއެކު ދެޓީމަށްވެސް އެއް ޕޮއިންޓު ލިބުނުއިރު، މުބާރާތުގެ ފައިނަލުގެ ދެވަނަ ޖާގައަށް ވާދަކުރަމުން އަންނަ ދަ ގްރާންޑޭއަށް މެޗުން މޮޅު ނުވެވުމުން ގެއްލުނީ މުހިންމު ދެ ޕޮއިންޓެވެ.

7 ޓީމުގެ މެދުގައި ކުޅޭ ލީގު ބުރުން އެއްވަނައާއި ދެވަނަ, ފައިނަލަށް ހޮވޭއިރު، ފައިނަލުގެ އެއް ޖާގަ ހުޅުމާލެ ވެޓްރަންސްއިން ވަނީ ޔަގީންކޮށްފައެވެ. ދެވަނަ ޖާގައަކަށް ވާދަކުރަނީ މުޅިން އަލަށް ވެޓެރަންސް މުބާރާތުގައި ކުޅެމުން އަންނަ ދަ ގްރާންޑޭއާއި, ތަރިން ގިނަ، މޯލްޑިވްސް ސޮކަރ މޭޓްސް ޓީމެވެ. ހުޅުމާލެ ވެޓެރަންސް ޓީމަށް ފަސް މެޗުން 13 ޕޮއިންޓް ލިބިފައިވާއިރު، ދެވަނައިގައި އޮތް ދަ ގްރާންޑޭއަށް ވަނީ ފަސް މެޗުން 10 ޕޮއިންޓް ލިބިފައެވެ. ތިން ވަނައިގައި އޮތް ސޮކަރ މޭޓްސްއަށް ހަތަރު މެޗުން ލިބިފައިވަނީ 8 ޕޮއިންޓެވެ.

މިއަދު ކުޅުނު މެޗުގައި ދެޓީމުންވެސް ލަނޑު ޖެހީ މެޗުގެ ފަހު 10 މިނެޓުގެ ތެރޭގައެވެ. މެޗުގެ 50 ވަނަ މިނެޓުގައި އީގަލްސްއަށް ލީޑު ނަގައިދިނީ އިބްރާހީމް އާމިރުއެވެ. ދަ ގްރާންޑޭ ލަނޑެއް ޖަހައި ނަތީޖާ ހަމަހަމަކުރީ މެޗުގެ ފަހު މިނެޓުގައެވެ. އެޓީމަށް ލަނޑު ޖަހައިދިނީ ކެޕްޓަން އަހުމަދު ޝަކީބްއެވެ.

އެފްއޭއެމްއާ ގުޅިގެން ކްލަބް އިވެންޓްސްއިން މިފަހަރުގެ މުބާރާތް އިންތިޒާމުކުރާއިރު، މުބާރާތް އަލުން ބާއްވަންފަށާފައި މިވަނީ ތިން އަހަރުގެ މެދުކެނޑުމަކަށްފަހުއެވެ. 40 އަހަރުން މަތީގެ ކުޅުންތެރިންނަށް ޚާއްސަކޮށްފައިވާ މުބާރާތުގައި މިފަހަރު 7 ޓީމު ވާދަކުރެއެވެ. ކޮންމެ ޓީމެއްގައިވެސް 35 އަހަރުން މަތީގެ ދެ ކުޅުންތެރިން ހިމަނަން ފުރުސަތު ލިބެއެވެ.

މުބާރާތުގައި މާދަމާ ހަވީރު ކުޅޭ މެޗުގައި ސިފައިންނާއެކު ކުޅޭނީ ޕޮލިހެވެ. މެޗު ފަށާނީ 16:30ގައެވެ.