އައިއެމްއެފްގެ ޕްރޮގްރާމް އަލުން ފެށުމުގެ އުންމީދުގައި ޕާކިސްތާނުން ޚަރަދުކުޑަކުރަނީ

އިންޓަރނޭޝަނަލް މަނިޓަރީ ފަންޑު (އައިއެމްއެފް)އާއެކު ޕާކިސްތާނުން ވެފައިވާ އެއްބަސްވުމެއްގެ ދަށުން ފެށުމަށްފަހު ހުއްޓުމަކަށް އައިސްފައިވާ ޕްރޮގްރާމް އަލުން ފެށުމުގެ އުންމީދުގައި, އެގައުމުގެ ސަރުކާރުގެ ޚަރަދުތައް ކުޑަކޮށް, ފަންޑު އިތުރުކުރުމަށް ނިންމާފައިވާކަމަށް ޕާކިސްތާންގެ ފިނޭންސް މިނިސްޓަރު މިފްތާހް އިސްމާއީލް ވިދާޅުވެއްޖެއެވެ.

ޕާކިސްތާންގެ ފިނޭންސް މިނިސްޓަރު މިހެން ވިދާޅުވެފައި ވަނީ ބުދަ ދުވަހުއެވެ. މިނިސްޓަރު ވަނީ ޕަބްލިކް ސަރވިސް ޑިވެލޮޕްމެންޓް ފަންޑްސް ހިފަހައްޓައި, ސަރުކާރުގެ ޚަރަދުކުޑަކޮށް, އައިއެމްއެފާއެކު މަޝްވަރާތައްކޮށް ހުއްޓިފައިވާ ޕްރޮގްރާމް އަލުން ފެށުމުގެ މަސައްކަތް ކުރައްވާނެކަމަށް ވިދާޅުވެފައެވެ.

މިނިސްޓަރު ވަނީ އައިއެމްއެފާއެކު މަޝްވަރާތައް ކުރެއްވުމަށް އެމެރިކާގެ ވޮޝިންގޓަނަށް ވަޑައިގަންނަވަން ހަމަޖެހިފައިވާކަމަށްވެސް ވިދާޅުވެފައެވެ. އަދި މިބައްދަލުވުމުގައި ޕާކިސްތާންގެ ސެންޓްރަލް ބޭންކުގެ ގަވަރުނަރު ރާޒާ ބާގިރްވެސް ބައިވެރިވެވަޑައިގަންނަވާނެ ކަމަށް ވިދާޅުވެފައިވެއެވެ.

ޕާކިސްތާނުން މިހާރު މަސައްކަތްކުރަމުން ދަނީ, އެގައުމުން އައިއެމްއެފާއެކު 2019 ވަނަ އަހަރުގެ ޖުލައި މަހުގެ ތެރޭގައި އެއްބަސްވި 6 ބިލިއަން ޑޮލަރުގެ ރެސްކިއު ޕެކޭޖުގެ 7 ވަނަ ރިވިއުގެ މަޝްވަރާތައް އަލުން ފެށުމަށެވެ. އެގައުމުގެ ކުރީގެ ބޮޑުވަޒީރު އިމްރާން ޚާންގެ ބައެއް ނިންމެވުންތަކާއެކު ގައުމުގެ އިގުތިސާދަށް އަންނަމުން ދިޔަ ބަދަލުތަކާއެކު އައިއެމްއެފާއެކު ކުރަމުންދިޔަ މަޝްވަރާތައް ވަނީ ހުއްޓިފައެވެ.

މަޑުޖެހިފައިވާ މަޝްވަރާތައް އަލުން ފެށިއްޖެނަމަ އައިއެމްއެފުން ޕާކިސްތާނަށް 900 މިލިއަން ޑޮލަރުގެ އެހީ ލިބޭނެއެވެ. އަދި އެއާއެކު އެހެން އެކްސްޓަރނަލް ފަންޑުތައްވެސް ހުޅުވިގެންދާނެއެވެ.

ޕާކިސްތާނުގެ މިހާރުގެ ކަރަންޓް އެކައުންޓް ޑެފިސިޓް, އަދި އެގައުމުގެ ފޮރިން ރިޒަރވް 10.8 ބިލިއަން ޑޮލަރަށް ވެއްޓިފައިވާ މިދަނޑިވަޅުގައި އެގައުމަށް ވަނީ ބޭރުގެ ފައިސާގެ އެހީ ވަރަށް މުހިންމުވެފައެވެ.

މަޖިލީހުގެ އިތުބާރުނެތްކަމުގެ ވޯޓާއެކު އިމްރާން ޚާން މަގާމުން ވަކިކުރެވިގެން ދިޔައީ ގައުމުގެ އިގުތިސާދީ ހާލަތު ދަށްވާން ފަށައި, އެކަންކަން ހައްލު ކުރުމަށް އެކަށީގެންވާ މަސައްކަތްތަކެއް ނުކުރައްވާކަމަށް ބުނެއެވެ. އެގޮތުން މި ޖޫން މަހު, މިހާރު ކުރިއަށްދާ މާލީ އަހަރު ނިމުމުގެ ކުރިން އެގައުމުގެ ފިސްކަލް ޑެފިސިޓް ޖީޑީޕީގެ ނިސްބަތުން 10 އިންސައްތަ އިތުރުވާނެކަމަށް ވަނީ ލަފާކޮށްފައެވެ.

ޕާކިސްތާނުގެ މިހާރުގެ ފިނޭންސް މިނިސްޓަރު ހާމަކުރައްވާފައިވާ ނަންބަރުތަކަކީ ދެކޮޅުޖެހޭ ނަންބަރުތަކެއް ނޫންކަމަށް ކުރީގެ ބޮޑުވަޒީރުގެ އެނަރޖީ މިނިސްޓަރު ހައްމަދު އަޒްހަރު ވަނީ ވިދާޅުވެފައެވެ.

އިގުތިސާދީ ހާލަތު ގޯސްވުމާގުޅިގެން ކުރީގެ ބޮޑުވަޒީރު މަގާމުން ވަކިކުރެވުނުނަމަވެސް, އަލަށް ސަރުކާރާ ހަވާލުވެވަޑައިގެންނެވި ބޮޑުވަޒީރު ޝަހްބާޒް ޝަރީފަށް ވަނީ ގައުމުގައި އުފުލިފައިވާ އިންފްލޭޝަން ރޭޓާއެކު އިގުތިސާދު ހަމައަކަށް އެޅުވުމުގެ މަސައްކަތްކުރައްވަން ޖެހިފައެވެ. އެގޮތުން ބޮޑުވަޒީރަށް ކުރިމަތިވެފައިވާ އެންމެ ބޮޑު އެއް ގޮންޖެހުމަކީ (އާންމު ރައްޔިތުންގެ ތާއީދު ހޯއްދެވުމަށްޓަކައި) ތެލާއި ގޭހުގެ އަގު ދުނިޔޭގެ ބާޒާރުގައި އުފުލިފައިވާ މިދަނޑިވަޅުގައި ސަރުކާރުގެ ބަޖެޓުގައި ނެތް ފައިސާއިން އެތަކެއްޗަށް ސަބްސިޑީ ފޯރުކޮށްދިނުމަށް އިމްރާން ޚާން ނިންމަވާފައިވާ ނިންމެވުމެވެ.

މި ނިންމެވުމާއެކު ސަރުކާރުގެ ބަޖެޓަށް ބޮޑު ބުރައެއް އުފުލަން ޖެހިފައި ވީނަމަވެސް, ސަރުކާރާ ހަވާލުވެވަޑައިގަތުމަށްފަހު ސަބްސިޑީ ކަނޑުއްވާލައިފިނަމަ, ރައްޔިތުންގެ ނުރުހުން ސަރުކާރަށް އަމާޒުވާނެކަމަށް ވިދާޅުވެ ބޮޑުވަޒީރު ޝަހްބާޒް ވަނީ, ތެލާއި ގޭހަށް ދެމުން އަންނަ ސަބްސިޑީ ކަނޑުއްވާނުލާނެކަމަށް ވިދާޅުވެފައެވެ. މިކަންތައް މިހާރުގެ ފިނޭންސް މިނިސްޓަރު ސިފަކުރައްވަނީ އިމްރާން ޚާންގެ ސަރުކާރުން ދެން އަންނަ ސަރުކާރަކަށް އުނދަގޫކުރުމަށް ގަސްދުގައި ކޮށްފައިވާ ކަމެއްގެގޮތުގައެވެ.