ޚިޔާލު ފާޅުކުރުމުގެ މިނިވަންކަމަކީ ޤާނޫނު އަސާސީގެ 27 ވަނަ މާއްދާއިން ކޮންމެ މީހަކަށްވެސް ލިބިދީފައިވާ ޙައްޤެކެވެ. އެހެންނަމަވެސް، ޤާނޫނުން ލިއްބައިދޭ ޙައްޤުތައް ހަނިކުރެވޭ ޙާލަތްތަކެއް ހުންނަ ބީދައިން، ޚިޔާލުފާޅު ކުރުމުގެ މިނިވަންކަމަކީވެސް ބައެއް ޙާލަތްތަކުގައި ހަނި ކުރެވިގެންދާ ޙައްޤެކެވެ. އެގޮތުން ބައެއް ފަހަރު، ތިމާ ހުންނަ މަޤާމެއްގެ ސަބަބުން، ނުވަތަ އަދާކުރާ ވަޒީފާއެއްގެ ސަބަބުން މި ޙައްޤު ހަނިވެގެންދާ ޙާލަތްތަކެއް އާދެއެވެ.

މިސާލަކަށް ޤާނޫނު ތަންފީޒު ކުރާ ފަރާތެއްގެ ޙައިސިއްޔަތުން ފުލުހުންނަކީވެސް މި ދެންނެވި ޙައްޤުތައް ލިބިދީފައިވާނެ ބައެކެވެ. ސިވިލް ސަރވެންޓުންވެސް، ކޯޓުތަކުގައި މަސައްކަތް ކުރައްވާ ފަނޑިޔާރުންވެސް ހަމަ އެފަދައެވެ. ނަމަވެސް މިއިން ކޮންމެ ޕްރޮފެޝަންއެއްގައިވެސް ހިޔާލު ފާޅުކުރުމުގެ މިނިވަންކަމުގެ ޙައްޤު ވަކި ޙާލަތްތަކެއްގައި ވަކި ގޮތްތަކަކަށް ވަނީ ހަނި ކުރެވިފައެވެ. އެކި މިންވަރަށެވެ.

ދާދި ފަހުން ފެންމަތިވި މައްސަލައެކެވެ. ފަނޑިޔާރުންނަށް ފްލެޓު ނުދޭ މައްސަލައިގައި ކޯޓެއްގެ ގާޒީއަކު ކޯފާ އިސްކުރައްވައި، ދެއްކެވި ވާހަކަފުޅެއް ގިނަ ބައެއްގެ ސަމާލުކަމަށް ވަނީ އައިސްފައެވެ. އެ މައްސަލަ މިހާރު ޖުޑީޝަލް ސަރވިސް ކޮމިޝަނުންވެސް ތަހުގީގު ކުރަން ފަށާފައިވާއިރު، ބައެއް ފަރާތްތަކުން ބުނަމުންދަނީ ފަނޑިޔާރުގެ ބަސްމަގު ހުރީ އެންމެ ރަނގަޅަށް ނޫން ނަމަވެސް، ފަނޑިޔާރު އެ ވިދާޅުވީ ނުހަނު ރަނގަޅު ވާހަކަފުޅެއް ކަމަށެވެ.

ފަނޑިޔާރުންނަކީ އާންމު ދިރިއުޅުއްވުމުގައި އާންމު މުޖުތަމައުގެ ތެރެއަށް ނުކުމެ އުޅުއްވުމުގައި ގިނަ ކަންތައްތަކަކަށް ބައްލަވަން ޖެހިވަޑައިގަންނަވާ ބައެކެވެ. މިކަމާއި ގުޅޭގޮތުން ރާއްޖެއެމްވީއާ ވާހަކަދެއްކެވި އެ ދާއިރާގެ ބައެއް ބޭފުޅުން ވިދާޅުވާ ގޮތުގައި، ފަނޑިޔާރުން އާންމުންގެ ގޭގޭގައި ކުއްޔަށް ދިރިއުޅުއްވުމަކީ ފަނޑިޔާރުންނަށް އެކި ކަހަލަ ނުފޫޒާއި، އިންޒާރުތައް ލިބުމަށް ހުޅުވިގެންދާ އިތުރު ދޮރެކެވެ.

މީގެ އިތުރުން، ކްރިމިނަލް ކޯޓުގެ ފަނޑިޔާރުންނާއި އާއިލާއަށް އިންޒާރުތައް ލިބޭތީ އިތުރަށް ސެކިއުރިޓީ ދޭން ޖެހޭކަމަށް ދާދި ފަހުން ބޭއްވުނު ރައްޔިތުންގެ މަޖިލީހުގެ ޖަލްސާއެއްގައި މެމްބަރުންވެސް ވަނީ ވިދާޅުވެފައެވެ.

ފަނޑިޔާރުންގެ ޤާނޫނަށް އިސްލާޙު ގެނައުމުގެ ބިލާއި ގުޅޭގޮތުން ބަހުސް ކުރައްވަމުން ދެއްކެވި ވާހަކަފުޅުގައި މެމްބަރަކު ވަނީ ބައެއް މައްސަލަަތަކާއި ގުޅިގެން ފަނޑިޔާރުންނަށް، ޚާއްސަކޮށް ކްރިމިނަލް ކޯޓުގެ ފަނޑިޔާރުންނަށް ވަރަށް ބޮޑެތި އިންޒާރުތައް އަންނަމުންދާކަމުގެ ޝަކުވާތައް ލިބެމުންދާކަން ފާހަގަ ކުރައްވާފައެވެ.

ކްރިމިނަލް ކޯޓުން ބަލަނީ ޖިނާއީ މައްސަލަތަކެވެ. އެ މައްސަލަތަކާއި ގުޅިގެން ކޯޓުގައި ކުރިއަށްދާ ޝަރީއަތްތަކާއި ގުޅިގެން އެކި ގާޒީންނަށް އިންޒާރު ދިނުމާއި، ބިރު ދެއްކުމަކީ މީގެ ކުރިންވެސް ހިނގާފައިވާ ކަންކަމެވެ. އެގޮތުން ކްރިމިނަލް ކޯޓު ހިންގެވުމާއި ކުރިން ޙަވާލުވެހުންނެވި މިހާރުގެ ސުޕްރީމް ކޯޓުގެ ފަނޑިޔާރު އަލްއުސްތާޛު ޢަލީ ރަޝީދު ދިރިއުޅުއްވާ ފްލެޓްގެ ބޭރު ދޮރަށް ކޯރާޑިއަކުން ގެއްލުންދިން މައްސަލައެއްވެސް ފެންމަތިވެފައިވެއެވެ. ދޮރަށް ގެއްލުން ދޭން ބޭނުންކުރި ކޯރާޑި ވެސް އެޕާޓްމެންޓުގެ ދޮރުމަތީގައި ބާއްވާފައި އޮތް ކަަމަށް ފުލުހުން އެ މައްސަލައާއި ގުޅިގެން އޭރު ބުނެފައިވެއެވެ.

ފަނޑިޔާރުންގެ ޤާނޫނު ބުނާގޮތުން އުއްތަމަ ފަނޑިޔާރަށް ދޭންޖެހޭ ހިމާޔަތާއި ރައްކާތެރިކަން އެމްއެންޑީއެފުން ހަމަޖައްސައިދޭން ޖެހެއެވެ.

މީގެ އިތުރުން، އުއްތަމަ ފަނޑިޔާރު ފިޔަވައި އެހެން ފަނޑިޔާރުންނަށް ސަލާމަތާއި ރައްކާތެރިކަން ފޯރުކޮށްދިނުމުގެ އުސޫލުތަކެއް ދައުލަތުގެ ސަލާމަތީ ބާރުތަކުން އެކަށައަޅައި، އެ އުސޫލުގެ މަތިން ސެކިއުރިޓީގެ ކަންކަން ފޯރުކޮށްދޭންޖެހޭކަން ބަޔާންކޮށްފައިވެއެވެ. އެހެންނަމަވެސް، އެއީ ފަނޑިޔާރުންނަށް ދޭންޖެހޭ ސެކިއުރިޓީގެ ވާހަކައެވެ. ސުވާލަކީ، އާންމު ތަންތަނުގައި ކުއްޔަށް އުޅޭނަމަ، މި ދެންނެވި ސެކިއުރިޓީ އެންމެ ރަނގަޅަށް ފޯރުކޮށްދެވޭނެބާއެވެ؟ ފަނޑިޔާރުންނަށް އަންނަ އެކިކަހަލަ ނުފޫޒުތަކަށް ހުޅުވޭ ދޮރަކަށް އެކަން ނުވާނެބާއެވެ؟

ކަންމިހެން ހުރުމާއެކު، ސަރުކާރުގެ ހައުސިންގެ ތެރެއިން ފަނޑިޔާރުންނަށްވެސް ފްލެޓު ދޫކުރާނެ ވަކި ސްކީމެއް އޮތުން މުހިއްމުކަމަށް ބައެއް ފަރާތްތަކުން ދެކެއެވެ. މިހާރު އެފަދަ އުސޫލެއް ނޯވެއެވެ.