އައްޑޫ ސިޓީގެ ބޯހިޔާވަހިކަމަށް ހުރަސްއަޅާފައިވަނީ މިހާރުގެ ރައީސް މުއިއްޒު: މެންބަރު ނާޒިލް
ރަގަނޅު ނަތީޖާއެއް ނެރެވޭނީ ކުރާ މަސައްކަތުގައި އިހުލާސްތެރިކަމެއް ހުރެގެން
ރައްޔިތުން މަޖިލީހުގައި އެމްޑީޕީ ގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވާހަކަދައްކަވަނީ
އައްޑޫ ސިޓީގެ ބޯހިޔާވަހިކަމަށް ހުރަސްއަޅާފައިވަނީ މިހާރުގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކަމަށް ދިވެހިރައްޔިތުން ޑިމޮކްރެޓިކް ޕާޓީ (އެމްޑީޕީ) ގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެއެވެ.
ހޯމަ ދުވަހު ކުރިއަށް ގެންދިޔަ ރައްޔިތުން މަޖިލިސް ޖަލްސާގައި ސަރުކާރުގެ ފަރާތުން މާފަންނު މެދު ދާއިރާގެ މެންބަރު އަސްމާ ރަޝީދު ހުށަހަޅުއްވާފައިވާ ބޯހިޔާވަހިކަމުގެ ބިލަށް މެންބަރު ނާޒިލް ވިދާޅުވީ، ބިލު ވަރަށް ރަގަނޅު ކަމަށާއި، ނަމަވެސް ރަގަނޅު ނަތީޖާއެއް ނެރެވޭނީ ކުރާ މަސައްކަތުގައި އިހުލާސްތެރިކަމެއް ހުރެގެން ކަމަށެވެ.
އައްޑޫ ސިޓީގެ ބޯހިޔާވަހިކަމަށް އިޝާރާތް ކުރައްވައި މެންބަރު ނާޒިލް ވިދާޅުވީ އެސިޓީގައި އަޅަން ނިންމި 1100 ފްލެޓުގެ ތެރެއިން 700 ފްލެޓު ހުޅުމާލެ ބަދަލުކޮށްފައިވަނީ މިހާރުގެ ރައީސް މުއިއްޒު ހައުސިން މިނިސްޓަރު ކަމުގެ މަގާމުގައި ހުންވައިގެން ކަމަށެވެ.
ގާނޫނު އޮތް ކަމުގައި ވިޔަސް އިހުލާސްތެރިކަމެއް ނެތިއްޔާ އެ ރައްޔިތަކަށް ފައިދާވާނެ ތަނެއް މިވީ ތަނަކަށް ފެނިފައިނެތް. މިހާރުގެ ރައީސުލްޖުމްހޫރިއްޔާ ޑރ.މުއިއްޒުގެ ވަޒީރުކަމުގައި އެބޭފުޅާ ހައުސިން މިނިސްޓްރީގައި ހުންނަވައިގެން އައްޑޫ ސިޓީއަށް ލިބިފައި އޮތް 1100 ފްލެޓު ތެރެއިން 700 ފްލެޓު ހުޅުމާލެއަށް ބަދަލު ކުރި ކުރުމަކީ އައްޑޫ ސިޓީގެ ބޯހިޔާވަހިކަމަށް އަދިއަދަށް ހަމަޖެހުމެއް ނުލިބި އޮތް މައްސަލައެއް. އެއީ އޭރު އެބޭފުޅާ ކަންތައް ކުރައްވަން ހުރިހާ އާރާބާރުގައި ވަޒީރު ކަމުގައި ހުރެމެ އެބޭފުޅާ ކަންތައް ކުރެއްވި ގޮތް. މިއަދު ރައީސުލްޖުމްހޫރިއްޔާ ކަމުގައި ހުރެ ކިހިނެތްތޯ މުޅި ދިވެހިރާއްޖޭގެ ހުރިހާ ރައްޔިތުންނާ ދޭތެރޭގައި ކަންތައް ކުރައްވާނީ. މިއީ އަޅުގަނޑުމެންނަށް އުފެދޭ ސުވާލެއް.އެމްޑީޕީގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
މެންބަރު ނާޒިލް މިމޭރުމުން ވާހަކަދެއްކެވުމުން ހުޅުދޫ ދާއިރާގެ މެންބަރު މުހައްމަދު ޝާހިދު ނިޒާމީ މައްސަލައެއް ނަންގަވައި ވިދާޅުވީ، މެންބަރު ނާޒިލް ދައްކަވަމުން ދަނީ ނިޒާމާ މުޅިން ހިލާފަށް ދޮގު ވާހަކަތަކެއް ކަމަށެވެ. ކުރީގެ ރައީސް އަބްދުﷲ ޔާމީންގެ ސަރުކާރުގައި އައްޑޫ ސީޓީގައި އަޅަން ނިންމި 1500 ހައުސިން ޔުނިޓްގެ ތެރެއިން 750 ހައުސިން ޔުނިޓް ހުޅުމާލެއަށް ބަދަލުވެގެން ދިޔައީ އީވައިސީން ނިންމި ނިންމުމެއްގެ ސަބަބުން ކަމަށެވެ. އަދި އެއީ އޭރުގެ ހައުސިން މިނިސްޓަރު އަދި މިހާރުގެ ރައީސް މުއިއްޒުގެ ނިންމެވުމެއް ނޫން ކަަމަށް މެންބަރު ޝާހިދު ވިދާޅުވިއެވެ.
މެންބަރު ޝާހިދު ވާހަކައަށް ތާއީދު ކުރައްވައި، މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ މި މައްސަލާގައި އެބޭފުޅާ ބަހުސް ނުކުރައްވާ ކަމަށެވެ. ނަމަވެސް އެކަމަކީ ރައްޔިތުންގެ މަޖިލީހުން ގެނައި ބަދަލާއެކު ހިނގާ ދިޔަ ކަމެއް ކަމަށެވެ.
ނަމަވެސް މި ދެބޭފުޅުންގެ ވާހަކަތަކަށް މެންބަރު ޏާޒިލް ވަނީ ރައްދު ދެއްވާފައެވެ.
މެންބަރު ނާޒިލް ވިދާޅުވީ މެންބަރު އަސްމާ ހުށަހެޅުއްވި ބިލުގައި މިކަންތައްތައް ފުރިހަމަ ކޮށްދޭން ބޭނުންވާނަމަ އެސަރުކާރަކަށް އެކަން ކޮށްދެވޭނެ ހުރިހާ ގޮތެއް މި ބިލުން ފަހިކޮށްދޭ ކަމަށެވެ. ނަމަވެސް މި މަސައްކަތް ކުރުމުގައި އިހުލާސްތެރިކަން ބޭނުންވާ ކަމަށް މެންބަރު ނާޒިލް ވިދާޅުވިއެވެ.
އޭރު ވެސް ކޯއްޗަކަށް ބަލާފަތޯއޭ އެ ބަދަލު ގެނައީ. ވަޒީރު އެހުރިހާ ބާރާއާރުގައި ހުރެމެ، އެގެނައި ބަަދަލު އައްޑޫ ސިޓީއަށް ބޯހިޔާވަހިކަން އަދިވަސް މިއަދާ ހަމައަށް ކުރިއަށް ނުދޭ. މިހާރު ވެސް ހިތަދޫގައި 200 ފްލެޓު އަޅަން ހަމަޖެހިފައި އެއޮތީ. އަދި ބިންގާ އަޅާ ނުލެވޭ ރަނގަޅަށް. މި ފަސް އަހަރުގެ ދައުރު ނިމިގެންދާއިރު ވެސް އަޅުގަނޑު ގަބޫލުކުރާ ގޮތުގައި ނުނިމޭނެ. އިސްކަމެއް ނުދެވޭ. ތަރުތީބެއް ނެތް. އެއްވެސް ތަރުތީބެއް ނެތް. ރާއްޖޭގެ އެކި ދިމަދިމާލުގައި ބޯހިޔާވަހިކަމޭ ކިޔައިގެން ރަށްރަށަށް އަރާ މޮޅެތި ވާހަކަ ދައްކަނީ. ކުރެވޭ ކަމެއް ނެތް ފެންނާކަށްއެމްޑީޕީގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
މެންބަރު ނާޒިލް ވިދާޅުވީ އައްޑޫ ސިޓީއަށް ބޯހިޔާވަހިކަން ވަރަށް ބޮޑަށް ބޭނުންވާ ކަމަށެވެ. އެކަމަށް އިސްކަންދޭން ޖެހޭ ކަމަށާއި، ނަމަވެސް މިސަރުކާރުގައި ބޯހިޔާވަހިކަމުގެ އަމަލީ އެއްވެސް މަސައްކަތެއް ކުރިއަށް ނުދާ ކަމަށް މެންބަރު ނާޒިލް ވިދާޅުވިއެވެ.
