ޓެރަރިޒަމްގެ އަމަލެއް ރާވައި ހިންގައިފާނެކަމުގެ އިންޒާރުދެމުންދާކަމަށް ތުހުމަތު ކުރެވޭ ކ. މާލެ، ވ. ދެލްވައްތަ، ހޫދު މުޙައްމަދު ޒާހިރު ޝަރީއަތް ނިމެންދެން ބަންދު ކުރުމަށް ކްރިމިނަލް ކޯޓުން އަމުރުކޮށްފިއެވެ.

ކްރިމިނަލް ކޯޓުގެ ގާޒީ ދީބާނާޒް ފަހުމީ މި އަމުރު ނެރުއްވާފައިވަނީ 19 އޭޕްރީލް 2022 ގައި ބޭއްވުނު ބަންދާމެދު ގޮތެއް ނިންމުމުގެ އަޑުއެހުމުގައެވެ.

އޭނާ ބަންދުކުރުމަށް އަމުރުކުރައްވާފައިވަނީ މުޖުތަމައުގެ ސަލާމަތަށް ނުރައްކާ ވެދާނެކަމަށް ބަލާފައެވެ. އެގޮތުން އޭނާގެ މައްޗަށް ތުހުމަތު ކުރެވޭ ކުށް އޭނާ ކުރިކަމަށް ބުރަވެވޭ މިންވަރަށް ހެކި ލިބިފައިވާކަމަށް އަމުރުގައި ބަޔާން ކުރައްވާފައިވެއެވެ. މި މައްސަލައަކީ މިހާރު ޕްރޮސެކިއުޓަރ ޖެނެރަލް އޮފީހުން ދައުވާ އުފުލައި، ކްރިމިނަލް ކޯޓަށްވެސް ހުށައެޅިފައިވާ މައްސަލައެކެވެ.

ބަންދާމެދު ގޮތެއް ނިންމުމަށް ބޭއްވި އަޑުއެހުމުގައި ހޫދުގެ ފަރާތުން ވަނީ އޭނާގެ މައްޗަށް ކުރެވޭ ތުހުމަތުތައް ދޮގުކޮށްފައެވެ. އޭނާ ބުނެފައިވާ ގޮތުން އޭނާއަކީ މައުލޫމާތު ހޯދާ ހިތްވާ މީހަކަށްވާތީ، އޭނާގެ ފޯނުގައި އެކި މައުލޫމާތު ހުރެދާނެއެވެ.

އެހެންނަމަވެސް، އޭނާއަކީ އައިސިސް ފަދަ ޖަމާއަތެއްގެ މެމްބަރެއްކަމަށް ބަލަންޖެހޭ އެއްވެސް ސަބަބެއް ނެތްކަމަށް އޭނާގެ ފަރާތުން ވަނީ ބުނެފައެވެ.

މި މައްސަލައާ ގުޅިގެން އޭނާގެ މައްޗަށް ދައުވާ އުފުލާފައިވާއިރު، ޓެރަރިޒަމާ ގުޅުންހުރި 5 ދައުވާއެއް ވަނީ އުފުލާފައެވެ. އެގޮތުން އޭނާގެ ފޯނުން ސޯޝަލް މީޑިއާގެ އެކި އެކައުންޓްތައް ބޭނުންކޮށްގެން ޓެރަރިޒަމްގެ ޢަމަލުތަކަށް ހިތްވަރުދީ، މީހުންނަށް އަނިޔާ ދިނުމަށާއި، މީހުން މެރުމަށާއި، ތަންތަނަށް ގެއްލުންދީ ޢުދުވާނީ ހަމަލާތައް ދިނުމަށް ގޮވާލާފައިވާކަމަށް ޕީޖީ އޮފީހުން މައުލޫމާތު ދެއެވެ.

ޕީޖީ އޮފީހުން މައުލޫމާތު ދޭ ގޮތުގައި ހޫދު މުޙައްމަދު ޒާހިރުއާ ގުޅޭ މަޢުލޫމާތު ދިވެހިރާއްޖެއާ ޙިއްޞާކޮށްފައިވަނީ ބޭރުގެ އިންޓެލިޖެންސް އޭޖެންސީތަކުންނެވެ. މި މައްސަލައިގެ ތަޙުޤީޤަށް ބޭރުގެ އެކި ޤައުމުތަކުގެ އިންޓެލިޖެންސް އޭޖެންސީތަކާއި، ތަޙުޤީޤީ އިދާރާތަކުގެ އެހީތެރިކަން ލިބިފައިވާކަމަށްވެސް ޕީޖީ އޮފީހުން ބުނެއެވެ.