ޓެރަރިސްޓް ގަތަރު އޯކޭއެއް ނޫން، ގަތަރާ ވިޔަފާރިކޮށްގެން ލިބޭ ޑޮލަރު އޯކޭ!

އިސްލާމީ ޤައުމެއް ކަމުގައިވާ ގަތަރާއެކު އޮންނަ ސިޔާސީ ގުޅުން ރާއްޖެއިން ކަނޑާލީ ހަމަ ކުއްލިއަކަށެވެ. އެގުޅުން އިތުރަށް ވަރުގަދަ ކުރުމަށްޓަކައި ދެ ޤައުމުގެ ދެމެދުގައި އޮންނަ އެގުޅުން އިތުރަށް ބަދަހިކޮށް ވަރުގަދަ ކުރުމަށްޓަކައި މަޝްވަރާތައް ކުރެވުނުތާ 13 ގަޑިއިރު ކިރިޔާ ހަމަވިތަނާއެވެ. ހަމަ އެހެންމެ މުސްލިމް ޤައުމެއް ކަމުގައިވާ އިރާނާއެކު އޮންނަ ސިޔާސީ ގުޅުން ވެސް ކަނޑާލީ ދެޤައުމުގެ ދެމެދު އޮންނަ ގުޅުން އިތުރަށް ހަރުދަނާ ކުރުމަށްޓަކައި ވާހަކަތައް ދެކެވުނުތާ ކުޑަ ދުވަސްކޮޅެއްގެ ތެރޭގައެވެ.

ރައީސް ޔާމީންގެ ރަން ބުއްދިއަށް ފެނިވަޑައިގެން އެކަން ކުރެއްވި ސަބަބުތަކުގެ ގޮތުގައި ސަރުކާރުގެ ވަޒީރުން ދައްކަވަމުން ގެންދެވީ ނުރައްކާތެރި ޓެރަރިޒަމުން ސަލާމަތް ވުމަށް ކަމަށެވެ. ޓެރަރިޒަމަށް ވާގިވެރިވާ ޤައުމު ތަކަށާއި އެފަދަ ޖަމާއަތްތަކަށް ހިތްވަރުދީ އެފަރާތްތަކަށް އެހީވާތީ އެމީހުންނާ އެކަހެރިވުމަށް ކަމަށެވެ. އެމީހުންގެ އެނުބައި ކަންކަމުގެ ސަބަބުން މުޅި ދުނިޔެއަށް ކުރާނެ ނޭދެވޭ އަސަރުން ސަލާމަތް ކުރުިމަށްޓަކައި އެޤައުމތައް ހަމަމަގަށް އެޅުވުމަށެވެ. އެގައުމުތަކާއި ގުޅުން ކަނޑާލައިގެން އެގައުމުތަކަށް ދަތިކުރުމުގެ ފިޔަވަޅު އެޅުމަށެވެ. އެގައުމުތައް އިސްލާހު ކުރުވުމަށޯލައެވެ.

އިއްތިފާގުން ނަމަވެސް ދެފަހަރު ވެސް މިދިމާވީ ސައޫދީން އެގަުއމުތަކާ ގުޅުން ކަނޑާލި ވަގުތާއެވެ. ސައޫދީން ހަމަ ކަނޑާލާއިރަށް ރާއްޖެއިން ވެސް އޭގެ މޯހިރުން ނުކުމެ ހަމަ އެގޮތަށް އަމަލުކުރަނީއެވެ. އިރާނާ ގުޅުން ކަނޑާލީ ވެސް ހަމަ އެބީދައިންނެވެ. ސައުދީ އަށް ކަމުނުދިޔުމުން ރާއްޖެ އަށް ވެސް ހަމަ ކުއްލިއަކަށް އިރާން ގޯސްވީއެވެ. ދުނިޔޭގެ އެހެން ޤައުމުތަކަށް ބެލުމެއް ނެތިއެވެ. ފަހަރުގައި ހަޤީގަތުގައި ވެސް އެއީ ހަމަ އިއްތިފާގަކަށް ވެދާނެއެވެ. އެއީ ރާއްޖޭގެ ބަޖެޓް ފޫބައްދަން ނުވަތަ މުސާރަ ދޭނެ ގޮތެއް ނެތިގެންދޭ ވަގުތީ ފައިސާ ކޮޅަކަށް ކުރާކަމެކޭ ބުނާކަށް ނެތީމެވެ. ވިއްކާލަން އުޅުނު ކަމަށް ބުނާ އަތޮޅުގެ ޑީލް އަނބުރާ ގެނައުމަށް ކުރާ ކަމެކޭ ބުނާކަށް ވެސް ނެތީމެވެ. ފަހަރެއްގައި ވެސް އެފަދަ ކުށްހީއެއް ކުރާކަށް ނެތީމެވެ. އަމަށަކުން މިއުޅެނީކީ އެވާހަކަ ދައްކައިގެން އަނގަ ވާޅު ކުރާކަށް ވެސް ނުމެ ނޫންމެއެވެ.

ސަރުކާރުން މިފަހަރު ގުޅުން ކަނޑާލީ އާދައިގެ ޤައުމަކާއެއް ނޫނެވެ. ރާއްޖެއަށް ވަރަށް ގިނަ ގޮތްގޮތުން އެހީވެދޭ ޤައުމަކާއެވެ. ޚާއްޞަކޮށް ވިޔަފާރީގެ ބޮޑެތި ގުޅުންތަކެއް އޮތް ޤައުމަކާއެވެ. ރާއްޖޭގެ މުއާސަލާތީ އެއްކުންފުނި އުރީދޫއަކީ ޤަތަރު ކުންފުންޏެކެވެ. ރާއްޖެއަށް އެންމެގިނަ ފަތުރުވެރިން ގެންނަ އެއް އެއަރލައިނަކީ ޤަތަރުގެ އެއަރލައިނެކެވެ. މިހެންގޮސް ކިޔާނެ ކަމެއް ނެތެވެ. ރާއްޖެއާއި ގަތަރާ ދެމެދު ވަނީ އިޤްތިސޯީ ގުޅުމުގެ އިތުރުން ވިޔަފާރީގެ އެތައް ގުޅުމަކުން ގުޅި ލާމެހިފައެވެ. މިސަބަބަށް ޓަކައި ރައްޔިތުންނަކަށް މަޑަކުން ނުތިބެވުނެވެ. ހަމަހިމޭނުން ތިބޭކަށް ބޭނުމެއް ނުވިއެވެ. އެހެންކަމުން ކާޅުގޮވާހެން އެވާހަކަތައް ގޮވަން ފެށިއެވެ. އެކަމުން ޢާއްމު ރައްޔިތުންނަށް ލިބޭނެ ގެއްލުމުގެ ވާހަކަ އެންމެން އެއްފަހަރާ ދައްކާން ފެށިއެވެ. ސޯޝަލް މީޑިޔާ ހާޑްވެގެން ގޮސް އެއްކޮށް ފްލަޑްވިއެވެ.

އިސާހަިތަކު ސަރުކާރަށް ކެތްކުރެވޭވަރެއް ނުވިއެވެ. ރައީސް އޮފީހުގައި މާސިންގާހާ ބޮޑު ޕްރެސްކޮންފަރެންސެއް ބާއްވައިފިއެވެ. ބޮޑު ސިންގާ ދެފިރިހެނަކު އަރާވަޑައިގެން ވަރުގަދަ ވާހަކަތަކެއް ދައްކަވައިފިއެވެ. ދައުލަތުގެ ބަންޑާރަނައިބާ ފޮރިންމިނިސްޓަރ އެޕްރެސްކޮންފަރެންސް ނިމެންދެން ވެސް ރައްޔިތުންނަށް ވިސަންއިދެވޭތޯ އުޅުއްވީ ހަމަ އެންމެ ކަމެކެވެ. ސިޔާސީ ގުޅުން ކަނޑާލިއަސް ވިއަފާރީގެ ގުޅުން ކަނޑާނުލާ ވާހަކައެވެ. އެގުޅުންތައް ދެމިއޮންނާނެ ވާހަކައެވެ. މާލޫދު ޅެންބައެއްހެން ފަށަފަށާފައި ނަގަނަގާ ދެއްކެވީ މުޅިންވެސް އެވާހަކައެވެ. އެކަން އަދިވީ މާހެއްވާ ކަމަކަށެވެ. ދުނިޔޭގައި ނެތްވަރުގެ ބޮޑު އިލްޒާމެއް ބޮލުއަޅާފައި ސިޔާސީ ރަހުމަތްތެރިކަމުގެ ގުޅުން ކަނޑާލި ބަޔަކާ އެފަދަ ވިޔަފާރީގެ ގުޅުމެއް ނުބާއްވަފާނެކަން އެވެރިންނަށް ރޭކާ ނުލީތީއެއް ނޫނެވެ. އެވަރަުގެ ބޮޑު ދެރައެއް ދީ އެއޮއް މުއްސަނދި ގަތަރު ރާއްޖެއިން ގުޅުން ކަނޑާލީތީ ބަނޑަށް ޖެހިދާނެތީއެއް ވެސް ނޫނެވެ. ދިވެހި ސަރުކާރުން ފައިސާއަށް ބޫތުކައިފާ ހުރިވަރު ފެނުނީތީއެވެ. ކޮންމެ ބަޔަކު އަތުންވެސް ފައިސާ ލިބުނީމާ އޯކޭކަން އެނގުނީތީއެވެ. ކޮންމެ ގޮތަކަުން ވެސް ފައިސާ ބޭނުންވާކަން ހާމަވީތީއެވެ. ހަލާލެއް ހަރާމެއް ބެލުމެއް ނެތި އެވެ. ރައީސް ބޭފުޅާ ވިދާޅުވާ ފަދައިން ހޯދާ އާމްދަނީއަކީ ހަލާލުތޯ ހަރާމުތޯ ޚުދު ތިމާގެ އަނބިމީހާ ވެސް ނާހާނެއޭ ބުނާ ފަދައިންނެވެ. އެކަމަށްޓަކައި ކޮންމެފަދަ ކަމެއް ވެސް ކޮށްފާނެ ބައެއްކަން އެނގުނީތީއެވެ. ނާފަހެ، އެހެން ނުބުނެވެންވީ ސަބަބެއް ނެތެވެ. ގުޅުން ކަނޑާލީ ނުރައްކާތެރި ޓެރަރިސްޓް ޤައުމަކަށް ވީތީއެވެ. ނުވަތަ އެފަދަ ފަރާތްތަކަށް ވާގިވެރިވާ ޤައުމަކަށް ވީތީއެވެ. އެކަމަކު އެވަރުގެ ބޮޑު ޓެރަރިސްޓް ގައުމަކާ ވިޔަފާރި ކުރަން އޯކޭއެވެ. އެވެރިންގެ އަތުން ލިބިދާނެ ވިޔަފާރި ފައިދާ އޯކޭވީތީއެވެ.

ބަލަގަ ތިޔަ ވިދާޅުވެވޭ އެއްޗެއް ހަމަ އެނގިވަޑައި ނުގަންނަވަނީތޯއެވެ. މީހަކުވާ ހަލާކެއް ނުވާނެ ހެއްޔެވެ. މަސްތުވާތަކެތި ވިއްކާތީ އެފަދަ މީހަކާ އޮންނަ ރަހުމަތްތެރިކަމުގެ ގުޅުން ކަނޑާލާފައި އޭނާއާ އެކު އޭގެ ވިޔަފާރިކުރުން އޯކޭއޭ ބުނުމެވެ. ތަންތަން ސުންނާފަތި ކުރާ ނުރައްކާތެރި ބޔަކާ ރަހުމަތްތެރިކަމުން އެއްކައިރިވެލާ އެވެރިން ވިއްކާ ވަގު ހަތިޔާރުތަކުން ލިބޭ ނަފާވެރިކަން އޯކޭކަމުގެ ވާހަކައެވެ. ނޫންނަމަ އެއީ އަނބިމީހާ އުޅޭލެއް ގޯސްވެގެން އޭނާ ވަރިކުރިއަސް އޭރުއޮތް ގުޅުން ނަހަމަ ގޮތުގައި ބޭއްވުން ކަހަލަ ކަމެކެވެ. ނޫނޭވާ ތިޔައީ ދެން ފުކެއް ބޮޑުވަރެވެ. ފައިސާއަށް މަރުދަން ޖެހުނަސް ތިޔައީ ބޮޑުވަރެކެވެ. ސައޫދީ ފަހަތުން އެކަމާ ނުވެސް ބެހޭ ޤައުމަކުން ގަތަރާ ގުޅުން ކަނޑާލީ ފައިސާގެ ދަހިވަތިކަމުގައޭ ބުނެ މީހުން ދައްކަމުންދާ ވާހަކަ އަދި މިއުޅެނީ ކަނޑައިގެން ނުގޮހެވެ. ގުޅުން ކަނޑާލީ ގަތަރަކީ ޓެރަރިސްޓް ޤައުމަކަށް ވެގެންނެވެ. އަދި ތިޔައުޅެނީ އެކަމުގެ ރަސްމީ ލިޔުން އެޤައުމަށް ނޭރުވިއެވެ. ޓެރަރިސްޓުންގެ އަތުން ހަތިޔާރު ގަނެ ވިއްކައިގެން އޭގެ ނަފާވެރިކަން ހޯދުން އޯކޭ ވީތީއެވެ. ގަތަރު އޯކޭއެއް ނޫނެވެ. ޓެރަރިިސްޓަކަށް ވީތީއެވެ. އެކަމަކު އެމީހުންނާ ވިޔަފާރިކުރުން ރަނގަޅެވެ. "ޓެރަރިސްޓުންނާ" އެކު ވިޔަފާރިކޮށް އެވިޔަފާރިން ލިބޭ ނަފާވެރިކަން އޯކޭއެވެ.