ކުޑައިރު ދަރިފުޅަށް ހެޔޮ މަގު ދައްކަނީ މައިންބަފައިންނެވެ. އިނގިލީގައި ހިފައި، ހެވާ ނުބައި ވަކިކޮށްދެނީ އެ މައިންބަފައިންނެވެ. އެހެންނަމަވެސް އެ މައިންބަފައިން މުސްކުޅިވުމުން އެމީހުންނާއި މެދު ވެވޭ އިހުމާލު ބޮޑެވެ. އެމީހުން ބެލުން ދަރިންނަށް ވަނީ ގިނަ ފަހަރަށް ބޮޑު ވޭނަކަށެވެ. މުސްކުޅިވެފައި ތިބޭ މައިންބަފައިންނަކީ އެއްވެސް ބަޔެކޭ ހީނުކުރެވޭ ފަހަރުވެސް އާދައެވެ. އެމީހުންނަށް ދަރިންގެ އަޅާލުމާއި އޯގާތެރިކަން އެންމެ ބޭނުންވާ ދުވަހު އެމީހުން ބާކީކޮށް، ނިކަމެތިކޮށް، އެއްލާލައެވެ.
ކުޑައިރު އިނގިލީގައި ހިފައިގެން އެމީހުން އަހަރުމެންނަށް މަގު ދައްކައެވެ. މަގުން ކައްސާލައިފިނަމަ ހެޔޮ މަގަށް އަނބުރާ ރުޖޫއަވަންދެން، އަލިމަގު ދައްކާ އެމަގަށް ދިޔުމަށް ހިތްވަރުދެއެވެ. އެކަމަކު މިއަދު އެމީހުން އަހަރުމެންގެ އިނގިލީގައި ހިފަން ބޭނުންވުމުން، އެ އިނގިލި ދިއްކޮށް ނުލެވޭތާ އެމީހުން ދުނިޔޭގެ ދިރި ތިބިތޯވެސް ބަލާނުލެވެއެވެ.
ސަރުކާރުން އެމީހުންނަށް ދޭ ފައިސާގެ ދަހިވެތި ކަމުގައި އެމީހުންނަށް ގޭގެ ކުޑަކޮޓަރިން ޖާގަ ދޭ ތަން ވެސް އެބަ ފެނެއެވެ. މިގޮތަށް އެމީހުންނަށް ލިބޭ ފައިސާގައި އެމީހުން ބަލަހައްޓަމުންދާއިރު ވެސް އެމީހުންނާއި ހިނިތުންވުމަށްފަހު ހިތްހެޔޮކަމާއެކު ބަހެއް ނުބުނެވޭތާ، ބުނެލާ ރަހުމްކުޑަ ބަސްތަކުން އެމައިންބަފައިންގެ ހިތްފަޅައިގެންދެއެވެ.
ކަންމިހެން ހުރިއިރު ދައުލަތުގެ ބެލުމުގެ ދަށަށް ނަގާ މީހުންގެ އަދަދުވެސް މަދެއް ނޫނެވެ. އެގޮތުން އިހުމާލުވެގެން ޚާއްސަ އެހީއަށް ބޭނުންވާ މީހުންގެ މަރުކަޒަށް ނަގާ މީހުންނާއި އާއިލާއިން ނުބަލައިގެން އެތަނަށް ނަގާ މީހުންގެ އަދަދު ގިނައެވެ. ގިނަ ފަހަރަށް އެތަނަށް އެމީހާ ލުމަށްފަހު، އެމީހާގެ ހާލު ބަލާވެސް ނަހަދައެވެ. އެމީހާ އެދިގެން އާއިލާއަށް ގުޅަން މަސައްކަތް ކުރިޔަސް ގިނަ ފަހަރަށް ގުޅޭތަނެއްވެސް ނާދެއެވެ. ގިނަފަހަރަށް މަރުކަޒަށްލުމަށްފަހު އާއިލާއިން ހަވާލުވާ މީހުންގެ އަދަދު މަދުކަމަށް ވެސް ސަރުކާރުން ބުނެއެވެ.
ހަމައެއާއެކު، މުސްކުޅިވެފައި ތިބޭ މައިންބަފައިން ދަރިން ދެކިލާ ހިތުން، އެމީހުންނާއި ވާހަކަދައްކާ ހިތުން ފޯނު ކުރިޔަސް އެންމެ ކުޑަމިނުން އެ ފޯނަށް ޖަވާބު ދެވޭ ތަންވެސް ނާންނަ ފަހަރު ދެއެވެ. މިއީ ހިތާމަވެރިކަމެކެވެ. މި މައުޟޫއަށް މި ރިޕޯޓް ލިޔަމުންދާއިރު ހަނދާންވަނީ ހަމަ އެންމެ ވާހަކައެކެވެ. އެއީ ޚާއްސަ އެހީއަށް ބޭނުންވާ މީހުންގެ މަރުކަޒަށް އެމީހާ ވެއްދުމަށްފަހު ދެން ނެރެން ޖެހެނީ އެމީހާގެ ސަންދޯއް ކަމަށް ސަރުކާރުން ބުނި ވާހަކައެކެވެ.
މުސްކުޅިވެފައި ތިބޭ މައިންބަފައިން މިއަދު ދުނިޔޭގައި ތިބިއިރު އެމީހުންގެ އަގުވަޒަން ކުރަން އެބަޖެހެއެވެ. އެމީހުންނާމެދު ހިތްހެޔޮކަމާއި ލޯތްބާއެކު ހިތަށް އެބަޖެހެއެވެ. އެހެންނޫނީ ފަހުން ދެރަވިޔަސް، ގެއްލުނު ވަގުތެއް އަނބުރާ ނުލިބިދާނެއެވެ. ދުނިޔެ ދޫކުރާ ފަހުން އެމީހުންނާމެދު ކަންތައް ކުރެވުނު ގޮތުގެ މައްޗަށް ހިތާމަކުރަންޖެހޭ މިންވަރު އިތުރު ވެގެންވެސް ހިނގައިދާނެއެވެ.
