އެފްއޭކަޕް ފައިނަލްގައި ލިވަޕޫލާ ދެކޮޅަށް ޗެލްސީ

އިނގިރޭސި އެފްއޭކަޕްގެ ފައިނަލްގެ ދެވަނަ ޖާގަ ޗެލްސީ ހޯދައިފިއެވެ. ޗެލްސީ ފައިނަލުން ޖާގަ ހޯދީ ސެމީފައިނަލްގައި 2-0 ން ކްރިސްޓަލް ޕެލަސް ބަލިކޮށްގެންނެވެ.

ޗެލްސީން ސެމީފައިނަލް މެޗުގައި ދެގޯލްވެސް ޖެހީ ދެވަނަ ހާފްގައެވެ. ފުރަތަމަ ގޯލް 65 ވަނަ މިނިޓްގައި ޖެހީ ލޮފްޓަސް ޗީކްއެވެ. ދެވަނަ ލަނޑު މައުންޓް ޖެހީ 76 ވަނަ މިނިޓްގައެވެ. ފައިނަލްގައި ޗެލްސީ ވާދަކުރަން ޖެހޭނީ ލިވަޕޫލާއެވެ. އެފްއޭކަޕް ފައިނަލް ވާނީ ވެމްބްލީ ސްޓޭޑިއަމްގައި މިދެޓީމް މިސީޒަންގައި ކުޅޭ ދެވަނަ ފައިނަލަށެވެ. ލިވަޕޫލުން ވަނީ ފެބްރުއަރީ މަހު ކަޕް ފައިނަލްގައި ޕެނަލްޓީ ޖަހައިގެން ޗެލްސީ ބަލިކޮށްފައެވެ. އެހެންކަމުން ލިވަޕޫލް އަތުން ބަދަލުހިފަން މިއީ ޗެލްސީއަށް ރަނގަޅު ފުރުޞަތެކެވެ.

ލިވަޕޫލް ފައިނަލުން ޖާގަހޯދީ ވާދަވެރި މެންޗެސްޓަރ ސިޓީ 3-2 ން ސެމީފައިނަލްގައި ބަލިކޮށްގެންނެވެ. އެފްއޭކަޕް ފައިނަލް މެޗު ކުޅޭނީ އަންނަ މެއި މަހުގެ 14 ވަނަ ދުވަހުއެވެ.