ވެޓަރެންސް ލީގު: ފުރަތަމަ ފަހަރަށް އީގަލްސް މޮޅުވެއްޖެ

މައިލޯ އެފްއޭއެމް ވެޓަރެންސް ލީގު 2022 ގައި ކްލަބް އީގަލްސް ފުރަތަމަ ފަހަރަށް މޮޅުވެއްޖެއެވެ.

ލީގުގައި މިއަދު ހަވީރު ކުޅުނު މެޗުގައި ބައްދަލްކުރީ ޕޮލިސް ކްލަބް އާއި އީގަލްސްއެވެ. މި މެޗުން އީގަލްސް މޮޅުވީ 3-1 ންނެވެ. މެޗުގެ ހަތަރު ލަނޑު ވެސް ފެނުނީ ދެވަނަ ހާފުގައެވެ. މެޗުގައި ފުރަތަމަ ލަނޑު ޖެހީ ޕޮލިހުންނެވެ. ދެވަނަ ހާފް ކުޅުން ފަށައިގެން ހަތް ވަނަ މިނިޓްގައި ޕޮލިހަށް ލީޑުނަގައިދިނީ މުހައްމަދު ނާޒިމްއެވެ.

އީގަލްސް މޮޅުވީ ފަހު 10 މިނިޓް ތެރޭ ތިން ލަނޑު ޖަހައިގެންނެވެ. މެޗުގެ 50 ވަނަ މިނިޓްގައި އީގަލްސްއަށް ނަތީޖާ އެއްވަރުކޮށްދިނީ އިބްރާހިމް އާރިފްއެވެ. އީގަލްސްއަށް މެޗުގެ 57 ވަނަ މިނިޓްގައި ލީޑު ނަގައިދިނީ މެޗުގެ މޮޅު ކުޅުންތެރިއަކަށް ހޮވުނު އާރިފްއެވެ. މެޗުގެ ފަހު މިނިޓްގައި އީގަލްސްއަށް ތިން ޕޮއިންޓް ކަށަަވަރުކޮށްދިން ލަނޑު ޖެހީ އަހުމަދު ޝަރީފްއެވެ.

މި މޮޅާއެކު އީގަލްސް އޮތީ ލީގުގެ ހަތަރު ވަނައިގައެވެ. އެއީ ތިން މެޗުން ހަތަރު ޕޮއިންޓާ އެކުއެވެ. ޕޮލިސް ކްލަބް ފުލުގައި އޮތީ ހަތަރު މެޗުންވެސް ބަލިވެގެންނެވެ.

ތިން އަހަރުގެ މެދުކެނޑުމަކަށްފަހު މި މުބާރާތް އަލުން ބާއްވަން ފަށާފައިވާއިރު އެފްއޭއެމްއާއި ގުޅިގެން މި ފަހަރުގެ މުބާރާތް އިންތިޒާމް ކުރަނީ ކްލަބް އިވެންޓްސް އިންނެވެ. 40 އަހަރުން މަތީގެ ކުޅުންތެރިންނަށް ޚާއްޞަކޮށްފައިވާ މުބާރާތުގައި ވާދަކުރަނީ 7 ޓީމެވެ. މުބާރާތުގައި ކޮންމެ ޓީމެއްގައިވެސް 35 އަހަރުން މަތީގެ ދެ ކުޅުންތެރިން ހިމަނަން ފުރުޞަތު ލިބެއެވެ.

މުބާރާތުގައި މާދަމާ ހަވީރު ކުޅޭ މެޗުގައި ދިވެހި ސިފައިންގެ ކްލަބް ބައްދަލުކުރާނީ ކްލަބް ގްރީން ސްޓްރީޓްސްއާއެެވެ. މެޗު ފަށާނީ 16:30 ގައެވެ.