އަހަރުގެ މިހާތަނަށް ބައި މިލިއަނަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާކަމަށް ޓޫރިޒަމް މިނިސްޓްރީން ހާމަކޮށްފިއެވެ.

ޓޫރިޒަމް މިނިސްޓްރީން ބުނީ އޭޕްރީލް 14 ވަނަ ދުވަހު ރާއްޖެ އައި ފަތުރުވެރިންނާއެކު މިއަހަރުގެ މިހާތަނަށް ރާއްޖެ އައި ފަތުރުވެރިންގެ އަދަދު ބައި މިލިއަނުން މައްޗަށް އަރާފައިވާކަމަށެވެ. މިއީ ފާއިތުވި 2021 ވަނަ އަހަރުގެ މި މުއްދަތާ އަޅާ ބަލާއިރު ބޮޑު ކުރިއެރުމެކެވެ.

އަހަރުގެ ފުރަތަމަ 4 މަސް ދުވަހުގެ ތެރޭގައި ބައި މިލިއަނަށްވުރެ ގިނަ ފަތުރުވެރިން އައިސްފައިވާއިރު، މިވަގުތު ފަތުރުވެރިން ރާއްޖެ އަންނަ މާކެޓްތަކުގެ ތެރެއިން ޓޮޕް މާކެޓުގެ ގޮތުގައި އޮތީ އިނގިރޭސިވިލާތެވެ. މިއީ ރާއްޖޭގެ ފަތުރުވެރިކަމުގެ ދިގު ތާރީޚުގައި ފަތުރުވެރިކަމުގެ ޓޮޕް މާކެޓުގެ ގޮތުގައި އިނގިރޭސިވިލާތް ހިމެނުނު ފުރަތަމަ ފަހަރެވެ. މިކަން ޓޫރިޒަމް މިނިސްޓްރީންވެސް ވަނީ ފާހަގަކޮށްފައެވެ.

ގިނަ ދުވަސްތަކެއްވަންދެން އެންމެ ގިނައިން ފަތުރުވެރިން އަންނަ ޓޮޕް މާކެޓުގެ ގޮތުގައި އޮތީ ރަޝިއާއެވެ. މިހާރު ރަޝިއާ މާކެޓު އޮތީ ދެވަނައިގައި ކަމަށް ޓޫރިޒަމް މިނިސްޓްރީން ބުނެފައިވެއެވެ.

ކޮވިޑް-19ގެ ހާލަތުގެ ކުރިން އެންމެ ގިނަ ފަތުރުވެރިން ރާއްޖެ އަންނަ މާކެޓުގެ ގޮތުގައި އޮތީ ޗައިނާއެވެ. 2019 ވަނަ އަހަރު ޗައިނާއިން 284،029 ފަތުރުވެރިން ރާއްޖެ އައިސްފައިވެއެވެ. އެހެންނަމަވެސް ކޮވިޑް-19ގެ ހާލަތާއެކު ޗައިނާ ބޯޑަރު ބަންދުކޮށް އެގައުމުން ފަތުރުވެރިން އައުން ވަނީ އެއްކޮށް ހުއްޓިފައެވެ. އެއަހަރު ދެވަނައަށް އެންމެ ގިނަ ފަތުރުވެރިން އައިސްފައިވަނީ އިންޑިއާއިންނެވެ. އިންޑިއާއިން 166،030 ފަތުރުވެރިން އައިސްފައިވެއެވެ. އަދި ތިންވަނައަށް އިޓަލީން 136،343 ފަތުރުވެރިން ވަނީ އައިސްފައެވެ. މީގެ އިތުރުން ޖަރުމަނު އިނގިރޭސިވިލާތް، ރަޝިއާ، ފްރާންސް، އެމެރިކާ، ޖަޕާން އަދި އޮސްޓްރޭލިއާ ހިމެނެއެވެ.

ކޮވިޑް-19 އާއެކު ރާއްޖޭގެ ބޯޑަރު އެއްކޮށް ބަންދުކޮށް ފަތުރުވެރިކަން ހުއްޓިފައި އޮތް މުއްދަތުގައި ސަރުކާރުން މަސައްކަތްކޮށްފައިވަނީ އޮންލައިންކޮށް ރާއްޖެ އިޝްތިހާރުކުރުމުގެ މަސައްކަތް ކުރުމަށެވެ. މިގޮތުން އައު މާކެޓުތަކުގައި ރާއްޖެ އިޝްތިހާރުކުރަން މަސައްކަތްކުރުން ފާހަގަކޮށްލެވެއެވެ. މި މަސައްކަތާއެކު ރާއްޖޭގެ ބޯޑަރު ހުޅުވާލުމާއެކު އެކި ގައުމުތަކުން ފަތުރުވެރިން އަންނަން ފަށައި، މިހާރު ފަތުރުވެރިން އަންނަ މާކެޓުތަކުގެ އެންމެ ކުރީގައި އޮތީ ކޮވިޑް-19 ގެ ކުރިން މި ލިސްޓުގެ ފަހަތުގައި އޮތް މާކެޓުތަކެވެ.

މިއަހަރަކީ މިއީ ރާއްޖޭގެ ފަތުރުވެރިކަމުގެ ރަންޔޫބީލް އަހަރަށް ވުމާއެކު ސަރުކާރުން މަސައްކަތްކުރަމުންގެންދަނީ މިއީ ކާމިޔާބު އަހަރަކަށް ހެދުމަށެވެ. އަދި ފަތުރުވެރިން ގެނައުމަށް އަމާޒު ހިފާފައިވާ އަދަދަށް ފަތުރުވެރިން ގެނައުމަށެވެ.