ރަށްރަށުގައި ޕޮލިސް ޕޯސްޓުތައް ޤާއިމު ކުރާނެ ތަންތަނާމެދު ކައުންސިލްތަކާއެކު މަޝްވަރާ ކުރަމުންދާކަމަށް ދިވެހި ފުލުހުންގެ ޚިދުމަތުން ބުނެފިއެވެ.

ރާއްޖޭގައި ފުލުހުންގެ ޚިދުމަތް ފުޅާކުރުމަށް ކުރަމުންދާ މަސައްކަތާއި، އަވައްޓެރި ފުލުހުންގެ ޚިދުމަތާއި ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ޗީފް އިންސްޕެކްޓަރ އޮފް ޕޮލިސް އަބްދުﷲ ރަޝީދުއާއި، ޗީފް އިންސްޕެކްޓަރ އޮފް ޕޮލިސް ޝިފާން ރަޝީދު ވަނީ މައުލޫމާތުދެއްވާފައެވެ.

ޕްރޮގްރާމްގައި ވާހަކަފުޅުދައްކަވަމުން ޝިފާން ވިދާޅުވީ، 2023 ގެ ނިޔަލަށް މީހުން ދިރިއުޅޭ ހުރިހާ ރަށެއްގައި ފުލުހުންގެ ޚިދުމަތް ފެށުމުގެ އިންތިޒާމުތައް ހަމަޖެއްސުމަށް ޕޮލިސް ޕޯސްޓު ޤާއިމުކުރުމުގެ ކަންކަން މިހާރު ކުރިއަށްދާ ކަމަށެވެ.

އެގޮތުން ފުލުހުން ރެކްރޫޓު ކުރުމާއި، ރަށްރަށުގައި ޕޮލިސް ޕޯސްޓުތައް ޤާއިމު ކުރާނެ ތަންތަން ކައުންސިލާއެކު މަޝްވަރާކުރުމުގެ މަސައްކަތްތައް މިހާރު ކުރިއަށްދާކަމަށް އޭނާ ވިދާޅުވިއެވެ.

މިހާރު ރާއްޖޭގެ 112 ރަށުގައި ފުލުހުން މަރުކަޒުވެގެން ޚިދުމަތް ދެމުންގެންދާކަމަށް ޝިފާން ވިދާޅުވިއެވެ. އޭގެ ތެރޭގައި ސްޓޭޝަންތަކާއި، ޕޮލިސް ޕޯސްޓުތަކާއި ޕޮލިސް ޑެސްކުތައް ހިމެނެއެވެ. އެހެންނަމަވެސް ދެން ހުރި ރަށްރަށުގައިވެސް ފުލުހުންގެ ޚިދުމަތް ފޯރުކޮށްދޭކަން އޭނާ ފާހަގަކުރެއްވިއެވެ.

އަވައްޓެރި ފުލުހުންގެ ޚިދުމަތުގެ ބޭނުންތެރިކަމަށް އަލިއަޅުވާލައްވައި ޕްރޮގްރާމްގައި ވާހަކަފުޅުދައްކަވަމުން އަބްދުﷲ ރަޝީދު ވިދާޅުވީ، އަވައްޓެރި ފުލުހުންގެ ޚިދުމަތުގެ މޮޑެލްއަކީ ކޮންމެ ރައްޔިތަކަށްވެސް ރައްކާތެރިކަން ފޯރުކޮށްދިނުމަށް ފަސޭހައިން ފުރުސަތު ހުޅުވާލެވިގެންދާ މޮޑެލްއެއް ކަމަށެވެ.

އަވައްޓެރި ފުލުހުންގެ އަސާސްތަކުގެ މައްޗަށް އަލިއަޅުވާލައްވާ ރަޝީދު އިތުރަށް ވިދާޅުވީ، "އިތުބާރު، އިހުތިރާމް، އެކުގައި، އަމާން" މިއީ މި ޚިދުމަތުގެ މައިގަނޑު އަސާސްތައް ކަމަށެވެ. އޭނާ ވިދާޅުވި ގޮތުގައި ފުލުހުންގެ ޚިދުމަތަކީ ރާއްޖޭގެ ހުރިހާ ރައްޔިތުންނަށްވެސް ފަސޭހައިން ލިބޭނެ ޚިދުމަތަކަށް ވާން ޖެހޭ ކަމުގައެވެ.

މިހާރު ރާއްޖޭގައި ޕޮލިސް ސްޓޭޝަން ޤާއިމުވެފައިވަނީ 85 ރަށުގައެވެ. މީގެއިތުރުން ދެން ހިމެނެނީ ޕޮލިސް ޕޯސްޓުތަކާއި ޑެސްކުގެ ގޮތުގައި ޚިދުމަތް ދެމުންދާ ރަށްރަށެވެ.