ބްރައިޓަން އަތުން ޓޮޓެންހަމް ބަލިވެއްޖެ، ގަދަ ހަތަރެއްގެ ރޭހުގައި ފަހަތަށް އެޅި ފިޔަވަޅެއް!

ބްރައިޓަން އަތުން ބަލިވެ, އިނގިރޭސި ޕްރިމިއަރ ލީގުގެ ގަދަ ހަތަރެއް ކަށަވަރުކުރަން މުހިއްމު ތިން ޕޮއިންޓް ޓޮޓެންހަމްއަށް ގެއްލިއްޖެއެވެ.

މިވަގުތު ހަތަރު ވަނާގައި އޮތް ނަމަވެސް މިބައްޔާއެކު, ހޮނިހިރު ދުވަހުގެރޭގެ މެޗުތައް ނިމޭއިރުވެސް ޓޮޓެންހަމް ހަތަރުވަނައިން ސޮއްސާލުމުގެ ފުރުޞަތު އެބައޮތެވެ. އެއީ އާސެނަލް މެޗު ކާމިޔާބުކޮށްފިނަމައެވެ. ޓޮޓެންހަމް ހަތަރު ވަނާގައި އޮތީ 32 މެޗުން 57 ޕޮއިންޓާއެކުއެވެ. އާސެނަލް ސައުތްހެމްޓަންއާ ވާދަކުރާއިރު 31 މެޗުން 55 ޕޮއިންޓް ވަނީ ލިބިފައެވެ.

ޓޮޓެންހަމް އަތުން ބްރައިޓަން މޮޅުވީ މެޗުގެ ފަހު މިނިޓްގައި ޓްރޮސާޑް ޖެހި ހަމައެކަނި ލަނޑުންނެވެ. މެޗުން ބްރައިޓަން ކާމިޔާބުކުރީ 1-0 ނެވެ. މެޗުގެ އިތުރު ވަގުތުގައި ނަތީޖާ ހަމަހަމަކުރަން ބާގްވިންއަށް ލިބުނު ފުރުޞަތުގެ ބޭނުމެއް ނުކުރެވުނެވެ. 32 މެޗުން 40 ޕޮއިންޓް ހޯދައިގެން ބްރައިޓަން އޮތީ ލީގު ތާވަލްގެ މެދުގައި, 10 ވަނައިގައެވެ.