އާދިއްތަ ދުވަހުން ފެށިގެން ދޯންޏަކުން 7 ޓަނުގެ މަސް ކިރާ ގޮތަށް މިފްކޯއިން ނިންމައިފިއެވެ.

އެކަމާ ގުޅޭގޮތުން މިފްކޯއިން ބުނީ، ދެކުނުގެ މަސްވެރިކަން އާދަޔާ ޚިލާފަށް ރަނގަޅުވެ، މިފްކޯގެ ފްރީޒިންގ ކެޕޭސިޓީއަށްވުރެ އިތުރަށް މަސް ލިބެމުންދާ ކަމަށެވެ. ވުމާއެކު، މަސްކިރައި، ފްރީޒްކުރުމަށް ވަގުތު ބޭނުންވާތީ، ދިމާވާ ދަތިތައް ހައްލުކުރުމުގެ ގޮތުން, 6 އޭޕްރީލް 2022ން ފެށިގެން މަސް ގަންނަމުން ދިޔައީ ކިއު ތަރުތީބުން ކޮންޓްރޯލްކޮށްގެން ކަމަށެވެ.

އެހެންނަމަވެސް، އައިސް އަޅާފައި ހުރި ދޯނިތަކުގައި ހުރި މަސް ހަލާކުވެދާނެތީ, އަވަސްކުރުމުގެ ގޮތުން, 12 އޭޕްރިލް 2022އިން ފެށިގެން ކޮންޓްރޯލް ކުރުމަކާނުލައި މަސް ކިރުމުގެ މަސައްކަތް ކުރިޔަށް ގެންގޮސް، 16 އޭޕްރީލް 2012ގެ ނިޔަލަށް ކިއު ތަރުތީބުން ހުރިހާ ދޯނިތަކުގެ މަސް ކިރައި ނިމިފައިވާކަމަށް މިފްކޯއިން މައުލޫމާތު ދެއެވެ.

މިފްކޯއިން ބުނާ ގޮތުގައި މަސްބާނާ މިންވަރު އެއްވަރެއްގައި ހުރުމާއެކު، ކެޕޭސިޓީއާ އެއްވަރަށް މެނޭޖްކޮށްގެން ކުރިއަށް ގެންދިއުމަށްޓަކައި، 17 އޭޕްރީލް 2022ން ފެށިގެން, ދޯންޏަކުން 7 ޓަނުގެ މަސް ކިރާގޮތަށް އެ ކުންފުނިން މިހާރު ވަނީ ނިންމާފައެވެ.

މިފްކޯއިން އަބަދުވެސް މަސައްކަތްކުރަމުން ގެންދަނީ މަސްވެރިންނަށް ދެވޭ ޚިދުމަތުގެ ފެންވަރު ރަނގަޅުކުރުމަށާއި އަވަސް ޚިދުމަތް ފޯރުކޮށްދީ، މަސްވެރިންގެ ކަންބޮޑުވުންތައް ބަލައިގަނެ އެކުންފުނިން ދެވޭ ޚިދުމަތަކީ މަސްވެރިންނަށް ފަސޭހަ ޚިދުމަތަކަށް ހެދުމަށް ކަމަށް ވަނީ ބުނެފައެވެ.

މަސް ކިރުމުގައި ދިމާވަމުންދާ ދަތިތަކާއެކު, ކޫއްޑޫގައި އަންގާރަ ދުވަހު އިހުތިޖާޖެއްވެސް ކޮށްފައިވެއެވެ. ރައީސް އޮފީހުން އަންގާރަ ދުވަހުގެ ރޭ ނެރުނު ބަޔާނެއްގައި ބުނެފައިވަނީ، މަސްވެރިންނަށް އެއްބަސްވެވޭފަދަ ގޮތަކަށް ސަރުކާރުން އިމްޕްލިމެންޓޭޝަން ޕްލޭންއެއް ހަދާފައިވާކަމަށެވެ.

މައްސަލަ ހޫނުވެފައިވާއިރު ދާދިފަހުން ފިޝަރީޒް މިނިސްޓަރ ޑރ ހުސައިން ރަޝީދު ހަސަން ވެސް ވަނީ މަސްވެރިންގެ ކަންބޮޑުވުންތައް އަޑު އެއްސެވުމަށް ކޫއްޑޫއަށް ޒިޔާރަތްކުރައްވައި, މަސްވެރިންނާ ބައްދަލުކުރައްވާފައެވެ.