3 އަހަރަށް 2018 ވަނަ އަހަރު ކާޑެއްދޫ އެއާޕޯޓަށް ތެޔޮ ފޯރުކޯށްދޭން ކޮންޓްރެކްޓު ހަވާލުކުރީ ހުއްދަ ނުހޯދާ – އޮޑިޓް

ކާޑެއްދޫ އެއާޕޯޓަށް 3 އަހަރު ދުވަހުގެ މުއްދަތަކަށް ބޭނުންވާ ތެޔޮ ސަޕްލައި ކުރުމުގެ ކޮންޓްރެކްޓު ވަކި ފަރާތަކަށް ހަވާލުކުރި އިރު، އެކަން ކުރުމަށް ޓެންޑަރ ބޯޑަށް ހުށަހަޅައި ހުއްދަ ހޯދާފައި ނުވާ ކަމަށް އޮޑިޓް ރިޕޯޓުން ހާމަވެއްޖެއެވެ.

ޓްރާންސްޕޯޓް މިނިސްޓްރީގެ 2018 ވަނަ އަހަރުގެ މާލީ އޮޑިޓް ރިޕޯޓުގައި ބުނެފައިވަނީ ދައުލަތުގެ މާލިއްޔަތުގެ ގަވާއިދުގެ ބާބު 10 ގެ ޖަދުވަލު 1 ގެ 4 ވަނަ ނަންބަރުގައި ބަޔާންކޮށްފައިވަނީ، ޕްރޮކިއުމަންޓެއްގެ އަގު 2,500,000 (ދެ މިލިޔަން ފަސް ލައްކަ) ރުފިޔާއަށްވުރެ ބޮޑުނަމަ، އެ ކަމެއް ކުރުމަށް ހުއްދަ ދޭނީ ނެޝަނަލް ޓެންޑަރ ބޯޑަށް ހުށަހަޅައި، އެ ބޯޑުގެ ނިންމުމާއި އެއްގޮތަށް އެ އޮފީހުގެ އެންމެ އިސްވެރިޔާ ކަމަށެވެ. ނަމަވެސް، ރީޖަނަލް އެއާޕޯޓްސް އޮފީހުގެ ދަށުން ހިންގާ ކާޑެއްދޫ އެއާޕޯޓަށް 3 އަހަރު ދުވަހުގެ މުއްދަތަށް ބޭނުންވާ ތެޔޮ ސަޕްލައިކުރުމުގެ ކޮންޓްރެކްޓު ވަކި ފަރާތަކާއި ހަވާލުކުރުމުގެ ކުރިން، މި ކޮންޓްރެކްޓަކީ 2,500,000 (ދެ މިލިޔަން ފަސް ލައްކަ) ރުފިޔާއަށްވުރެ ބޮޑު ކޮންޓްރެކްޓެއް ކަމަށް އެނގިފައި ވިޔަސް، މި ކޮންޓްރެކްޓު ހަވާލުކުރުމުގެ ކުރިން ނެޝަނަލް ޓެންޑަރ ބޯޑަށް ހުށަހަޅައި، އެ ބޯޑުގެ ނިންމުން ހޯދާފައި ނުވާ ކަމަށެވެ.

Advertisement

އަދި ކޮންޓްރެކްޓް ހަވާލުކުރާނެ ފަރާތެއް ހޯދުމަށް އާންމުކޮށް އިއުލާންކުރުމުން ޝައުގުވެރިކަން ފާޅުކުރި ފަރާތްތަކަށް ދީފައިވާ މައުލޫމާތު ޝީޓުގައި، ކާޑެއްދޫ އެއާޕޯޓަށް ބޭނުންވާނެކަމަށް އަންދާޒާކޮށްފައިވާ ތެލުގެ އަދަދާއި، އޭރު ކާޑެއްދޫ އެއާޕޯޓަށް ތެޔޮ ގަންނަމުން އައިސްފައިވާ ރޭޓަށް ބަލާއިރު، ކޮންމެ އަހަރަކު 3 މިލިއަން ރުފިޔާއަށްވުރެ ގިނަ ތެޔޮ ކާޑެއްދޫ އެއާޕޯޓަށް ބޭނުންވާނެކަމަށް އަންދާޒާ ކުރެވިފައިވެއެވެ. އަދި މި ކޮންޓްރެކްޓް ހަވާލުކުރާނެ ފަރާތެއް ހޯދުމަށް ކުރި އިއުލާނާއި ގުޅިގެން ހުށަހަޅާފައިވާ އަންދާސީ ހިސާބުތައް ވެސް ހުށަހަޅާފައިވަނީ 2,500,000 (ދެ މިލިޔަން ފަސް ލައްކަ) ރުފިޔާއަށްވުރެ ބޮޑުކޮށެވެ.

މީގެ އިތުރުން، 2018 ވަނަ އަހަރު ކާޑެއްދޫ އެއާޕޯޓަށް ބޭނުންވާ ތެޔޮ ގަތުމަށް 3 މިލިއަން ރުފިޔާ ހަރަދުކޮށްފައިވާކަން ހަރަދު ރިޕޯޓުތަކުން އެނގެއެވެ. ކޮންޓްރެކްޓްގެ މުއްދަތު ކަމަށްވާ 3 އަހަރަށް ބަލާއިރު، މިއީ 9 މިލިއަން ރުފިޔާއަށް އަރާފާނެ ކޮންޓްރެކްޓަކަށް ވާތީ، މިއީ ދައުލަތުގެ މާލިއްޔަތުގެ ގަވާއިދުގައި ބަޔާންކުރާ ފަދައިން ނެޝަނަލް ޓެންޑަރ ބޯޑަށް ހުށަހަޅައި، އެ ބޯޑުގެ ނިންމުމެއް ހޯދަންޖެހޭފަދަ ކޮންޓްރެކްޓެއް ކަމަށް ވަނީ ބުނެފައެވެ.

އޮޑިޓް ރިޕޯޓުގައި ވަނީ ގަންނަން ޖެހޭ ތަކެތި ނުވަތަ ހޯދަން ޖެހޭ ޚިދުމަތުގެ އަގު ދައުލަތުގެ މާލިއްޔަތުގެ ގަވާއިދުގެ ބާބު 10 ގެ ޖަދުވަލު 1 ގެ 4 ވަނަ ނަންބަރުގައި ބަޔާންކޮށްފައިވާ އަގަށްވުރެ (2,500,000 (ދެ މިލިޔަން ފަސް ލައްކަ) ދިވެހި ރުފިޔާއަށްވުރެ ބޮޑުނަމަ، ތަކެތި ނުވަތަ ޚިދުމަތް ހޯދުމުގެ ކުރިން، ނެޝަނަލް ޓެންޑަރ ބޯޑަށް ހުށަހަޅައިގެން އެ ބޯޑުގެ ނިންމުމާއި އެއްގޮތަށް ކުރިއަށް ގެންދިޔުމަށް އިސްލާހުކުރަން ލަފާ ދީފައެވެ.

މި ރިޕޯޓާއި ގުޅިގެން ޓްރާންސްޕޯޓު މިނިސްޓްރީގެ ބަހެއް ހޯދުމަށް ގުޅާލުމުން އެ މިނިސްޓްރީން ޖަވާބެއް ލިބޭ ގޮތެއް ވަނީ ނުވެފައެވެ. އަދި މިރިޕޯޓާއި ގުޅޭ ގޮތުން ރީޖަނަލް އެއާޕޯޓްސް ކުންފުނީގެ މެނޭޖިންގެ ޑިރެކްޓަރ މުހައްމަދު ރިޒުވީ ވިދާޅުވީ އެ މަސައްކަތް ހަވާލުކުރި ފަރާތާއި ކަންތައް ދިޔަ ގޮތުގެ މައުލޫމާތު ހޯއްދެވުމަށްފަހު ހިއްސާކޮށްދެއްވާނެ ކަމަށެވެ.

ކާޑެއްދޫ އެއާޕޯޓަށް ތެޔޮ ފޯރުކޮށްދިނުމަށް ބަޔަކާއި އެއިރު ހަވާލުކުރި އިރު ވެރިކަމުގައި ހުންނެވީ ކުރީގެ ރައީސް އަބްދުﷲ ޔާމީން އެވެ. އަދި އެއިރު ރީޖަނަލް އެއާޕޯޓްސްގެ ވެރިޔަކަށް ހުންނެވީ ޓްރާންސްޕޯޓް މިނިސްޓްރީގެ ޑިރެކްޓަރ ޖެނެރަލް ސާމީ އަގީލްއެވެ. ރީޖަނަލް އެއާޕޯޓްސް ހިންގަމުން އައީ ޓްރާންސްޕޯޓް މިނިސްޓްރީގެ ޑިޕާޓްމަންޓެއްގެ ގޮތުގައެވެ.

ސާމީ އަގީލް އާއި ގުޅޭ ގޮތުން ގިނަ މައްސަލަތަކެއް ފާހަގަކޮށް، އެ މިނިސްޓްރީގެ 28 މުވައްޒަފުންތަކެއް ސޮއިކޮށް ސިވިލް ސަރވިސް ކޮމިޝަނަށް ޕެޓިޝަނެއް ވެސް ހުށަހަޅާފައިވެއެވެ. ސާމީ އަގީލްއާ ގުޅޭގޮތުން ޓްރާންސްޕޯޓް މިނިސްޓްރީގެ މުވައްޒަފުން ހުށަހަޅާފައިވާ މައްސަލަތަކުގެ ތެރޭގައި، އޭނާ މީގެ ކުރިން މަސައްކަތްކުރައްވާފައިވާ މުއައްސަސާތަކުގައި، ކޮރަޕްޝަނާއި ފަސާދައިގެ އެތައް އަމަލެއް ހިންގަވާފައިވާ ބޭފުޅެއްގެ ގޮތުގައި ވަނީ ތުހުމަތުކޮށްފައެވެ.

އަދި ސާމީއާއި ގުޅޭ އެތައް މައްސަލައެއް މީގެ ކުރިން އެންޓި ކޮރަޕްޝަން ކޮމިޝަން (އޭސީސީ) އިން ވެސް ތަހުގީގުކޮށް އޭގެ ތެރެއިން ބައެއް މައްސަލަތަކަށް ދައުވާކުރުމަށް ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވާފައިވާ ކަމަށާއި ބައެއް މުވައްޒަފުންނަށް ބިރުދައްކައި ގާނޫނާއި ހިލާފަށް ބައެއް މުވައްޒަފުންނާ މެދު ފިޔަވަޅު އަޅާފައިވާ ކަމަށް ވެސް ސީއެސްސީއަށް ހުށަހެޅި ޕެޓިޝަނުގައި ވަނީ ފާހަގަކޮށްފައެވެ.