ޓްވިޓަރ ގަތުމަށް ހުށައެޅި ބިޑާ، ޕްރިންސް އަލްވަލީދު ދެކޮޅު

ޓްވިޓަރ ގަތުމަށް އެލޯން މަސްކް ހުށައެޅި ބިޑާ، ސައުދީގެ އެންމެ ބޮޑު އެއް އިންވެސްޓަރ ޕްރިންސް އަލްވަލީދު ބިން ތަލާލް ދެކޮޅުހަދައިފިއެވެ.

އޭނާ އަކީ ޓްވިޓަރގެ އެންމެ ބޮޑު އެއް ޝެއަރ ހޯލްޑަރވެސްމެއެވެ. ޓްވިޓަރގެ އެންމެ ބޮޑު އެއް ޝައަރ ހޯލްޑަރގެ ހައިސިއްޔަތުން އެކަމާ ދެކޮޅުކަން ހާމަކޮށް ޓްވިޓަރގައި އޭނާ ބުނެފައިވަނީ، އެލޯން މަސްކް ހުށައެޅި އަގަކީ އެކަށީގެންވާ އަގެއް ނޫން ކަމަށެވެ.

ޓްވިޓަރ ގަތުމަށް އެލޯން މަސްކް ހުށައެޅި އަގަކީ 43 ބިލިއަން ޑޮލަރެވެ. އޭނާ ބުނީ ކޮންމެ ޝެއަރއަކަށް 54.20 ޑޮލަރު އޭނާ ދައްކާނެކަމަށެވެ.

ޓެސްލާ ކުންފުނީގެ ސީއީއޯ އެލޯން މަސްކްއަކީ ފޯބްސް ޓެލީއިން ދައްކާގޮތުގައި ދުނިޔޭގެ އެންމެ މުއްސަދި މީހާއެވެ.

ޓުވިޓަރ ގަންނަން ހުށައަޅަމުން އޭނާ ބުނެފައިވަނީ، ސޯޝަލް މީޑިއާ ޕްލެޓްފޯމު ޓުވިޓަރއިން ލިބެންހުރި ހަގީގީ މަންފާ ދެނެގަތުމުގެ ގާބިލްކަން ހުރީ އޭނާގެ ކިބައިގައި ކަމަަށެވެ. އަދި މިނިވަންކަމާއެކު ޚިޔާލު ފާޅުކުރުމުގެ ފުރުސަތު އެންމެ އެކަށީގެންވާ ގޮތުގައި ފޯރުކޮށްދޭން ޖެހޭ ކަމަށެވެ.

އެލޯން މަސްކް މިބިޑް ހުށައަޅާފައިވަނީ ފާއިތުވި ހަފްތާގައި އޮތް ޓްވިޓަރގެ ބޯޑް ބައްދަލުވުމަށެވެ. ނަމަވެސް ޓުވިޓަރގެ ޑައިރެކްޓަރުންގެ ބޯޑުގައި އޭނާ ހިމެނެން ބޭނުން ނުވާކަން ހާމަކޮށްފައިވެއެވެ.