އަންނަ ހަފުތާގެ ހޯމަ ދުވަހުން ފެށިގެން ރައްޔިތުންގެ މަޖިލީހުގެ ޖަލްސާތައް އިޝާރާތުގެ ބަހުރުވައިން ގެނެސްދޭނެކަމަށް ރައްޔިތުންގެ މަޖިލީހުގެ އިދާރާއިން ބުނެފިއެވެ.
މިއަހަރަށް ރައްޔިތުންގެ މަޖިލީހުގެ ޖަލްސާތައް ހުޅުވުމަށް ފެބްރުއަރީ މަހުގެ 3 ވަނަ ދުވަހު ބޭއްވި ޖަލްސާވެސް ވަނީ އިޝާރާތުގެ ބަހުރުވައިން ގެނެސްދީފައެވެ. އަދި މިއަހަރު މަޖިލީހުން ކުރާ ބައެއް މަސައްކަތްތައް އިޝާރާތުގެ ބަހުރުވައިން ގެނެސްދޭނެކަން އެއިދާރާއިން ވަނީ މީގެކުރިން ބުނެފައެވެ.
ހޯމަ ދުވަހުން ފެށިގެން ޖަލްސާތައް އިޝާރާތުގެ ބަހުރުވައިން ގެނެސްދިނުމަށް ހަމަޖެހިފައިވާއިރު, އެކަން ކުރިޔަށްގެންދާނީ މަރިޔަމް ފަޒުނީއެވެ. ފަޒުނީއަކީ މީގެކުރިން ގިނަ އިވެންޓްތަކެއް އިޝާރާތުގެ ބަހުރުވައިން ގެނެސްދީފައިވާ ފަރާތެކެވެ. ވަކިން ޚާއްސަކޮށް ކޮވިޑް-19ގެ މައުލޫމާތުތައް ގެނެސްދިނުމުގައި ފަޒުނީ ފެނިގެން ގޮސްފައިވެއެވެ. މިފަހަރު ފަޒުނީ ޖަލްސާތައް ގެނެސްދެމުންދާނީ ރައްޔިތުންގެ މަޖިލީހުގެ މުވައްޒަފެއްގެ ގޮތުގައެވެ.
އިޝާރާތުގެ ބަހުރުވައިން މަޖިލީހުގެ މަސައްކަތްތައް ގެނައުމާ ގުޅޭގޮތުން "ރާއްޖެއެމްވީ"އާ ވާހަކަދައްކަވަމުން ރައްޔިތުންގެ މަޖިލީހުގެ މީޑިއާ އެންޑް ކޮމިއުނިކޭޝަންގެ ޑިރެކްޓަރު ހަސަން ޒިޔާއު ވިދާޅުވީ, އެންމެ ފުރަތަމަ މިގޮތަށް ގެނެސްދޭނީ ޖަލްސާތަކާއި މުހިންމު އިވެންޓްތައް ކަމަށެވެ. ފަހުން ކޮމިޓީތައްވެސް އިޝާރާތުގެ ބަހުރުވައިން ގެނެސްދޭނެކަމަށް ޒިޔާއު ވިދާޅުވިއެވެ.
ރައްޔިތުންގެ މަޖިލީހުން ކުރަމުންދާ މަސައްކަތްތައް ހުރިހާ އެންމެންނަށްވެސް އެނގޭނެ ގޮތަކަށް ފޯރުކޮށްދިނުމުގެ މަސައްކަތުގެ ދަށުން, މަޖިލީހުން ވަނީ މޯލްޑިވްސް ޑެފް އެސޯސިއޭޝަނާއި ބައްދަލުކޮށް އެކަން ކުރެވޭނެ ގޮތްތަކާއި ގުޅޭގޮތުން މަޝްވަރާކޮށްފައެވެ. ރައްޔިތުންގެ މަޖިލީހުން ކުރަމުންދާ މަސައްކަތްތައް އިޝާރާތުގެ ބަހުރުވައިން ގެނެސްދިނުމަށް ނިންމާފައިމިވަނީ މިދިޔަ އަހަރުގެ ޑިސެމްބަރު މަހު ބޭއްވި ޔޫތު ޕާލަމެންޓްގައި ބައިވެރިވި, އަޑުއެހުމުން މަހުރޫމްވެފައިވާ ކުއްޖެއް ކަމުގައިވާ ނާއިޝް, އޭނާފަދަ އަޑުއިވުމުން މަހުރޫމްވެފައިވާ ޒުވާނުންނަށް މަޖިލީހުގެ މަސައްކަތްތައް ދެނެގަނެވޭނެ ގޮތެއް ވާނެތޯ ކުރި ސުވާލަކާ ގުޅިގެންނެވެ.
އެސުވާލަށް ޖަވާބު ދެއްވަމުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އެދުވަހު ވިދާޅުވީ އެކަން ހަމަޖެއްސުމަށް މަސައްކަތްކުރައްވާނެ ކަމަށެވެ.
ރައްޔިތުންގެ މަޖިލީހަކީ ރައްޔިތުންނާ ގުޅުންހުރި ގިނަ މަސައްކަތްތަކެއް ކުރަމުން އަންނަ ތަނެކެވެ. އެގޮތުން ކޮންމެ ހަފުތާއަކުވެސް ތިން ދުވަހު ޖަލްސާތައް ބާއްވާއިރު ކޮމިޓީ ބައްދަލުވުންތައް ހަފުތާގެ ހުރިހާ ދުވަހަކުހެން ކުރިޔަށް ގެންދެއެވެ.
މަޖިލީހުން ކުރާ މަސައްކަތްތައް އިޝާރާތުގެ ބަހުރުވައިން ގެނައުމަށް ނިންމާފައިވާއިރު, އެކި އިދާރާތަކުން ނެރޭ ވީޑިއޯތަކާއި ބައެއް މުހިންމު އެންގުންތަކާއި ނޫސްވެރިންގެ ބައްދަލުވުންތަކާއި ސަރުކާރުން ބާއްވާ މުހިންމު ޖަލްސާތަކާއި އަދި ހުކުރު ޚުތުބާ ފަދަ ގިނަ މީހުން ބަލާ ވީޑިއޯތައް އިޝާރާތުގެ ބަހުރުވައިންވެސް ގެނެސްދެމުންދެއެވެ.
