އަނަސްގެ މަރުގެ ދައުވާ ލިބޭ ޖުނައިޙް އަބްދުﷲގެ ބޭސްފަރުވާގެ ކަންކަމުގައި މައްސަލަތަކެއް ހުރުމާއެކު، ޝަރުތުތަކާއެކު ބަންދުން ދޫކޮށްފައި ހުރި މުއްދަތު އިތުރުކޮށްފިއެވެ.
ޖުނައިޙުގެ ބޭސްފަރުވާގެ ކަންކަމަށް ބަލާއިރު، ކަރެކްޝަންސްގެ ލަސްތަކެއް ހުރިކަން ފާހަގަވާކަން ބަޔާންކޮށް ޝަރުތުތަކާއެކު އޭނާ ބަންދުން ދޫކޮށްލުމަށް ކްރިމިނަލް ކޯޓުންނިންމީ20 ޖެނުއަރީ 2022 ގައެވެ. އެއީ އޭނާ ލޮލުގެ ފަރުވާއަށް ރާއްޖެއިން ބޭރަށް ދިއުމަށެވެ.
މި މައްސަލައިގައި އަންގާރަ ދުވަހު ބޭއްވި ބަންދު މުރާޖައާ އަޑުއެހުމުގައި އޭނާ ލޮލުގެ ފަރުވާގެ ރިވިއުއަށް އަނެއްކާވެސް ރާއްޖެއިން ބޭރަށް ދާން ޖެހޭތީ އޭނާ ބަންދުން ދޫކޮށްލާފައިވާ މުއްދަތު އިތުރު ކޮށްދިނުމަށް ދިފާއުން އެދުނެވެ. ދިފާއީ ވަކީލު ވިދާޅުވި ގޮތުގައި އޭނާގެ ލޯ އިންފެކްޓު ވެފައިވާތީ، ޖަލަށްލުމަކީ އެކަން އިތުރަށް ގޯސްވެދާނެ ސަބަބެކެވެ.
މިހާރު ހެކިބަސްވެސް ނަގާ ނިމިފައިވާއިރު، ބޭސްފަރުވާގެ ކަންކަމަށް ރިއާޔަތް ކުރައްވައި، އަދި އޭނާގެ ޚާއްސަ ޙާލަތަށް ބަލައި ދައުލަތުގެ ސުޕަވިޝަންއެއްގެ ދަށުން ނަމަވެސް އޭނާ ޖަލު ބަންދުން ދޫކޮށްލުމަށް ދިފާއީ ވަކީލު އެދިލެއްވިއެވެ.
އެހެންނަމަވެސް ދައުލަތުން ވަނީ އެކަމަށް އިއުތިރާޒު ކޮށްފައެވެ. އެގޮތުން ބޭސްފަރުވާއަށް ދާން ޖެހުމުން ބަންދަށް ލުއި ދެވިދާނެކަން ދައުލަތުގެ ވަކީލާ ފާހަގަކުރެއްވިއެވެ.
ދައުލަތުގެ ވަކީލާ ވިދާޅުވި ގޮތުގައި އޭނާއަށް ބޭސްފަރުވާއަށް ދިއުމަށް މީގެ ކުރިންވެސް ފުރުސަތު ދެވިފައިވެއެވެ. އަދި އޭނާ ބަންދުން ދޫކޮށްލާފައި ބަހައްޓަން ޖެހޭ ސަބަބެއް މިވަގުތު ނެތްކަމަށް ވަކީލާ ވިދާޅުވިއެވެ.
އެކަމާއި ގުޅިގެން ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ އަލީ ނަދީމް ވިދާޅުވި ގޮތުގައި، ބޭސްފަރުވާއަށް އޭނާ ބަންދުން ދޫކޮށްލީވެސް ކަރެކްޝަންސްއިން އޭނާގެ ފަރުވާއާމެދު އިހުމާލު ވެފައިވާތީއެވެ. އެފަދަ ކަމެއް ތަކުރާރުވުމުގެ ފުރުސަތުވެސް އޮތްކަން ފާހަގަކުރައްވައި ގާޒީ ވަނީ ޝަރީއަތް ނިމެންދެން ބަންދު ކޮށްފައިވާ މުއްދަތު އިތުރު 30 ދުވަހަށް ސަސްޕެންޑް ކުރައްވާފައެވެ.
