އިސްރާއީލުން ދެ ދުވަސްތެރޭގައި ޝަހީދުކޮށްލި ފަލަސްތީނުގެ އާންމުންގެ އަދަދު ހަތަރަކަށް އަރައިފިއެވެ.
މިފަހަރު އިސްރާއީލުން ބަޑިޖަހައި ޝަހީދުކޮށްލާފައިވަނީ އުމުރުން 17 އަހަރުގެ މުހައްމަދު ޒަޚަރްނެހްއެވެ. އޭނާ ޝަހީދުކޮށްލާފައިވަނީ ހުޅަނގު އައްސޭރީގެ ސިޓީއެއް ކަމުގައިވާ ޖެނީންގައެވެ. އޭނާގަޔަކަށް ބަޑިޖަހާފައިވަނީ އާދިއްތަ ދުވަހުއެވެ. އޭނާ ޝަހީދުވިކަމުގެ ރިޕޯޓްކޮށްފައިވަނީ ހޯމަ ދުވަހުއެވެ.
އާދިއްތަ ދުވަހު މުހައްމަދަށް އިސްރާއީލު ސިފައިން ހަމަލާދީފައިވަނީ ރާދް ހާޒިމްގެ އާއިލީ މީހުންނަށް ޓާގެޓްކޮށް ދެމުންދާ ހަމަލާތަކުގައެވެ. އުމުރުން 28 އަހަރުގެ ރާދް ހާޒިމްއަކީ ތެލްއަވީވްގައި އިސްރާއީލުގެ ތިން މީހުން މަރާލި މީހެކެވެ. އެއާއެކު އިސްރާއީލު ސިފައިން ވަނީ އޭނާ ޝަހީދުކޮށްލުމަށް ބޮޑު އޮޕަރޭޝަނެއް ކުރިޔަށްގެންގޮސްފައެވެ.
ފަލަސްތީނުގެ އޮފިޝަލުންނާ ހަވާލާދީ ފަލަސްތީނުގެ ނިއުސް އެޖެންސީ ކަމުގައިވާ "ވަފާ"އިން ރިޕޯޓްކޮށްފައިވާ ގޮތުގައި, މުހައްމަދަށް އިސްރާއީލުން ހަމަލާދީފައިވަނީ މަސައްކަތް ނިންމުމަށްފަހު ރޯދަ ވީއްލުމަށް ގެޔަށް ދިޔަ މަގުމަތީގައެވެ.
ހޯމަ ދުވަހު އިސްރާއީލުގެ ސިފައިން ވަނީ ޖެނިންގެ ވަށައިގެންވާ ސަރަހައްދުތަކުގައި ބޮޑު އޮޕަރޭޝަނެއް ފަށާފައެވެ. ފާއިތުވި ތިން ހަފުތާތެރޭގައި ފަލަސްތީނުގެ 14 މީހުން ޝަހީދުކޮށްލާފައިވެއެވެ.
އިސްރާއީލުން ދިން ހަމަލާތަކެއްގައި ފަލަސްތީނުގެ އަންހެނަކު ޝަހީދުވި މައްސަލައެއް ވަނީ ހޫނުވެފައެވެ. އެކަމާގުޅިގެން އީޔޫގެ ޑިޕްލޮމެޓިކް މިޝަނުން ބުނެފައިވަނީ ހާލަތާ ނުބައްދަލު ބާރު އިސްރާއީލުން ފަލަސްތީނުގެ އާންމު ރައްޔިތުންނަށް (ވަކިން ޚާއްސަކޮށް ހަތިޔާރުނެތް އާންމުންނަށް) އަމާޒުކޮށް ބޭނުންކުރުމަކީ ބަލައިގަނެވޭނެ ކަމެއް ނޫންކަމަށެވެ.
