އޭޝިއަން ފުޓްސަލް ކަޕް ކޮލިފައިންގައި ރާއްޖެއާއި ކިރިގްސްތާން ބައްދަލުކުރި މެޗުން ރާއްޖެ ބަލިވެއްޖެއެވެ.

ކިރްގިސްތާންގެ ބިޝްކެކްގެ ގެޒްޕްރޮމް ސްޕޯޓްސް ކޮމްޕްލެކްސްގައި ހޯމަ ދުވަހުގެރޭ ކުޅުނު މެޗު ކިރިސްތާން ކާމިޔާބުކުރީ 7-1 ންނެވެ.

މި މެޗާއި ގުޅޭ ގޮތުން ރާއްޖެ ޓީމުގެ ކޯޗު އަބްދުﷲ ނަސީރު (އަބޯ) ބުނީ މެޗާއި މެދު ޖުމްލަކޮށް ހިތްހަމަޖެހޭ ކަމަށެވެ. ލަނޑު ޖަހަން ގިނަ ފުރުސަތުތަކެއް ލިބުނު ނަމަވެސް ނަސީބު އަތުގައި ނުހިފީ ކަމަށް ކޯޗު ބުންޏެވެ. ކޮލިފައިންގެ ކޮންމެ މެޗަކަށްވެސް ރާއްޖެ ނިކުންނަނީ މޮޅުވާން އަޒުމް ކަނޑައަޅައިގެންކަން ފާހަގަކޮށް އަބޯ ބުނީ އުންމީދަކީ އަންގާރު ދުވަހުގެ މެޗުން މޮޅުވުން ކަމަށެވެ.

ކޮލިފިކޭޝަންގައި އާދީއްތަ ދުވަހު ރާއްޖެ ނިކުތީ 12 ފަހަރު އޭޝިއާގެ ފުޓްސަލް މުބާރާތް ކާމިޔާބުކޮށްފައިވާ އީރާންއާ ދެކޮޅަށެވެ. އެމެޗުން އީރާން މޮޅުވީ 17-0 ންނެވެ. އީރާންއަކީ މި މުބާރާތް އެންމެ ގިނަ ފަހަރު ކާމިޔާބުކުރި ޓީމެވެ. އީރާން އޮތީ ފުޓްސަލްގައި ދުނިޔޭގެ ރޭންކިންގެ 6 ވަނައިގައެވެ.

ކޮލިފައިންގައި ރާއްޖެ ދެން ބައްދަލުކުރަން ޖެހޭނީ ތުރުކުމެނިސްތާންއާއެވެ. މި މެޗު އޮންނާނީ އަންގާރަ ދުވަހުގެ ހަވީރު 16:00 ގައެވެ.

މިއީ ރާއްޖެއިން ފުޓްސަލް އޭޝިއަން ކަޕްގެ ކޮލިފައިންގައި ވާދަކުރާ ފުރަތަމަ ފަހަރެވެ.