މައިލޯ އެފްއޭއެމް ވެޓަރެންސް ލީގު 2022 ގައި ދިވެހި ސިފައިންގެ ކްލަބާއި ވާދަކުރި މެޗުގައި ފަހަތުން އަރާ ކްލަބް އީގަލްސް އެއްވަރުކޮށްފިއެވެ.

އީގަލްސް އާއި ސިފައިން ބައްދަލުކުރި މި މެޗު ނިމުނީ 2-2 ންނެވެ. ފުރަތަމަ ހާފު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ. ދެވަނަ ހާފުގައި ސިފައިންގެ ޓީމުން ދެލަނޑު ޖަހާ ރަނގަޅު ލީޑެއް ނެގިއެވެ. ސިފައިންގެ ޓީމަށް ލަނޑުތައް ޖަހައިދިނީ އަހުމަދު ޝާމިން އާއި އަފްރާހު އިބްރާހިމްއެވެ.

ނަމަވެސް އީގަލްސްއިން ވަނީ އުންމީދު ކަނޑާނުލާ ކުރި މަސައްކަތުން ނަތީޖާ ހަމަހަމަ ކޮށްފައެވެ. އީގަލްސްގެ ދެލަނޑުވެސް ކާމިޔާބުކުރީ މެޗުގެ ފަހު 10 މިނެޓުގައި އިބްރާހިމް އާރިފްއެވެ. މެޗުގެ މޮޅު ކުޅުންތެރިއަކަށްވެސް ހޮވުނީ އާރިފްއެވެ.

މި މުބާރާތް އަލުން ބާއްވަން ފަށާފައި މިވަނީ ތިން އަހަރުގެ މެދުކެނޑުމަކަށްފަހުއެވެ. އެފްއޭއެމްއާއި ގުޅިގެން މި ފަހަރުގެ މުބާރާތް އިންތިޒާމް ކުރަނީ ކްލަބް އިވެންޓްސް އިންނެވެ. 40 އަހަރުން މަތީގެ ކުޅުންތެރިންނަށް ޚާއްޞަކޮށްފައިވާ މުބާރާތުގައި ވާދަކުރަނީ 7 ޓީމެވެ. މުބާރާތުގައި ކޮންމެ ޓީމެއްގައިވެސް 35 އަހަރުން މަތީގެ ދެ ކުޅުންތެރިން ހިމަނަން ފުރުޞަތު ލިބެއެވެ.

މުބާރާތުގައި މާދަމާ ހަވީރު ކުޅޭ މެޗުގައި ޕޮލިސް ކްލަބް ނިކުންނާނީ ހުޅުމާލެ ވެޓަރެންސް ކްލަބް އާއި ދެކޮޅަށެވެ. މެޗު ފަށާނީ 16:30 ގައެވެ. މުބާރާތުގެ މެޗުތައް އޮންނާނީ އެފްއޭއެމްގެ އެއް ނަންބަރު ޓާފު ދަނޑުގައެވެ.