ރަތް މުގު ކިލޯއަކުން ހިންގަން ފެށި ވިޔަފާރިއެއް؛ ފާތިމާ އަލް ޒައުބީގެ ގެސްޓް ހައުސްގެ ވާހަކަ

"ތެދުތެދައް ދަންނަވާނަމަ، ފަހުރުވެރިކަމާއެކު ބުނެވޭނީ އަހަރެން ހުރީ ފަގީރުކަމުގައި، ވަރަށް ފަގީރުކޮށް" 53 އަހަރުގެ ފާތިމާ އަލް ޒައުބީ އޭނާގެ ބަދިގެ ތެރޭގައި ހުރެގެން ބުނެލިއެވެ. މި ބަދިގެއަކީ ހަމައެކަނި އޭނާގެ އާއިލާގެ މެންބަރުންނަށް ކާންދޭން ބެނުންކުރާ ބަދިގެއެއް ނޫނެވެ. އެއީ އެ ހިސާބަށް އަންނަ ގެސްޓުންނަށް ވެސް ކާނާ ތައްޔާރުކުރާ ތަނެވެ.

އާމްދަނީ ލިބޭނެ އެއްވެސް މަގެއް ނެތް، އަދި ބަލި ފިރިއަކާއެކު ދިރިއުޅެމުން އަންނަ ފާތިމާއަކީ 5 ދަރިންގެ މަންމައެކެވެ. އޭނާއަކީ ބަދިގެއިން ފެށި މަސައްކަތް ފުޅާކުރަމުން ގޮސް މިހާރު ގެސްޓްހައުސްއެއް ހިންގާ މީހެކެވެ.

އުރުދުންގެ ބަލްގާ ސަރަހައްދުގެ މުސްކުޅި ސިޓީއެއް ކަމަށްވާ ސޯލްޓުގެ ހިމަ މަގުތަކުންލާފައި ގެސްޓުން ދަތުރުކުރާ ހިމަ މަގެއްގައި ހަދާފައިވާ ފާތިމާގެ ގެސްޓް ހައުސްއަކީ މިހާރު އެ ސިޓީގައި އެންމެ މަޝްހޫރު އެއްތަނެވެ. މިތަނީ ގެސްޓުންގެ އިތުރުން އާންމުންގެ މެދުގައި ވެސް މަޝްހޫރުތަނެކެވެ. ވަކިން ހާއްސަކޮށް އާދަކާދައާއި ސަގާފިގޮތުން މަޝްހޫރުތަނެކެވެ.

ޖޯޑަންއަށް ހާއްސަ ކެއުންތައް ލިބެން ހުންނަ މި ގެސްޓް ހައުސްއިން، ސަގާފީ ހެދުންތައް ލައިގެން އޭގެ އަޖުމަ ބެލުމުގެ އިތުރުން ގެސްޓް ހައުސް ހުންނަ ތަނުގެ ގޮތުން ސިޓީގެ ހިތްގައިމު ތަންތަން ފެނިގެން ދެއެވެ. މިއީ 2012 ވަނަ އަހަރު ހެދިތަނެކެވެ.

ފާތިމާ އަކީ ޖޯޑަންގެ މަދު އަންހެނުންގެ ތެރެއިން ގޭގޭ ކަންކަން އިސް މީހެއްގެ ހައިސިއްޔަތުން ބަލަހައްޓާ އެއް ފަރާތެވެ. ޖޯޑަންގެ ސަރުކާރުގެ ޑިޕާޓްމަންޓް އޮފް ސްޓެޓިސްޓިކްސް އިން ހާމަކުރާ ގޮތުގައި 17.5 އިންސައްތަ އަންހެނުންނަކީ އެމީހުންގެ ގޭގެ ކަންކަން އިސްފަރާތުގެ ގޮތުގައި ބަލަހައްޓާ މީހުންނެވެ.

ސިސްޓަރ ހުޑް އިސް ގްލޯބަލް އިންސްޓިޓިއުޓުން މިއަހަރުގެ މާޗް މަހުގައި އާންމު ކުރި ރިޕޯޓެއް ދައްކާ ގޮތުން، 94.7 އިންސައްތަ އަންހެނުންގެ ތެރެއިން ގޭގޭ ކަންކަން އިސްކޮށް ބަލަހައްޓާ އަންހެނުންނަކީ މާލީ ގޮތުން އެހީއެއް ނުލިބޭ އަދި އާއިލާއަށް ބޭނުންވާ އަސާސި ތަކެތި ހޯދުމުގައި ދަތިތަކާއި ދިމާވަ ފަރާތްތަކެވެ.

ކޮވިޑް-19ގެ އާލަމީ ވަބާގެ ސަބަބުން ޖޯޑަންގެ އިގްތިސާދަށް ވަނީ ބޮޑެތި ގެއްލުންވެފައެވެ. މިކަމުގެ ސަބަބުން ވަޒީފާ ނެތް މީހުންގެ އަދަދު އިތުރުވެ ފަގީރުކަން ވަނި އިތުރުވެފައެވެ.

ދިރިއުޅުމުގެ ހާލާތު ނާޒުކު އަދި ޖޯޑަންގައި މަދުން އަމާންދަނީ ލިބޭ އެތައް ހާސް ބަޔަކަށް އެހީތެރިވުމަށް އިޖްތިމާއީ ރައްކާތެރިކަމުގެ ދާއިރާ ބޮޑުކުރުން މަސައްކަތް ކުރި ނަމަވެސް ސަރުކާރަށް ވަނީ ކުރިމަތިނުލެވޭ ވަރުގެ ބޮޑެތި ގޮންޖެހުންތަކާއި ކުރިމަތިވެފައެވެ.

ނަމަވެސް ފާތިމާ ފަދަ އަންހެން ކަނބަލުން އަންނަނީ ދިރިއުޅުމުގައި ދިމާވާ މިފަދަ ދަތިތަކާއި ކުރިމަތިލައި އެކަންކަމުން އަރައިގަންނަމުންނެވެ.