މައިކަލް ޓެޓޭ: އުކާލެވޭ ބިއްލޫރުކުނިން ތަފާތު ރީތި އުފެއްދުންތައް އުފައްދާ ފަރާތެއް

މައިކަލް ޓެޓޭ އަކީ ގާނާގައި ބިއްލޫރިން ތަފާތު ސާމާނު އުފެއްދުމުގެ މަސައްކަތް ރަސްމީގޮތެއްގައި ކުރާ ހަމައެކަނީ މީހާއެވެ. 2012 ވަނަ އަހަރު ފްރާންސް އަދި ނެދަލޭންޑްސް އިން މިހުނަރު ދަސްކުރުމަށްފަހު އަނބުރާ ގައުމަށް އައިސް ގައުމުގައި އެމަސައްކަތް ކުރަން އޭނާ ބޭނުންވިއެވެ.

މައިކަލް އޭނާގެ މަސައްކަތް ކުރަނީ އުކާލެވޭ ބިއްލޫރި ކުނި ބޭނުންކޮށްގެންނެވެ. މިގޮތަށް އުކާލެވޭ ބިއްލޫރި ކުނި އޭނާ ބޭނުންކުރަނީ ގާނާގައި އުކާލެވޭ ބިއްލޫރި ކުނި މަދުކުރުމާއި ބޭކާރު ގޮތުގައި ކުރެވޭ އިމްޕޯޓުތައް މަދުކުރުމަށް އެހީވުމުގެ ގޮތުންނެވެ.

މައިކަލް ބުނާގޮތުން ނަމަ ބިއްލޫރި އަކީ ވަރަށް ރީތި އެއްޗެކެވެ. މިގޮތަށް ބޭނުންނުކޮށް އުކާލެވޭ ބިއްލޫރިންވެސް ދެވަނަ ފަހަރަށް ބޭނުންކުރާނެ ތާފާތު ރީތި އެއްޗެހި އުފެއްދޭނެއެވެ.

ބިއްލޫރި އަށް ހޫނުކޮށް އެއަށް ފުމެގެން އޭގެއިން ތަފާތު އެއްޗެހި އުފެއްދުމަކީ މައިކަލްގެ ޕެޝަންކަމުގައި އޭނާ ބުނެއެވެ. އަދި މިކަމަކީ އޭނާގެ ހިތުން ވަރަށް ބޮޑު ޖާގައެއް ހޯދާފައިވާކަމެއް ކަމަށާއި އަބަދުވެސް ހުންނަނީ އެ މަސައްކަތްކުރާ ހިތުންކަން މައިކަލް ފާހަގަކުރެއެވެ.

މިގޮތަށް ބިއްލޫރިން މަސައްކަތްކުރާއިރު، ފުރަތަމަ ބޭނުންކުރާ ބިއްލޫރި ކޮޅަށް، ވަކި އާލާތެއް ބޭނުންކޮށްގެން ފުމުމުން އޭތިބޮޑުވެ ތަފާތު ބަައްޓަންތަކަށް ހެދޭކަން މައިކަލް ފާހަގަކުރެއެވެ. އަދި މިގޮތަށް އެކި ކުލަކުލައިގެ އުފެއްދުންތައް އުފެއްދޭކަން އޭނާ ފާހަގަކުރެއެވެ. އެގޮތުން ބައެއްފަހަރު ރަތްކުލަޔާ ކަޅުކުލައިން، ބައެއް ފަހަރު ފެހި ކުލައިން އަދި ބައެއް ފަހަރު ހުދު ނުވަތަ ރީދޫ ބިއްލޫރީގެ އުފެއްދުންތައް އުފެއްދޭކަމަށް މައިކަލް ބުނެއެވެ.

އަމިއްލަ އަތުން މިތަކެތި އުފައްދާއިރު އޭގެ ނިޝާންތައް މައިކަލްގެ އަތުން ހުރީ ފެންނާށެވެ. ބޭނުންކޮށްފައި އުކާލެވޭ ބިއްލޫރުފުޅިން ގޭތެރެ ޒީނަތްތެރިކުރަން ބޭނުންކުރެވޭނެ ތަފާތު ސާމާނު މައިކަލް އުފައްދާއިރު، މިތަކެތި އުފެއްދުމުގެ މަސައްކަތް އޭނާ ކުރަނީ 1،500 ސެލްސިއަސް ހޫނު ގަދަ އަލިފާން ބޭނުންކޮށްގެންނެވެ. އަލިފާނުން ރައްކާތެރިވުމަށް އޭނާގެ އަތަށް އަންގިއެއް ފަދަ އެއްޗެއް ވެސް ނުލައްވައެވެ. ބޭނުންކުރަނީ ތެއްމާލާފައިވަ ނޫސް ކަރުދާކޮޅެކެވެ.

މައިކަލްގެ އުންމީދަކީ ގާނާއިން އިމްޕޯޓް ކުރާ ބޭރުގެ ބިއްލޫރި މަދުކުރުމެވެ. ތަފާސްހިސާބުތައް ދައްކާގޮތުން އެގައުމުން ކޮންމެ އަހަރު 300 މިލިއަން ޑޮލަރުގެ ބިއްލޫރި އާއި ސެރަމިކް ތަކެތި އެތެރެ ކުރެއެވެ. މީގެ ތެރެއިން 80 އިންސައްތައަށް ވުރެ ގިނަ މުދަލަކީ ޗައިނާއިން އެތެރެކުރާ މުދަލެވެ.

މައިކަލް ބުނަނީ ގާނާގެ ބައެއް ކުންފުނިތަކުން ބިއްލޫރި ރީސައިކަލް ކުރިޔަސް ގިނަ އަދަދެއްގެ ބިއްލޫރި ކުނި ގައުމުގެ އެކު ސަރަހައްދުތަކުން ފެންނަން ހުންނަ ކަމަށެވެ. އޭނާގެ މަސައްކަތްކުރުމަށް ބިއްލޫރި ހޯދަން ވަކި ކަލެކްޝަން ޕްރޮސެސްއެއް ނުގެންގުޅޭ ކަމަށާއި ވަކި ސަރަހައްދުތަަކަކަށް ބިއްލޫރި ކުނި ފުންޏަކަށް ޖެހި ގިނަވެފައި އޮންނަތަން ދެކެން ބޭނުންނުވާ ކަމަށް އޭނާ ބުނެއެވެ.

10 އަހަރުގެ ބުރަ މަސައްކަތާއެކު މައިކަލްގެ ވިޔަފާރި މިހާރު ވަނީ ފުޅާވާން ފަށާފައެވެ. މިމަސައްކަތް ކުރާނެ ގޮތް އޭނާ އެހެން މީހުންނަށް ކިޔައިދެމުން އަންނަ އިރު، މިހާރު އޭނާގެ ދަށުން މަސައްކަތްކުރާނެ މުވައްޒަފުންވެސް ތިބެއެވެ. މައިކަލްގެ އަމާޒަކީ ވީހާވެސް ގިނަ ޒުވާނުންނަށް މި ހުނަރު ދަސްކޮށްދީ ވަޒީފާގެ ފުރުސަތު ދިނުމެވެ.

މިހާރަށް ވުރެ ވިޔަފާރި ފުޅާކުރުމުގެ މަސައްކަތްވެސް ކުރަން ބޭނުންވާކަން މައިކަލް ފާހަގަކުރާއިރު، އޭނާގެ ވިޔަފާރީގެ އުފެއްދުންތައް ގާނާ އާއި އައިވަރީ ކޯސްޓުގެ ސްވެނިއަރ ފިހާރަތަކުން ލިބެން ހުރެއެވެ. އަދި ހުޅަނގާ އެމެރިކާގެ ބައެއް އަރޓް ގެލެރީތަކުންވެސް މައިކަލްގެ އުފެއްދުންތައް ވަނީ ޖާގަހޯދާފައެވެ.