ދައުލަތަށް ގެއްލިގެންދާ ފައިސާ ހޯދުމަށް ހުރި ހުރަސްތައް ނައްތާލުމަށް ގާނޫނީ ހުރަހެއް އޮތްތޯ ބެލުމަށް ދިރާސާއެއް ހަދަމުން އަންނަ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފިއެވެ.

ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިިޓީގައި ވާހަކަފުޅުދައްކަވަމުން ކޮމިޝަންގެ ރައީސް އާދަމް ޝާމިލް ވަނީ މަސައްކަތްތައް މިހާރު ރޭވިފައިވާ ގޮތުގެ ތަފްސީލް ދެއްވާފައެވެ. ޝާމިލް ވިދާޅުވީ، ކޮމިޝަންގެ މައިގަނޑު އަމާޒަކީ ދައުލަތަށް ގެއްލިގެންދާ ފައިސާ ހޯދުމަށް ކުރަން ޖެހޭ މަސައްކަތް ފުރިހަމައަށް ކުރުން ކަމަށެވެ. އެގޮތުން މިހާރު ގާނޫނީ ގޮތުން އެކަމަށް ހުރަހެއް އޮތްތޯ ބެލުމަށް ދިރާސާއެއް ކުރަމުން އަންނަ ކަމަށާއި، އެ ދިރާސާގެ އަލީގައި ގާނޫނަށް އިސްލާހެއް ގެންނަން ޖެހޭނަމަ އެޓާނީ ޖެނެރަލާއެކު އެ މަޝްވަރާތައް ކުރައްވާނެ ކަަމަށެވެ. ހަމަ މިއާއެކު އައު އުސޫލުތަކެއް އެކުލަވާލަން ޖެހޭތޯވެސް މި ދިރާސާއިން ބަލާނެ ކަމަށް ވިދާޅުވިއެވެ. ޝާމިލް ވިދާޅުވީ، ކުރިއަށް އޮތް މަދު ދުވަސްކޮޅެއްގެ ތެރޭގައި ދިރާސާ ނިމޭނެ ކަމަށެވެ.

ޝާމިލް ވިދާޅުވީ، ގެއްލިގެންދާ ފައިސާ ހޯދުމަށް ގުޅުން ހުރި މުއައްސަސާތައް ގުޅިގެން މަސައްކަތް ކުރަން ޖެހޭ ކަމަށެވެ. އެހެންކަމުން އައު ބޯޑުން މިހާރު ފުލުހުންނާއި، ދައުލަތުގެ ޕްރޮސެކިއުޓަރުންނާ އެކުވެސް ބައްދަލުކޮށްފައިވާ ކަމަށެވެ. އެ ބައްދަލުވުންތަކުގެ ނަތީޖާ ރަނގަޅު ކަމަށް ޝާމިލް ވިދާޅުވިއެވެ.

އޭސީސީ ރަނގަޅަށް ހިނގައިގަތުމަށް ވަރަށް ގިނަ ކަންކަން ރަނގަޅުކުރަން ޖެހޭކަން ފާހަގަކުރައްވަމުން ޝާމިލް ވިދާޅުވީ، މިހާރު ކުރު ރާސްތާ ޕްލޭނެއް އެކުލަވާލެވިފައިވާ ކަމަށެވެ. އޭގައި މައިގަނޑު 6 ކަމެއް އެކުލެވިފައިވާކަމަށް ޝާމިލް ވިދާޅުވިއެވެ.

ޝާމިލް ވިދާޅުވީ އޭސީސީއަކީ އޭގެ ޒާތުގައި އަމިއްލައަށް މަސައްކަތް ކުރެވެންޖެހޭ ތަނަކަށް ވާން ޖެހޭ ކަމަށެވެ. އެކަމަށް ކުރު ރާސްތާ ޕްލޭންގައި އަލިއަޅުވާލެވިފައިވާކަމަށާއި ޒަމާނީ ގޮތަށް މުއައްސަސާ ހިންގަން ބޭނުންވާ ފުރިހަމަ ވަސީލަތައްވެސް ނެތްކަމަށް ޝާމިލް ވިދާޅުވިއެވެ. އެހެންކަމުން އެކަމަށްވެސް މަސައްކަތްތަކެއް ކުރެވެމުންދާކަމަށް ވިދާޅުވިއެވެ.

ގާނޫނީ ވާޖިބު އަދާކުރުމަށް ކުރު މުއްދަތެއްގައި ނަތީޖާ ނެރުން އެއީ އެންމެ އިސްކަންދެއްވާނެކަން ކަމުގައި ޝާމިލް ވިދާޅުވިއެވެ.

ކޮމިޓީގައި ވާހަކަފުޅުދައްކަވަމުން އޭސީސީގެ ނާއިބު ރައީސް އަބްދުއްސަލާމް ވިދާޅުވީ، އެންމެ ބޮޑު ޚިޔާނާތުގެ މައްސަލަ ކަމަށްވާ އެމްއެމްޕީއާރްސީގެ ޚިޔާނާތުގެ މައްސަލައިގައި ކުރިއަށް ދާނެ ގޮތް ހޯދިއްޖެ ކަމަށެވެ. އެކަމަށް ޚާއްސަ ޓީމެއް މިހާރު އެކުލަވާލެވިފައިވާ ކަމަށެވެ. އެ މައްސަލައިގެ ދެބައެއް ތަހުގީގު ކުރަމުން އަންނަކަން ފާހަގަކުރައްވައި ސަލާމް ވިދާޅުވީ، ރަށްތަކުގެ މައްސަލައާއި، އެމްއެމްޕީއާރްސީގެ ލިސްޓްގެ މައްސަލަ ވަކިވަކިން ތަހުގީގު ކުރަމުން އަންނަ ކަމަށެވެ. ސަލާމް ވިދާޅުވީ، ދައުލަތަށް ގެއްލިފައިވާ ފައިސާ އަނބުރާ ހޯދޭނެ ކަމުގެ އުންމީދު އެބައޮތް ކަމަށެވެ.

ކޮމިޝަނަށް ހުށއެޅޭ މައްސަލަތަކުގައި އިސްކަންދޭނެ އުސޫލަށް އަންނަ މަހު އަމަލު ކުރަން ފަށާނެ ކަމަށާއި، މިހާރު ކޮމިޝަންގައި އޮތް ބެކްލޮގް ކްލިއަރ ކުރުމަށްޓަކައި ތަހުގީގު ޓީމުތައް ބަހާލެވިފައިވާކަމުގައި ސަލާމް ވިދާޅުވިއެވެ.

އެސެޓް ރިކަވަރީ ކޮމިޝަން އުވާލުމުން އެތަނުން ބަލަމުން ދިޔަ މައްސަލަތައް އޭސީސީއަށް ޓްރާންސްފަރު ކުރުމުގެ މަރުހަލާ މިހާރު ކުރިއަށްދާކަމަށްވެސް ސަލާމް ވިދާޅުވިއެވެ.

އައު މެމްބަރުން ކޮމިޝަނާއި ހަވާލުވެ މަސައްކަތް ފަށާފައިވަނީ މާރޗު މަހުގެ 17 ވަނަ ދުވަހުއެވެ. އިލެކްޝަންސް ކޮމިޝަންގެ އައު މެމްބަރުންނަކީ ކޮމިޝަންގެ ރައީސް އާދަމް ޝާމިލް، ނާއިބު ރައީސް އަބްދުއްސަލާމް އާއި ތާހާ މުހައްމަދު، ޝަޒްނާ ހާޝިމް އަދި ޝިޔާމާ މުހައްމަދު އެވެ.