ޓެކްސީ ޑްރައިވަރު ޤާސިމްގެ މަރު: އަދުހަމް ލައިގެން ހުރި ގަމީސް އޮތީ ގޯންޏެއްގެ ތެރޭގައި

ޓެކްސީ ޑްރައިވަރު، 59 އަހަރުގެ ގާސިމް ހަސަން މަރާލި މައްސަލައިގައި، ގަސްދުގައި މީހަކު މެރުމުގެ ކުށުގެ ދައުވާ އުފުލާފައިވާ، ޅ. ހިންނަވަރު، ބޮޑުހިޔާގެ، އަދުހަމު މުހައްމަދުގެ މައްޗަށް އުފުލާފައިވާ ދައުވާގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި އަޑުއެހުމުގައި ކުރިއަށް ގެންގޮސްފައިވަނީ ދައުލަތުން ހުށައަޅާފައިވާ ހެކިންގެ ހެކިބަސް ނެގުމެވެ. އެގޮތުން ދައުލަތުން ހުށައަޅާފައިވާ 3 ހެއްކެއްގެ ހެކިބަސް ނަގާފައިވެއެވެ.

ފުރަތަމަ ހެކިބަސް ދީފައިވަނީ ސީން އޮފް ކްރައިމް ރިޕޯޓާއި ގުޅިގެން ހެކިބަސް ދެއްވުމަށް ހާޒިރުކުރި ސީން އޮފް ކްރައިމް އޮފިސަރެވެ. އޭނާ ބުނެފައިވާ ގޮތުން ހުޅުމާލޭ 6 ނަންބަރު ފްލެޓު ކައިރިއަށް ދިޔައިރު، އަދުހަމްވެސް މައްސަލައިގެ ތަހުގީގު ކުރާ އޮފިސަރުންނާއެކު އެތަނަށް އައިސްފައިވެއެވެ. އޭރު ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުގެ ޓީމަކާއި ފޮރެންސިކް ޓީމެއްވެސް އެތަނުގައި ޙަރަކާތްތެރިވަމުން ދިޔަ ކަމަށް އޭނާ ބުނިއެވެ.

އޭނާ ވަނީ ފްލެޓު ބޭރުގައި ހުރި ގޯނިތަކެއްގެ ތެރެއިން ގޯންޏަކުން އަދުހަމްގެ ގަމީސް ހޯދާފައެވެ. އެއީ ގޮޅިޖެހި، އަތްދިގު ގަމީހެއް ކަމަށާއި، ގަމީހުގެ އަތްކުރީގެ ތަންކޮޅެއް ހަލާކުވެފައިވާ ކަމަށެވެ. ހަމައެއާއެކު، އެ ވަގުތު އަދުހަމް އަރައިގެން ހުރި ފައިވާންވެސް އޭނާ ވަނީ މާއްދީ ހެކީގެ ގޮތުގައި ނަގާފައެވެ.

ދެން ހާޒިރުކުރި ސީން އޮފް ކްރައިމް އޮފިސަރަކީ އަދުހަމް ޙަމަލާއަށްފަހު ގެއަށް ގޮސް، އޭނާ ލައިގެން ހުރި އެއްޗެހި ބަދަލު ކުރިކަމަށް ބަޔާންކޮށް، އޭނާގެ ގެއިން ހެކި ހޯދި އޮފިސަރެވެ.

އެއަށްފަހު ދެން ހާޒިރުކުރީ މި މައްސަލައިގެ ފިންގަރ ޕްރިންޓް އެނާލިސިސް ރިޕޯޓު ތައްޔާރުކުރި އޮފިސަރެވެ. އެގޮތުން އޭނާ ހާޒިރުކުރީ ޓެކްސީގެ ސީޓުން ނަގާފައިވާ ފިންގަރޕްރިންޓް ސާމްޕަލް އަދުހަމްގެ ފިންގަރ ޕްރިންޓާއި ދިމާވާކަން ސާބިތު ކުރުމަށެވެ.

ގާސިމް މަރާލާފައި އޮއްވާ ފެނިގެން ފުލުހުންނަށް ރިޕޯޓް ކޮށްފައިވަނީ 2019 ވަނަ އަހަރު ޑިސެމްބަރު މަހުގެ ހަތަރު ވަނަ ދުވަހުގެ ރޭ 21:07 ހާއިރުއެވެ.