ފްރާންސް ލީގުގައި މޮންޓްޕީލިއަރ އާއި ބައްދަލުކުރި މެޗުބް މޮޅުވެ ލީގު ތާވަލުގެ ދެވަނައަށް މާސޭ ޖެހިލައިފިއެވެ.

މާސޭގެ ދަނޑުގައި ކުޅުނު މި މެޗު އެޓީމުން ކާމިޔާބުކުރީ 2-0 ންނެވެ. ފުރަތަމަ ހާފުގެ 9 ވަނަ މިނެޓުގައި މާސޭއަށް ލީޑު ނަގައިދިނީ ޑިއެންގއެވެ. މާސޭއަށް ލީޑު ފުޅާ ކޮށްދިނީ ލިބުނު ޕެނަލްޓީއަކުން އަންޑަރއެވެ.

ލީގުގައި ކުޅުނު 31 މެޗުގެ ތެރެއިން 12 މެޗު މާސޭއިން ވަނީ ބައިކޮޅަށް ލަނޑެއް ވަނަނުދީ ނިންމާލާފައެވެ. މިއާއެކު މާސޭ ވަނީ މި ސީޒަންގައި ކްލީން ޝީޓަކާއިއެކު އެންމެ ގިނަ މެޗު ނިންމާލި ޓީމަށް ވެފައެވެ.

މި ނަތީޖާއާއެކު މާސޭ ތާވަލުގެ ދެވަނައިގައި އޮތީ 31 މެޗު ކުޅެގެން ލިބުނު 59 ޕޮއިންޓާއެކުއެވެ. 12 ޕޮއިންޓުގެ ލީޑަކާއެކު ތާވަލުގެ އެއްވަނައިގައި އޮތީ ޕީއެސްޖީއެވެ. ތާވަލުގެ ތިންވަނައި 56 ޕޮއިންޓާއެކު އޮތީ ރެންސްއެވެ.

ލީގުގައި އާދީއްތަ ދުވަހުގެރޭ ކުޅުނު އެހެން މެޗުތަކަށް ބަލާއިރު، ސްޓާސްބާގް އާއި ލިޔޯން ބައްދަލުކުރި މެޗު ނިމުނީ ކޮންމެ ޓީމަކުން ވެސް ލަނޑެއް ޖަހާ އެއްވަރު ވެގެންނެވެ. ނީސްގެ މައްޗަށް ލެންސް ކުރި ހޯދީ 3-0 ންނެވެ.