ޕާކިސްތާނުގެ ބޮޑުވަޒީރުކަމަށް އިދިކޮޅުން ޝަހްބާޒް ޝަރީފް ހުށަހަޅައިފިއެވެ.
ރޮއިޓަރސްގައި ޕާކިސްތާން މުސްލިމް ލީގު-ނަވާޒް ޕާޓީ އާ ހަވާލާދީ ރިޕޯޓުކޮށްފައިވާގޮތުން ޝަހްބާޒް ޝަރީފް ވަނީ ބޮޑުވަޒީރުގެ މަގާމަށް ކުރިމަތިލެއްވުމަށް އާދިއްތަ ދުވަހު ނަން ހުށަހަޅުއްވާފައެވެ.
ޝަހްބާޒް ޝަރީފް އަކީ ކުރިން ތިން ފަހަރެއްގެ މަތިން ޕާކިސްތާނުގެ ބޮޑުވަޒީރުކަން ކުރައްވާފައިވާ ނަވާޒް ޝަރީފްގެ ކޮއްކޯފުޅެވެ.
ޕާކިސްތާނުގެ ބޮޑުވަޒީރުކަމުގެ މަގާމުގައި ހުންނެވި އިމްރާން ޚާންގެ އިތުބާރުނެތް ކަމުގެ ވޯޓަށް ފަހު ދެން ބޮޑުވަޒީރުކަމަށް ވަޑައިގަންނަވާނެ ކަމަށް ލަފާކުރެވޭ ބޭފުޅަކީ ޝަހްބާޒް ކަމަށް މީޑިއާތަކުން ވަނީ ރިޕޯޓުކޮށްފައެވެ.
ޕާކިސްތާނުގެ އައު ބޮޑުވަޒީރު ހޮވުމަށް ވޯޓުލުމަށް ތާވަލުކޮށްފައި ވަނީ ހޯމަ ދުވަހަށެވެ.
ޕާކިސްތާނުގެ 75 އަހަރުގެ ތާރީހުގައި އެއްވެސް ބޮޑުވަޒީރަކަށް ފަސް އަހަރުގެ ދައުރު ފުރިހަމަކުރެއްވިފައި ނުވާއިރު، އިމްރާން ޚާން އަކީ އިތުބާރުނެތްކަމަށް ވޯޓުނަގައި މަގާމުން ވަކިކުރެވުނު ފުރަތަމަ ބޮޑުވަޒީރުކަމަށް ރޮއިޓަރސް އިން ވަނީ ރިޕޯޓުކޮށްފައެވެ.
އިމްރާން ޚާންގެ އިތުބާރުނެތްކުގެ މައްސަލަ މަޖިލީހަށް ވެއްދުމާއެކު އޭނާ ވަނީ އެމައްސަލަ މަޖިލީހުން ބޭރުކޮށްލަން ގިނަ މަސައްކަތްތަކެއް ކުރައްވާފައެވެ. އެގޮތުން ގާނޫނުހަދާ މަޖިލީސް އުވާލައްވާފައިވެސްވެއެވެ. ނަމަވެސް ހޮނިހިރު ދުވަހުގެރޭ ދަންވަރުގެ ވަގުތެއްގައި ނެގުނު ވޯޓުން އިމްރާން ޚާންގެ އިތުބާރުނެތް ކަމަށް 342 މެމްބަރުން ހިމެނޭ މަޖިލީހުގެ 174 މެމްބަރުން ވަނީ ވޯޓުލާފައެވެ.
އިތުބާރުނެތްކަމުގެ ވޯޓު ނަގައި މަގާމުން ވަކިކުރުމާ ގުޅޭގޮތުން އިމްރާން ޚާން އަދި ވަކިއެއްޗެއް ވިދާޅުވެފައި ނެތް ނަމަވެސް އޭނާ ވަނީ މަޑުން ނުހުންނަވާނެ ކަމަށް މިވޯޓު ނެގުމުގެ ކުރިން ވިދާޅުވެފައެވެ. އަދި އޭނަގެ ސަޕޯޓަރުންނަށް ވަނީ މަގުމައްޗަށް ނުކުމެ ހިޔާލުފާޅުކުރުމަށް ގޮވާލައްވާފައެވެ.
ބޮޑުވަޒީރުކަމަށް ކުރިމަތިލައްވާ ޝަހްބާޒް ޝަރީފް ވަނީ އިމްރާން ޚާން މަގާމުން ވަކިކުރެވިގެން ދިއުން މިއީ އައު ފެށުމަކަށް ލިބުނު ފުރުސަތެއް ކަމަށް ވިދާޅުވެފައެވެ. އައު ދުވަހަކަށް އިރު އަރާފައިވާ ކަމަށާއި އިދިކޮޅުގެ މި ކޯލިޝަނުން ޕާކިސްތާން އަލުން އާރާސްތުކުރާނެ ކަމަށް ވިދާޅުވިއެވެ.
ޝަހްބާޒް ޝަރީފް ވަނީ މީގެ ކުރިން ޕާކިސްތާންގެ ޕަންޖާބް ޕްރޮވިންސްގެ ޗީފް މިނިސްޓަރުކަމުގެ މަގާމު ފުރުއްވާފައެވެ. އަދި އޭނާ އަކީ ޗައިނާގެ ތާއިދު ލިބިވަޑައިގަންނަވާ ސިޔާސީ ލީޑަރެކެވެ.
ބޮޑުވަޒީރުކަމުގެ މަގާމާ ހަވާލުވެވަޑައިގެންނެވުމަށްފަހު ޝަހްބާޒް ޝަރީފްގެ ފުރަތަމަ މަސައްކަތަކަށް ވާނީ ހުޅަނގާ އެމެރިކާއާއެކު ހީނަރުވެފައިވާ ގުޅުން އަލުން އިޔާދަކުރެއްވުމެވެ. އަދި ޕާކިސްތާނުގެ އަސްކަރިއްޔާއާ ސަރުކާރާ ދެމެދު އޮތް ގުޅުން ރަނގަޅުކުރުމުގެ މަސައްކަތްވެސް ކުރައްވަން ޖެހިވަޑައިގަންނަވާނެއެވެ.
އިމްރާން ޚާން ބޮޑުވަޒީރުކަމާ ހަވާލުވެވަޑައިގެންނެވި އިރު އޭނާއަށް އަސްކަރިއްޔާގެ ތާއިދު އޮތް ނަމަވެސް އިގުތިސާދީ މައްސަލަތަކާއި އަދި އެނޫންވެސް ސަބަބުތަކާހުރެ ގުޅުން ވަނީ ހީނަރުވެފައެވެ.
