މިވަގުތު ޚިދުމަތްދެމުންދާ ޓޫރިސްޓު ފެސިލިޓީތަކުގެ އަދަދު 970ށް
ރާއްޖޭގެ އެކި ކަންކޮޅުތަކުގައި މުޅި ޖުމްލަ 1،171 ޓޫރިސްޓު ފެސިލިޓީ އެބަހުރި
ހުޅުމާލޭގެ ގެސްޓްހައުސްއެއް
މިވަގުތު 970 ޓޫރިސްޓު ފެސިލިޓީއަކުން ޚިދުމަތްދެމުންދާކަމަށް ޓޫރިޒަމް މިނިސްޓްރީން ހާމަކޮށްފިއެވެ.
ޓޫރިޒޒަމް މިނިސްޓްރީން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން, ރާއްޖޭގެ އެކި ކަންކޮޅުތަކުގައި މުޅި ޖުމްލަ 1،171 ޓޫރިސްޓު ފެސިލިޓީ އެބަހުއްޓެވެ. އެއީ 169 ރިސޯޓާއި 850 ގެސްޓްހައުސްއާއި 152 ސަފާރީއެކެވެ. މިނިސްޓްރީން ބުނީ މި ތަންތަނުގައި މުޅި ޖުމްލަ 60،193 އެނދު އެބަހުރިކަމަށެވެ. މީގެ ތެރެއިން ރިސޯޓުތަކުގައި 40،075 އެނދު ހުރިއިރު، ގެސްޓްހައުސްތަކުގައި 17،177 އެނދު, އަދި ސަފާރީތަކުގައި ޖުމްލަ 2،941 އެނދު ގާއިމްކޮށްފައިވާކަމަށް މިނިސްޓްރީން ބުނެފައިވެއެވެ.
މީގެ ތެރެއިން 970 ޓޫރިސްޓު ފެސިލިޓީއެއް މިވަގުތު އޮޕަރޭޝަނަށް ގެނެސްފައިވާއިރު, މީގެ ތެރޭގައި ހިމެނެނީ 164 ރިސޯޓާއި 656 ގެސްޓްހައުސް އަދި 150 ސަފާރީއެވެ. ރިސޯޓުތަކުން 39،064 އެނދެއްގެ ޚިދުމަތް ދެމުންދާއިރު، ގެސްޓްހައުސްތަކުގައި 12،644 އެނދު އަދި ސަފާރީތަކުގައި 2،954 އެނދުގެ ޚިދުމަތް ދެމުންދާކަމަށް ޓޫރިޒަމް މިނިސްޓްރީން ބުނެފައިވެއެވެ.
މިނިސްޓްރީން ބުނީ, ރާއްޖޭގެ ހުރިހާ ސަރަހައްދެއްގައި ގެސްޓްހައުސް އޮޕަރޭޓްކުރަމުންދާއިރު، އެންމެ ގިނަ ގެސްޓްހައުސް ހިންގަމުންދަނީ ކ އަތޮޅުގައި ކަމަށެވެ. ކ އަތޮޅުގައި 249 ގެސްޓްހައުސް ހިންގަމުންދާއިރު، 5،870 އެނދުގެ ޚިދުމަތް ދެމުންދާކަމަށެވެ. އއ އަތޮޅުގައި 124 ގެސްޓްހައުސް ހިންގަމުންދާއިރު އެ އަތޮޅުގައި 1،604 އެނދުގެ ޚިދުމަތް ދެމުންދާކަމަށެވެ.
ޓޫރިޒަމް މިނިސްޓްރީން މަސައްކަތްކުރަމުން ގެންދަނީ ރާއްޖޭގެ ހުރިހާ ސަރަހައްދަކަށްވެސް ފަތުރުވެރިކަން ފުޅާކުރުމަށެވެ. މިގޮތުން ލޯކަލް ޓޫރިޒަމް އިތުރަށް ފުޅާކުރުމުގެ ގޮތުން ސަރުކާރުން މިހާރު ވަނީ ހޯމްސްޓޭ ފަތުރުވެރިކަންވެސް ރާއްޖެއަށް ތައާރަފުކޮށްފައެވެ.
