ޕާކިސްތާންގެ ގާނޫނު ހަދާ މަޖިލިސް އުވާލީ ގާނޫނާއި ޚިލާފަށް ކަމަށް ބުރާސްފަތި ދުވަހު އެގައުމުގެ ސުޕްރީމް ކޯޓުން ނިންމުމާއި ގުޅިގެން މިހާރު އުފެދިފައިވާ އެންމެ ބޮޑު ސުވާލަކީ ދެން ބޮޑުވަޒީރު އިމްރާން ޚާން ކުރިޔަށް ވަޑައިގަންނަވާނީ ކިހިނެއްތޯ؟ މިސުވާލެވެ.
އިޙްތިޔާރު ކުރެއްވޭނެ ޔަގީން ދެގޮތުން އެއްގޮތަކީ އަމިއްލަފުޅަށް އިސްތިއުފާދެއްވުމެވެ. އެއާއެކު މުޅި ސަރުކާރުވެސް އިސްތިއުފާދޭން ޖެހެއެވެ. އަނެއް ގޮތަކީ މަޖިލީހުގައި ނަގާނެކަން ޔަގީންވެފައިވާ އިތުބާރު ނެތްކަމުގެ ވޯޓާއި ކެރިގެން ކުރިމަތިލެއްވުމެވެ. މިވަގުތު އެންމެންވެސް އިންތިޒާރު ކުރަނީ ސުޕްރީމް ކޯޓުން އަމުރުކޮށްފައިވާ ގޮތަށް މާދަމާ، ހޮނިހިރު ދުވަހު މަޖިލިސް އަލުން ހުޅުވާ މަސައްކަތް ފަށާނެ ވަގުތަށެވެ.
ޕާކިސްތާންގެ މަގްބޫލް ނޫހެއް ކަމަށްވާ "ދަ އެކްސްޕްރެސް ޓްރިބިއުން" ބުނާ ގޮތުން އިމްރާން ޚާނަށް އެންމެ ބޮޑަށް މަޝްހޫރުކަން ލިބިވަޑައިގެންފައިވަނީ ދެގޮތަކުންނެވެ. އެއީ ކަންތައް ކުރައްވާނެ ގޮތެއް ކުރިޔަށް ހާމަނުކުރެއްވުމާއި އަދި މީހުންގެ ސަމާލުކަން ހޯއްދަވަން އެނގިވަޑައިގަތުމެވެ.
އެއްބަޔަކު ގަބޫލު ކުރާ ގޮތުގައި ބުރާސްފަތި ދުވަހު ސުޕްރީމް ކޯޓުން ނިންމި ނިންމުމަށް ފަހުވެސް އިމްރާން ޚާނަށް ސިޔާސީ "އެނބުރި އައުމަކަށް" ފުރުސަތު އެބައޮތެވެ. އެއީ އޭނާ ކަންތައް ކުރައްވާ ގޮތެއްގެ ނަތީޖާއެއްގެ ގޮތުންނެވެ.
ސުޕްރީމް ކޯޓުގެ އަމުރާއެކު ކުރެއްވި ޓްވީޓްގައި އިމްރާން ޚާން ވަނީ، ކްރިކެޓް މެޗަކަށް ނިސްބަތް ކުރައްވާ "ފަހުބޯޅަ" އަންނަންދެން މައިދާނުގައި ހުންނަވާނެ ކަމަށް ވިދާޅުވެފައެވެ. މިހާރު ބައެއް މީހުން ކުރާ ސުވާލަކީ ކްރިކެޓް މައިދާނުގައި އޭނާއަށް ކުރިން ލިބިވަޑައިގެންނެވި ލޯބި އަދިވެސް އެގޮތުގައި އެބައޮތްތޯ ކުރެވޭ ސުވާލެވެ.
އަނެއްސުވާލަކީ އިމްރާން ޚާންގެ ޕީޓީއައި ޕާޓީގެ މުސްތަގްބަލާއި ބެހޭގޮތުން އުފެދިފައިވާ ސުވާލެވެ. ޚާއްސަކޮށް އެގައުމުގައި ބޭރުގެ ނުފޫޒު އޮތްކަމަށް އެޕާޓީން ބުނި ބުނުން ސުޕްރީމް ކޯޓުން ގަބޫލުކޮށްފައިނުވާތީ އެޕާޓީން ދައްކާ ވާހަކަ ގަބޫލުކުރަން އާންމު ރައްޔިތުންނަށް ދެން ދަތިވާނެތީއެވެ.
ގެމްބްލް ކުރުމަށް ނިސްބަތްކޮށް އިދިކޮޅު ބައެއް ފަރާތްކުން ބުނާ ގޮތުގައި އިމްރާން ޚާނަކީ އަބަދުވެސް ސްޓޭކް ނުވަތަ ފައިސާ ނެތި ގެންބްލް ކުރައްވާ ބޭފުޅެކެވެ. މާނައަކީ ބޭރުގެ ނުފޫޒުގެ ވާހަކަ އަކީވެސް ހަގީގަތެއްނެތި ދެއްކެވި ވާހަކަފުޅެކެވެ. އެފަރާތްތަކުން ބުނާ ގޮތުގައި ސިޔާސީ ހަނގުރާމައިގައި ދެން އިމްރާން ޚާނަށް އޮތް ގޮތަކީ ބަލި ގަބޫލުކުރެއްވުމެވެ.
ނަމަވެސް ޕާކިސްތާންގެ އިންސްޓިޓިއުޓް އޮފް ލެޖިސްލޭޓިވް ޑިވެލޮޕްމަންޓް އެންޑް ޓްރާންސްޕޭރަންސީގެ ރައީސް ބިލާލް މެހްބޫބް ދެކޭގޮތުގައި އިމްރާން ޚާން އަދި ޕީޓީއައި އަށް އޮތް ތާއީދު އަދި މިވަގުތު، ކުރުމުއްދަތަކަށް ނަމަވެސް އޮންނާނެއެވެ. އިމްރާން ޚާން އަކީ ދެއްވަން ބޭނުންފުޅު ސިޔާސީ މެސެޖްތައް ދެއްވުމުގައި ކާމިޔާބު ބޭފުޅެއްކަމަށާއި ކުރިޔަށް ކަންތައް ވާނެ ގޮތެއް އެނގޭނީ ދެން އެޕާޓީން އަޅާ ފިޔަވަޅުތަކުން ކަމުގައި އޭނާ ބުނެފައިވެއެވެ.
އެޕާޓީގެ އިސްފަރާތްތަކާއި ހަވާލާދީ ލިބޭ ރިޕޯޓްތައް ބުނާ ގޮތުން މިއަދު، ހުކުރު ދުވަހު އަނެއްކާވެސް "ސަޕްރައިސް" އެއް އިއުލާން ކުރައްވަން އިމްރާން ޚާން ވަނީ ތައްޔާރުވެފައެވެ. މިކަމުގެ ތަފްސީލް އަދި ހާމަވެފައި ނުވި ނަމަވެސް މިއަދުވަނީ ފެޑަރަލް ކެބިނެޓްގެ ބައްދަލުވުމެއް ބާއްވަން ނިންމާފައެވެ. އަދި ހަމަ މިއަދު އިމްރާން ޚާން ގައުމާއި މުޚާތަބުކުރެއްވުމަށް ވެސް ވަނީ ހަމަޖެހިފައެވެ. މިތަގްރީރްގައި ޕާޓީގެ ނިންމުން ހާމަކުރައްވާނެ ކަމަށް ވަރަށް ބޮޑަށް ބެލެވެއެވެ.
