"ޖިނާއީ އިޖުރާއާތުގެ ޤާނޫނާއި ގަވާއިދުގައި މުއްދަތުތައް ތަންފީޒުކުރާ ގޮތަކީ އަޖާއިބުވަނިވި ކަމެއް"
ޖިނާއީ މައްސަލައެއް ތަޙްޤީޤު ކުރުމަށް ފުލުހުންނަށް މުއްދަތުތަކެއް ހުރޭ
ޕީޖީ ހުސައިން ޝަމީމް ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަނީ
ޖިނާއީ އިޖުރާއާތުގެ ޤާނޫނާއި ގަވާއިދުގައި މުއްދަތުތައް ތަންފީޒުކުރާ ގޮތަކީ އަޖާއިބުވަނިވި ކަމެއްކަމަށް ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް ވިދާޅުވެއްޖެއެވެ.
ޝަމީމް އެހެން ވިދާޅުވީ ސީލައިފް މޯލްޑިވްސް ޕްރައިވެޓް ލިމިޓެޑްގެ ވެރިޔާ އަދި ޑިރެކްޓަރ އަހުމަދު މޫސާ މުހައްމަދު (އައްމަޓީ) ދޫކޮށްލުމަށް ކްރިމިނަލް ކޯޓުން ނިންމި ނިންމުން ހައިކޯޓުގައި އިސްތިއުނާފު ކުރުމުން ހައިކޯޓުން އެ މައްސަލަ ބޭރުކޮށްލެއްވުމާއި ގުޅިގެން އޭނާގެ ބްލޮގްގައި ޝާއިއު ކުރެއްވި ލިއުމެއްގައެވެ.
ޝަމީމް ވިދާޅުވި ގޮތުގައި ޖިނާއީ މައްސަލައެއް ތަޙްޤީޤު ކުރުމަށް ފުލުހުންނަށް މުއްދަތުތަކެއް ހުރެއެވެ. މިސާލެއްގެ ގޮތުން، މީހަކު ބަންދުކޮށްފައި ހުރިނަމަ، 30 ދުވަސް ކަނޑައެޅިފައިވާއިރު، ބަންދުން ދޫކޮށްލައިފިނަމަ، 45 ދުވަސް ލިބިގެންވެއެވެ.
ހަމައެއާއެކު، ތަޙްޤީޤުކުރުމުގެ މުއްދަތު އިތުރުކުރެވޭ ގޮތެއްވެސް އޮންނައިރު، އެގޮތުން ލިބޭ މުއްދަތެއްގައި ތަޙްޤީޤު ނިންމައި، ޕީޖީ އޮފީހަށް ނުފޮނުއްވިއްޖެނަމަ، އެ މައްސަލައެއްގައި ޕީޖީ އޮފީހުން ދަޢުވާއެއް ނުކޮށްދޭކަމަށް ޝަމީމް ވިދާޅުވިއެވެ. އެހިސާބުން އެ މައްސަލަ ޕީޖީ އޮފީހުން އަނބުރާ ފޮނުވާލަނީއެވެ.
ޖިނާއީ އިޖުރާއާތުގެ ޤާނޫނާއި ގަވާއިދުގައި މުއްދަތުތައް ތަންފީޒުކުރާ ގޮތަށް ބަލާއިރު، ޕީޖީ އޮފީހަށް މައްސަލަ ލިބޭ ދުވަހުން ފެށިގެން، ދައުވާ ކުރުމަށްވެސް ލިބެނީ ވަކި މުއްދަތެއް ކަމަށް ޝަމީމް ވިދާޅުވިއެވެ. އެ މުއްދަތުގެ ތެރޭގައި ދައުވާ ނުކުރެވިއްޖެނަމަ، އެމައްސަލަ ޝަރްޢީ ކޯޓަކުން ބަލައެއް ނުގަނެއެވެ. އެއީ ކިތަންމެ ޙައްސާސް، ކިތަންމެ އުނދަގޫ މައްސަލައެއްކަމަށް ވިޔަސް އެހިސާބުން އެ މައްސަލައެއް ބަލައި ނުގަންނަ ކަމަށް ޝަމީމް ވިދާޅުވިއެވެ.
މި އުސޫލުން ބަލާއިރު، ޖިނާއީ އިޖުރާއަތުގެ ޤާނޫނުގައި، ކޯޓުތަކުން ކުރައްވަން ޖެހިވަޑައިގަންނަވާ ކަންކަމުގެ މުއްދަތުތަކެއްވެސް ހިމެނޭއިރު، އެކަމާއި ގުޅިގެން ޝަމީމް އިތުރު ތަފްސީލަކަށް ވަޑައިގެންފައެއް ނުވެއެވެ. އެހެންނަމަވެސް ޝަމީމް ވަނީ ދާދި ފަހުން ޕީޖީ އޮފީހުން އަނބުރާ ގެންދެވި މައްސަލައަކަށް އަލިއަޅުވާލައްވާފައެވެ.
އެ މައްސަލައިގައި ތުހުމަތު ކުރެވޭ މީހާ، ޝަރީޢަތުގެ މަޖިލީހުގައި ކުށަށް އިޢުތިރާފު ވެފައިވާކަމަށް ޝަމީމް ވިދާޅުވިއެވެ. ޤާނޫނު ބުނާ ގޮތުން، އެ ޙާލަތުގައި ބާއްވަންޖެހެނީ އަވަސްނިޔާއިން ޙުކުމް ކުރުމުގެ ޝަރީޢަތަކަށްވާއިރު، އެކަން ކުރަން ޖިނާއީ އިޖުރާއަތުގެ ޤާނޫނުގެ 139 (ށ) ގައި އޮތް މުއްދަތަކީ 5 ދުވަސްކަމަށް ޝަމީމް ވިދާޅުވިއެވެ.
އެހެންނަމަވެސް، އެ މައްސަލައިގެ ޙުކުމް ކުރުމުގެ އަޑުއެހުމެއް ނުބޭއްވި، ޝެޑިއުލްވެސް ނުކުރައްވައި، އަހަރަކަށްވުރެ ގިނަދުވަސް ވެފައިވާއިރު، އެ މައްސަލައިގައި ތުހުމަތު ކުރެވުނު މީހާ އެކަމުގެ ޝަކުވާކުރާކަމަށް ޝަމީމް ވިދާޅުވިއެވެ. އަދި މިހާރު އެ މައްސަލަ އަނބުރާ ގެންގޮސްފައިވާނެކަން ޝަމީމް ފާހަގަ ކުރެއްވިއެވެ.
