ރަމަޟާންމަހާ ދިމާކޮށް ކުނި އުފައްދާ މިންވަރު އިތުރުވެއްޖެ: އީޕީއޭ
6 އެޕްރީލު 2022 | ބުދަ 16:45އެއްފަހަރު ބޭނުންކޮށްފައި އުކާލާ ޒާތުގެ ކުނި ރަމަޟާންމަހު ވަނީ އިތުރުވެފައި
ވެމްކޯ ކުނި އުކާލުން
ރަމަޟާންމަހާ ދިމާކޮށް ކުނި އުފައްދާ މިންވަރު އިތުރުވެފައިވާކަމަށް އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ)އިން ބުނެފިއެވެ.
އީޕީއޭއިން ކުރި ޓްވީޓެއްގައި ބުނީ މި ރަމަޟާން މަހު ކުނި އުފައްދާ މިންވަރު ވަރަށް ބޮޑަށް އިތުރު ވެފައިވާކަމަށެވެ. ވަކިން ޚާއްސަކޮށް އެއްފަހަރު ބޭނުންކޮށްފައި އުކާލާ ޒާތުގެ ކުންޏާއި، ކާނާގެ ބާވާތްތައް އުކާ މިންވަރު އިތުރުވެފައިވާކަން ފާހަގަކުރެވިފައިވާކަމަށް އެ އެޖެންސީން ބުނެފައިވެއެވެ.
އެހެންކަމުން އީޕީއޭއިން ވަނީ ކޮންމެ ދުވަހަކުވެސް ކުނި އުފެއްދޭ މިންވަރު ބެލުމަށާއި، ކުނި އުފައްދާ މިންވަރު ކުޑަކުރުމަށް އިތުރު ސަމާލުކަމެއް ދިނުމަށް އިލްތިމާސްކޮށްފައެވެ. އަދި އެއްފަހަރު ބޭނުންކޮށްފައި އުކާލާ ޒާތުގެ ތަކެތި ބޭނުންނުކުރުމަށް އީޕީއޭއިން އިލްތިމާސްކޮށްފައިވެއެވެ.
ރާއްޖޭގެ ތިމާވެށި ހިމާޔަތްކުރުމުގެ ގޮތުން ސިންގަލް ޔޫސް ޕްލާސްޓިކުގެ 13 ބާވަތެއް ރާއްޖޭގައި އުފެއްދުމާއި ބާޒާރަށް ނެރުން، މިއަހަރުގެ ވަކި ތާރީޚުތަކަކުން ފެށިގެން މަނާވާނެކަމަށް މިހާރު ވަނީ ކަނޑައަޅާފައެވެ. ބާޒާރަށް ނެރުން މަނާ ތަކެތި ކަނޑައަޅާފައިވާއިރު، ބާޒާރަށް ނެރުން މަނާކުރުމަށް ހުށަހަޅާފައިވާ ތާރީޚުތަކަކީ 2022 ވަނަ އަހަރުގެ ޖޫން 1، އަދި ސެޕްޓެމްބަރ 1, 2023 ވަނަ އަހަރުގެ މާރޗް 1 އަދި 2024 ވަނަ އަހަރުގެ މާރޗް 1ން ފެށިގެންނެވެ. އުފެއްދުން މަނާކުރުމަށް ހުށަހަޅާފައިވާ ތާރީޚުތަކަކީ 2022 ވަނަ އަހަރުގެ ޖޫން 1، ޑިސެމްބަރ 1, އަދި 2023 ވަނަ އަހަރުގެ ޑިސެމްބަރ 1ން ފެށިގެންނެވެ.
