ޗެލްސީ މެޗަށް އަންޗެލޮޓީ ރަނގަޅުވެއްޖެ

ޔުއެފާ ޗެމްޕިއަންސް ލީގުގެ ކުއާޓާ ފައިނަލުގައި ރެއާލް މެޑްރިޑާއި ޗެލްސީ ބައްދަލުކުރާ މެޗަށް ރެއާލްގެ ކޯޗު ކާލޯ އަންޗެލޮޓީ ރަނގަޅުވެއްޖެއެވެ.

މިފަހުން އަންޗެލޮޓީ ވަނީ ކޮވިޑަށް ޕޮޒިޓިވްވެފައެވެ. އޭގެ ސަބަބުން ސެލްޓަ ވީގޯ އާއި ދެކޮޅަށް މާޗް 30 ވަނަ ދުވަހު ކުޅުނު މެޗު އޭނާއަށް ގެއްލުނެވެ. އެމެޗުގައި ރެއާލްގެ ޓީމާއި ހަވާލުވީ އަންޗެލޮޓީގެ ދަރިފުޅު ޑޭވިޑް އަންޗެލޮޓީ އާއި ޔޫތު ޓީމުގެ ކޯޗު އަބިއަން ޕަރޑޯމޯއެވެ. މި މެޗުން ހަނި ގޮތަކަށް ރެއާލް މޮޅުވީ 2-1 ގެ ނަތީޖާއަކުންނެވެ. އެއީ ލިބުނު 3 ޕެނަލްޓީގެ ތެރެއިން ދެޕެނަލްޓީ ކާމިޔާބުކޮށްގެންނެވެ.

ޗެމްޕިއަންސް ލީގުގެ ކުއާޓާ ފައިނަލުގައި ރެއާލްއިން ޗެލްސީއާއި ދެކޮޅަށް ނިކުންނާނީ މިރެއެވެ. ފުރަތަމަ ލެގުގައި ރޭ ކުޅުނު މެޗުތަކަށް ބަލާއިރު ބެންފިކާ އަތުން ލިވަޕޫލް މޮޅުވީ 3-1 ގެ ނަތީޖާއަކުންނެވެ. އެތުލެޓިކޯގެ މައްޗަށް ސިޓީން ކުރިހޯދީ 1-0 ންނެވެ.

ރެއާލް އާއި ޗެލްސީ މެޗުގެ އިތުރުން ޗެމްޕިއަންސް ލީގު ކުއާޓާ ފައިނަލުގައި ބަޔާން މިއުނިކާއި ވިޔަރެއާލްވެސް މިރޭ ބައްދަލުކުރާނެއެވެ. މި މެޗުތައް އޮންނާނީ ރާއްޖެ ގަޑިން ދަންވަރު 12 ޖަހާއިރުއެވެ.