އައްޑޫ ސިޓީގެ ބިން ހިއްކުމުގެ އަމަލީ މަސައްކަތް ފަށަން އަދި ތިން ހަތަރު މަސް ނަގާފާނެ – މިނިސްޓަރު އަސްލަމް
އީއައިއޭގެ ތެރެއިން ފާހަގަކުރެވުނު ވަރަށް ގިނަ ކަންތައްތަކަށް އެޑްރެސް ކުރަންޖެހިފައި އަދިވެސް އެޑްރެސް ކުރަންޖެހޭ ކަންކަން ހުރި
މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް
އައްޑޫ ސިޓީގެ ބިން ހިއްކުމުގެ މަސައްކަތުގެ އަމަލީ މަސައްކަތް ފަށަން ތިނެއް ނުވަތަ ހަތަރު މަސް ނަގާފާނެ ކަމަށް މިނިސްޓަރ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
މިނިސްޓަރު އަސްލަމް މިހެން ވިދާޅުވީ ބުދަ ދުވަހުގެ މަޖިލީހުގެ ޖަލްސާގައި ވަޒީރުންނާއި ސުވާލުކުރުމުގެ ބައިގައި މަރަދޫ ދާއިރާގެ މެންބަރު އިބްރާހިމް ޝަރީފް ކުރެއްވި ސުވާލަށް ޖަވާބު ދެއްވަމުންނެވެ. ޝަރީފް ކުރެއްވި ސުވާލަކީ، އައްޑޫ ސިޓީގެ ބިން ހިއްކުން ލަސްވެގެންދާތީ އައްޑޫ ސިޓީގެ ރައްޔިތުން ވަރަށް ބޮޑަށް ޝަކުވާކުރާ ކަމަށާއި، މިހާރު އެވޯޑްވެސް ކުރެވިފައި އޮތް އިރު، މަސައްކަތް ކުރެވޭނެ ތާރީހެއް ދެންނެވުމަށެވެ.
މި ސުވާލަށް ޖަވާބުދެއްވަމުން މިނިސްޓަރު އަސްލަމް ވިދާޅުވީ އައްޑޫ ބިން ހިއްކުމުގެ މަސައްކަތް އެވޯޑެއް ނުކުރާ ކަމަށެވެ. ނަމަވެސް ކޮންޓްރެކްޓުގައި ސޮއިކޮށްފައިވާނެ ކަމަށާއި، ކޮންޓްރެކްޓުގައި ސޮއިކުރުމާއި އެވޯޑް ކުރުމަކީ ދެކަމެއް ކަމަށެވެ. އަދި އެވޯޑްކުރިތާ ވަރަށް ދުވަސް ފަހުން ކޮންޓްރެކްޓުގައި ސޮއިކޮށްފައިވާ ކަމަށާއި، އެއީ އައްޑޫގައި ބިން ހިއްކުމާއި ގުޅޭ ގޮތުން ހެދި އީއައިއޭގެ ތެރެއިން ފާހަގަކުރެވުނު ވަރަށް ގިނަ ކަންތައްތަކަށް އެޑްރެސް ކުރަންޖެހިފައި އަދިވެސް އެޑްރެސް ކުރަންޖެހޭ ކަންކަން ހުރިކަމަށް ބަލާފައި އެ މަސައްކަތް ލަސްވެގެން ގޮސްފައިވާ ކަމަށެވެ.
މިނިސްޓަރު ވިދާޅުވީ މަސައްކަތް މިހާރު ކުރިއަށްދާނީ ވެން އޫޑް ކިޔާ ކުންފުންޏަކުން ކަމަށާއި، އެ ކުންފުނިން އައްޑޫގެ އެތެރެވަރިން ވެލި ނެގެން ހުރި ތަންތަނުގެ ތެރެއިން ކިތައް ތަނުން ވެލި ނަގަން ޖެހޭނެތޯ ބެލުމަށްޓަކައި ހަދަންޖެހޭ ސޭންޑް ސައިޓްގެ ސަރވޭ ކުރާނެ ކަމަށެވެ. އަދި އަންދާޒާ ކުރަނީ ތިން ހަތަރު މަސް ވެލި ޕަމްޕް ކުރުމަށްޓަކައި ނަގާނެ ކަމަށެވެ. ނަމަވެސް އޭގެ ކުރިން ބަންޑުވޯލް ޖަހަންޖެހޭ ތަންތަނުގައި ބަންޑުވޯލް ޖެހުމުގެ މަސައްކަތް ކުރިއަށްދާނެ ކަމަށް މިނިސްޓަރު ވިދާޅުވިއެވެ.
އައްޑޫ ސިޓީގެ ބިން ހިއްކުމުގެ މަޝްރޫޢުގެ އެއްބަސްވުމުގައި ސޮއިކޮށްފައިވަނީ މިދިޔަ މާޗް މަހުގެ 27 ވަނަ ދުވަހުއެވެ. އިންޑިއާގެ އެގްޒިމް ބޭންކުގެ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން ވެން އޫޑް އިންޑިޔާ ޕްރައިވެޓް ލިމިޓެޑާއި ދިވެހި ސަރުކާރާއި ދެމެދު ސޮއިކުރި އެއްބަސްވުމުގެ ދަށުން އައްޑޫ ސިޓީއަށް 194.3 ހެކްޓަރުގެ ބިން އިތުރުކުރެވޭނެއެވެ.
އެގޮތުން ހިތަދޫއަށް 90 ހެކްޓަރު ބިމާއި މަރަދޫ/މަރަދޫފޭދޫއަށް 16 ހެކްޓަރުގެ ބިމާއި ފަތުރުވެރިކަމަށް ޚާއްސަކުރެވިގެން އައްޑޫ ސިޓީ ފަޅުތެރޭއިން 8.3 ހެކްޓަރުގެ 3 ރަށަކާއި 4 ލޭން ޑިޓުއަރ ލިންކު ރޯޑުގެ ބްރިޖުގެ އެމްބޭންޓްމަންޓަށް 3.3 ހެކްޓަރު ބިން ހިއްކުމަށް ވަނީ ހަމަޖެހިފައެވެ.
މީގެއިތުރުން އައްޑޫ ސިޓީ ހުޅުދޫ އާއި މީދޫން 32.3 ހެކްޓަރުގެ ބިމާއި ފަތުރުވެރިކަމަށް ޚާއްސަކުރެވިގެން 5 ހެކްޓަރުގެ 2 ރަށް އިތުރުކުރުމުގެ މަސައްކަތް ދިވެހި ސަރުކާރުގެ ބަޖެޓުން ޚަރަދުކޮށްގެން އެމްޓީސީސީއާއި ޙަވާލުކޮށްގެން ކުރިއަށް ގެންދިއުމަށް ކަނޑައަޅާފައިވާއިރު، ހުޅުދޫއާއި މީދޫއަށް އިތުރުކުރާ 32.3 ހެކްޓަރުބިމުގެ ގޮނޑުދޮށް ޙިމާޔަތްކުރުމަށް 455 މީޓަރުގެ ބޮޑުހިލައާއި 332 މީޓަރުގެ ޖިއޯބޭގް ޖެހުމުގެ މަސައްކަތްވެސް ކުރިއަށްގެންދާނެއެވެ.
އަދި ފަތުރުވެރިކަމަށް ޚާއްސަކުރެވިގެން ހިއްކުމަށް ހަމަޖެހިފައިވާ 5 ހެކްޓަރުގެ 2 ރަށުގެ ގޮނޑުދޮށް ޙިމާޔަތްކުރުމަށް ޖުމްލަ 2004 މީޓަރުގެ ޖިއޯޓިއުބް ރިވެޓްމަންޓްޖެހުން ހިމެނެއެވެ. 18 މަސްދުވަސް ތެރޭގައި ނިންމުމަށް ޙަވާލުކުރި މި މަޝްރޫއަކީ ޖުމްލަ 1.3 ބިލިއަން ރުފިޔާގެ މަޝްރޫއެކެވެ.
