ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ލުނބޯ ކިލޯއެއް 45 ރުފިޔާއަށް ވިއްކަން ފަށައިފިއެވެ.

ރާއްޖެއަށް ލުނބޯ ލިބުމުގައި ހުރި ދަތިތަކެއްގެ ސަބަބުން ބާޒާރުގައި ލުނބޯގެ އަގުވަނީ ވަރަށް ބޮޑުވެފައެވެ. މިގޮތުން ބާޒާރުމަތިން ލުނބޯ ކިލޯއެއް ވިއްކަމުންދަނީ 120 ރުފިޔާއާއި 150 ރުފިޔާއާއި ދެމެދުގެ އަގެއްގައެވެ.

މި ދަނޑިވަޅުގައި އެސްޓީއޯއިން ވަނީ ހެޔޮ އަގުގައި ލުނބޯ ވިއްކަން ފަށާފައެވެ. މިކަމާއި ގުޅިގެން އެސްޓީއޯއިން ބުނީ އެކުންފުނިން ލުނބޯ އެތެރެކޮށް ވިއްކަން ނިންމީ މިވަގުތު ބާޒާރުގައި ލުނބޯގެ އަގު މައްޗަށް ދިއުމާއި ގުޅިގެން އާއްމު ރައްޔިތުންނަށް އަގުހެޔޮކޮށް ލުނބޯ ލިބޭނެ އިންތިޒާމެއް ހަމަޖެއްސުމަށް ކަމަށެވެ.

އެސްޓީއޯ ޕީޕަލްސް ޗޮއިސް އިން 45 ރުފިޔާއަށް ލުނބޯ ކިލޯ ލިބެން ހުންނާނެ ކަމަށް އެ ކުންފުނިން ބުނެއެވެ. އެސްޓީއޯއިން ބުނީ ކޮންމެ މީހަކަށް ވިއްކާނީ ލުނބޯ ކިލޯއެއްގެ މަގުން ކަމަށެވެ. އަދި އެ ކުންފުނީގެ އެގްރިސެންޓަރުން މީހަކަށް 3 ކިލޯގެ ރޭޓުން ލުނބޯ ވިއްކަމުންދާނެ ކަމަށް އެސްޓީއޯއިން ބުނެއެވެ.