މިރުސް ކިލޯއެއް އަގު 800ރ. އިން 250ރ. އަށް ތިރިވެއްޖެ!
15 ޖޫން 2017 | ބުރާސްފަތި 09:02ރޯދަ މަސް ފެށުނު އިރު މިރުސްކިލޯއެއް ވަނީ 800ރ. އާއި 700ރ. އަށް އަރާފަ
މާރުކޭޓުގައި މިރުސް ބެހެއްޓިފައި
މިރުހުގެ އަގު ވަރަށް ބޮޑުތަން ހެޔޮވެއްޖެ އެވެ.
ލޯކަލް މާރުކޭޓުގައި މިރުސް ކިލޯއެއްގެ އަގު އުޅެނީ، 250ރ. އާއި 300ރ. އާ ދެމެދުގެ އަގުތަކެއްގަ އެވެ. އެގޮތުން 100 ގްރާމު އުޅެނީ، 30ރ. އާއި 40ރ. އާ ދެމެދުގެ އަގުތަކެއްގަ އެވެ.
މާރުކޭޓުގައި މިރުސް އެންމެ ގިނައިން ލިބެން ހުރީ ކެންދިކުޅުދޫ މިރުހެވެ. ކުރިން ލ. އަތޮޅުން މިރުސް ލިބެން ހުރި ނަމަވެސް މިހާރު ލ. އަތޮޅުން މިރުސް ނުލިބޭ ކަމަށް ތަކެތި ވިއްކާ ފަރާތްތަކުން ބުނެ އެވެ.
މިރުހުގެ އަގު ދަށަށް ޖެހިފައިވާ އިރު، ރަމަޟާން މަސް ފެށުނު އިރު މިރުސް ކިލޯއެއްގެ އަގު އުޅުނީ 800ރ. އާއި 700ރ. އާ ދެމެދުގެ އަގުތަކެއްގަ އެވެ.
ކުރިއަށް އޮތް ތަނުގައިވެސް މިރުހުގެ އަގު ހެޔޮވެގެންދާނެ ކަމަށް ތަކެތި ވިއްކާ ފަރާތްތަކުން ބުނެ އެވެ.
މިރުހުގެ އަގު ވަރަށް ބޮޑުތަން ހެޔޮވެފައިވާ އިރު ކަރާ އަދި ފަތުގެ ބާވަތްތަކުގެ އަގުތައް އުފުލިގެންދާނެ ކަމަށް ތަކެތި ވިއްކާ ފަރާތްތަކަށް ބުނެ އެވެ.
ކަރާ ކިލޯއެއްގެ އަގު 25ރ. އާއި 30ރ. އާ ދެމެދުގެ އަގުތަކެއްގައި ހުރި އިރު، ކޮޕީ ފަތް ބޮޑިއެއްގެ އަގު އުޅެނީ، 20ރ. އާއި 25ރ. އާ ދެމެދުގަ އެވެ.
މަސްމާރުކޭޓުގައި ކަނޑު މަސް ކިލޯއެއްގެ އަގު އުޅެނީ، 30ރ. އާއި 40ރ. އާ ދެމެދުގެ އަގުތަކެއްގަ އެވެ.
