ލަންކާގައި ހިނގަމުންދާ ހަމަނުޖެހުމުގެ އަސަރު ރާއްޖޭގެ ފަތުރުވެރިކަމަށް ކުރޭ: މައުސޫމް

ސްރީލަންކާގައި ހިނގަމުންދާ ހަމަނުޖެހުންތަކުގެ އަސަރު ރާއްޖޭގެ ފަތުރުވެރިކަމަށް ކޮންމެވެސް ވަރަކަށް ކުރަމުންދާކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން މިނިސްޓަރު މައުސޫމް ވިދާޅުވީ ސްރީލަންކާއަކީ ރާއްޖޭގެ ފަތުރުވެރިކަމުގެ ޕާޓްނަރެއް ކަމަށެވެ. ވަކިން ޚާއްސަކޮށް ސްރީލަންކާގެ ވެރިރަށް ކޮލަމްބޯއާއި، ސްރީލަންކަން އެއާލައިނަކީ ރާއްޖޭގެ ފަތުރުވެރިކަމަށް މުހިންމު ދެ ބައިވެރިން ކަމުގައި މިނިސްޓަރު ވިދާޅުވިއެވެ.

ވަރަށް ގިނަ ގައުމުތަކުން އަންނަ ފަތުރުވެރިން ސްރީލަންކާ މަގުން ރާއްޖެ އަންނަކަން ފާހަގަކުރައްވައި މިނިސްޓަރު ވިދާޅުވީ މިހާރު ލަންކާގައި ހިނގަމުންދާ ހަމަނުޖެހުންތަކުގެ ސަބަބުން ރާއްޖޭގެ ފަތުރުވެރިކަމަށް ކޮންމެވެސް ވަރެއްގެ އަސަރެއް ކޮށްފައިވާކަމަށެވެ. އެހެންކަމުން މި ހަމަނުޖެހުންތައް ހުއްޓުން ވެގެންދާނީ ރާއްޖޭގެ ފަތުރުވެރިކަމަށް ހެޔޮ އަސަރެއް ކުރާނެ ކަމެއް ކަމުގައި ޓޫރިޒަމް މިނިސްޓަރު ވިދާޅުވިއެވެ.

މިވަގުތު ރަޝިޔާ އަދި ޔޫކްރެއިން މާކެޓަށްވެސް ބޮޑު ލޮޅުމެއް އައިސްފައިވުމާއެކު އެހެނިހެން މާކެޓުތަކަށް ރާއްޖެ އިޝްތިހާރުކުރުމުގެ މަސައްކަތް ފަށަން ވެފައިވާކަމަށް މިނިސްޓަރު ވިދާޅުވިއެވެ. އެގޮތުން ރާއްޖެއާއި ކައިރިން ބޮޑު މާކެޓެއް އޮތުމަކީ އެކަމުން ވަރަށް ބޮޑު ފައިދާއެއް ކުރާނެ ކަމެއް ކަމަށް މިނިސްޓަރު ވިދާޅުވިއެވެ.

ޓޫރިޒަމް މިނިސްޓަރު މައުސޫމް ވިދާޅުވީ އެހެން މާކެޓުތަކުގައި ރާއްޖެ އިޝްތިހާރުކުރުމުގެ މަސައްކަތް ހުއްޓާނުލާ ކުރިއަށްގެންދަންޖެހޭ ކަމަށެވެ. ރާއްޖެއިން ފަތުރުވެރިކަން ކުރިއަރުވަން ކުރަމުންދާ މަސައްކަތަކީ ވާދަވެރި މަސައްކަތެއް ކަމަށާއި، އެހެންނަމަވެސް މިއަދު ރާއްޖެ އޮތީ މުޅި ދުނިޔޭގެ އެއްވަނަ މާކެޓުގެ ގޮތުގައިކަން މިނިސްޓަރު ފާހަގަކުރެއްވިއެވެ.

ރާއްޖޭގެ ފަތުރުވެރިކަމަކީ އެހެން ހުރިހާ ގައުމަކާއި އަޅާ ބަލާއިރުވެސް ތަފާތު ފަތުރުވެރިކަމެއް ކަމަށާއި، މިކަންކަމާއެކު އެހެން މާކެޓުތަކުގެ މަގުބޫލުކަން ހޯދުމުގެ ފުރުސަތު ލިބިގެންދާކަމުގައި މިނިސްޓަރު ވިދާޅުވިއެވެ.

މިއަހަރަކީ ރާއްޖޭގެ ފަތުރުވެރިކަމުގެ ރަން އަހަރަށް ވާތީ މިއަހަރަކީ އާދަޔާ ޚިލާފަށް ކާމިޔާބު އަހަރަކަށް ވާން ބޭނުންވެވަޑައިގަންނަވާ ކަމަށާއި، ގޮންޖެހުންތަކާއެކުވެސް އެކަން އެގޮތަށް ވާނެ ކަމަށް ޔަގީންކުރައްވާކަމުގައި ޓޫރި މިނިސްޓަރު މައުސޫމް ވިދާޅުވިއެވެ.