ސިޔާސީ ޕާޓީތަކަށް ވަންނަ މީހުންގެ ނަން ހާމަކޮށް އެމީހަކަށް މެސެޖް ފޮނުވަނީ
އީސީން ބުނީ 01 އޭޕްރީލް ގެ ފަހުން ހުށަހަޅާ މެމްބަރޝިޕް ފޯމްތަކުގެ ލިސްޓު ކޮމިޝަނުގެ ވެބްސައިޓްގައި އާއްމު ކުރުމަށް ކޮމިޝަނުން ނިންމާފައިވާކަމަށް
އިލެކްޝަންސް ކޮމިޝަންގެ މެމްބަރުން
ސިޔާސީ ޕާޓީ ތަކުން ހުށަހަޅާ މެމްބަރޝިޕް ފޯމުތަކުގެ ޞައްޙަކަން އިތުރަށް ކަށަވަރުކުރުކޮށް ޕާޓީތަކުގެ ދަފުތަރު މިހާރަށްވުރެ ޚަރުދަނާކުރުމަށް އިލެކްޝަންސް ކޮމިޝަން (އީސީ)ން ފިޔަވަޅުތަކެއް އަޅަން ނިންމައިފިއެވެ.
އެކަމާއި ގުޅިގެން އީސީން ބުނީ 01 އޭޕްރީލް ގެ ފަހުން ހުށަހަޅާ މެމްބަރޝިޕް ފޯމްތަކުގެ ލިސްޓު ކޮމިޝަނުގެ ވެބްސައިޓްގައި އާއްމު ކުރުމަށް ކޮމިޝަނުން ނިންމާފައިވާކަމަށެވެ. އެގޮތުން ހުރިހާ ސިޔާސީ ޕާޓީތަކެއްގެ މެމްބަރުންގެ ލިސްޓު 01 އޯގަސްޓު ގައި ކޮމިޝަނުގެ ވެބްސައިޓްގައި އާއްމުކުރުމަށް ކޮމިޝަނުން ވަނީ ނިންމާފައެވެ.
އީސީގެ ނައިބު ރައީސް އިސްމާއީލް ހަބީބު ވިދާޅުވީ ސިޔާސީ ޕާޓީތަކުގެ ދަފްތަރުގެ ސައްޙަކަން އިތުރަށް ކަށަވަރު ކުރުމަށްޓަކައި، މިމަހުން ފެށިގެން ޕާޓީތަކަށް ވަންނަ މީހުންގެ މަޢުލޫމާތު އީސީގެ ވެބްސައިޓުގައި ޢާންމުކުރުމުގެ އިތުރުން އެމީހަކަށްވެސް މެސެޖަކުން އެކަން އަންގަން ކޮމިޝަނުން ނިންމާފައިވާކަމަށެވެ.
ޕާޓީއަކަށް ވަންނަން ފޯމު ހުށަހަޅާއިރު އައިޑީކާޑު ކޮޕީ އާއި ފިންގަޕްރިންޓް އަދި ހަތަރު މީހެއްގެ ސޮއެއް އޮންނަން ޖެހެއެވެ. އޭގެތެރޭގައި އެ ފޯމަށް ޒިންމާވާނެ ކަމަށް ޕާޓީގެ ރަޖިސްޓްރާ ސޮއިކުރެއެވެ.
އީސީގެ ދަފުތަރުގައި 11 ސިޔާސީ ޕާޓީއެއް މިހާރު ރަޖިސްޓްރީކޮށްފައިވެއެވެ.
ޕާޓީތަކަށް މީހުން އޮޅުވާލައިގެން ވައްދާ މައްސަލަ ވަނީ އާންމުވެފައެވެ.
