ރިސޯޓް ހަދަން އަލަށް ބީލަމަށް ހުޅުވާލި ރަށްތައް އެޕްރީލްގެ ނިޔަލަށް ނިންމައި ހަވާލު ކުރެވޭނެކަމަށް ޓޫރިޒަމް މިނިސްޓަރު އަބްދުﷲ މައުސޫމް ވިދާޅުވެއްޖެއެވެ.

މިނިސްޓަރު ވިދާޅުވީ، އެންމެ ފަހުން ބީލަމަށް ހުޅުވާލި 18 ރަށުގެ ތެރެއިން 9 ރަށަކަށް 13 ފަރާތަކުން ބީލަން ހުށައަޅުއްވާފައިވާ ކަމަށެވެ. 9 ރަށަކަށް ބީލަން ހުށައެޅިފައި ނުވާކަން ފާހަގަކުރައްވަމުން މިނިސްޓަރު ވިދާޅުވީ، މިކަމުން އެނގިގެން ދިޔައީ، ކޮންމެ ރަށަކީ އިންވެސްޓަރުން އިންވެސްޓް ކުރާނެ ރަށެއް ނޫން ކަމަށެވެ. ބީލަން ލިބިފައި އޮތީ ހުޅުވާލި ރަށްތަކުގެ ތެރެއިން ރީތި ރަށްރަށަށް ކަމަށް މިނިސްޓަރު ވިދާޅުވިއެވެ. 

މިނިސްޓަރު ވިދާޅުވީ، އިކުޒިޝަން ކޮސްޓްވެސް މިހާރު ރިވިއު ކުރަން ޖެހޭ ކަމަށެވެ. ޓެކްސް އިން އާމްދަނީ ހޯދަމުން އަންނައިރު، އެކަމުން ދައުލަތަށް އިތުރު އާމްދަނީ އެއް ލިބޭނެ ކަމުގައި ވިދާޅުވިއެވެ.

އަލަށް ހުޅުވާލި ރަށްތައް ހެދޭނެ ކަމުގެ ޔަގީންކަން އެބައޮތް ކަމަށް މިނިސްޓަރު ވިދާޅުވިއެވެ. 2021ވަނަ އަހަރު 7 ރިސޯޓް ހުޅުވިފައިވާއިރު މި އަހަރު 14 ރިސޯޓް ހުޅުވޭނެ ކަމަށް ލަފާ ކުރެވޭނެ ކަމަށް މިނިސްޓަރު ވިދާޅުވިއެވެ.

ނުހެދި ހުރި ރަށްތައް ހެދުމަށް ޓޫރިޒަމްގެ ބައެއް ގަވާއިދުތަކަށް ބަދަލު ގެންނަމުންދާ ކަމަށެވެ. އެގޮތުން ރަށްތަކުގެ ހައްގުތައް ބަދަލު ކުރުމަށް ދޭން ޖެހޭ ފީ ވަރަށް ބޮޑަށް ކުޑަ ކުރެވިފައިވާކަން ފާހަގަކުރެއްވިއެވެ. މިނިސްޓަރު ވިދާޅުވީ، މި އިސްލާހާއެކު ޓޫރިސްޓް ރިސޯޓް ހެދުމަށް ދޫކޮށް ނުހެދި ހުރި ރަށްތަކުގެ ހައްގުތައް ބަދަލުކުރުމަށް ކުރިން ނަގަމުން އަންނަ އެއްލައްކަ ޑޮލަރުގެ ބަދަލުގައި މިހާރު ނަގާނީ 10 ހާސް ޑޮލަރު ކަމަށެވެ. އަދި ހިނގަމުންދާ ރިސޯޓްގެ ހައްގުތައް ބަދަލު ކުރުމަށް ނަގާނީ 50،000 ޑޮލަރު ކަމަށެވެ.

މިހާރު މިވަނީ ވަރަށް ބޮޑެތި ލުއިތަކެއް ދީފައި ކަމަށް މިނިސްޓަރު ވިދާޅުވިއެވެ. ރަށްތައް އަތުލުމުގައި ސަރުކާރުގެ ވިސްނުމެއް ނެތް ކަމަށެވެ. އެހެންނަމަވެސް ދައުލަތުގެ މުދަލުން ދައުލަތަށް ފައިދާވާން ޖެހޭނެކަން ފާހަގަކުރައްވަމުން މިނިސްޓަރު ވިދާޅުވީ، މިހާރު ރިސޯޓް ތަރައްގީ ކުރުމަށް ތިން އަހަރުގެ ފުރުސަތެއް ދިނުމަށް ފަހު، އޮޓޮމެޓިކުން އެގްރިމެންޓް ބާތިލްވާނެ ކަމަށެވެ. ރަށްތައް ތަރައްގީ ކުރުމުގައި ލުތައް ދީގެން ނަމަވެސް އެތައް ތަރައްގީ ކުރުން ވިސްނުން ގެންގުޅުއްވާކަމަށްވެސް މިނިސްޓަރު ވިދާޅުވިއެވެ.

ރިސޯޓްގެ ގޮތުގައި ތަރައްގީކުރުމަށް ސަރުކާރުން ދޫކޮށްފައިވާ 83 ރަށެއް ނުހެދި އެބައޮތެވެ. މިރަށްތައް ތަރައްގީ ކުރުމަށް ސަރުކާރުން އަންނަނީ ބައެއް ލުއިތައްވެސް ދެމުންނެވެެ. އެގޮތުން، ރިސޯޓް ހެދުމަށް ދީފައިވާ މުއްދަތު ހަމަވުމުން ނަގާ ކުލި ރިސޯޓް ހުޅުވެންދެން ފަސްކުރުން ހިމެނެއެވެ.

ރިސޯޓެއް ތަރައްގީ ކުރުމަށް ރަށެއް ދެނީ 3 އަހަރެވެ. ފަޅެއް ހިއްކައިގެން ރިސޯޓް ތަރައްގީ ކުރުމަށް ދެނީ 5 އަހަރެވެ.