ހިޔާ ލޯކަލް މާރުކޭޓްގެ 17 ގޮޅި ހަވާލުކޮށްފި
3 އެޕްރީލު 2022 | އާދީއްތަ 16:51ކުލީގެގޮތުގައި ކޮންމެ މަހަކު 2000 ރުފިޔާ ދައްކަންޖެހޭ
ހިޔާ ލޯކަލް މާރުކޭޓްގެ ގޮޅިތަކަށް 500ށްވުރެ ގިނަ މީހުން އެދިފައިވޭ
ހިޔާ ލޯކަލް މާރުކޭޓްގެ ގޮޅިތައް ލިބުނު މީހުންގެ ތެރެއިން 17 މީހުންނަށް ގޮޅިތައް ހަވާލުކޮށް, އެއްބަސްވުމުގައި ސޮއިކޮށްފިއެވެ.
އެޗްޑީސީން ވަގުތީ ގޮތުން ހަދާ މި މާރުކޭޓުން ދޫކުރުމަށް ހަމަޖެހިފައިވަނީ ޖުމްލަ 19 ގޮޅިއެވެ. އަދި އެ ގޮޅިތަކަށް ކުރިމަތިލުމަށް ފުރުސަތު ހުޅުވާލީ ހަމައެކަނި ހިޔާ ފްލެޓް ލިބުނު މީހުންނަށެވެ. އެޗްޑީސީން ބުނީ 558 ފަރާތަކުން ގޮޅިތަކަށް އެދި ކުރިމަތިލީކަމަށާއި، ގުރުއަތުން ހޮވުނު 19 މީހުންގެ ތެރެއިން 17 މީހަކާއެކު އެއްބަސްވުމުގައި ސޮއިކޮށް ގޮޅި ހަވާލުކޮށްފައިވާކަމަށެވެ.
ވަގުތީ މާރުކޭޓުން ގޮޅިތައް ދޫކޮށްފައިވަނީ 6 މަސް ލދުވަހުގެ މުއްދަތަކަށެވެ. އަދި މި މުއްދަތުގެ ތެރޭގައި ކުލީގެގޮތުގައި ކޮންމެ މަހަކު 2000 ރުފިޔާ ދައްކަންޖެހޭނެއެވެ. މީގެ އިތުރުން ސެކިއުރިޓީ ޑިޕޮސިޓްގެ ގޮތުގައި 1500 ރުފިޔާ ދައްކަންޖެހޭނެއެވެ. އެޗް.ޑީ.ސީން މި މާރުކޭޓް ހަދަނީ ހިޔާ ފްލެޓް ޓަވަރު 11 އަދި 12 ސަރަހައްދުން, ބެރެބެދިމާ ހިނގުން 2 ނަންބަރު ގޯޅީގައި ހިމެނޭ ބްލޮކެއްގައެވެ. މިއީ ހިޔާ ފްލެޓްގެ މަސައްކަތްތަކަށް މީގެކުރިން ބޭނުންކުރި ސައިޓެކެވެ.
