އެމްޕީއެލްއިން ހަ ގަޑިއިރުން ދިން ޚިދުމަތް 15 މިނެޓަށް
މިއީ ޑިޖިޓަލައިޒޭޝަން ކެމްޕެއިނެއް
އެމްޕީއެލްއިން "ޕޯޓް ޑިޖިޓަލްކޮށް" އިފްތިތާހުކުރުން
"ޕޯޓް ޑިޖިޓަލްކޮށް" ނަމުގައި ވަރަށް ޚާއްސަ ޑިޖިޓަލައިޒޭޝަން ކެމްޕެއިނެއް ލޯންޗުކޮށްފިއެވެ.
ބުދަ ދުވަހުގެ ރޭ ކްރޮސް ރޯޑްސްގައި ބޭއްވި ރަސްމިއްޔާތުގައި މި ކެމްޕެއިން އިފްތިތާހުކޮށްދެއްވީ މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހިމް ހަސަންއެވެ. މި ކެމްޕޭނަކީ އެމްޕީއެލްގެ މައި ބަނދަރުން ދޭ ހިދުމަތް ވީހާވެސް ފަސޭހަކޮށް މަސައްކަތުގައި ޝާމިލްވާ ފަރާތްތަކަށް ދީ، ވަގުތު ސަލާމަތްކުރުމަށް ފަށާފައިވާ ކެމްޕެއިންއެކެވެ.
މުދާ ކްލިއަރކުރަން، މުހިންމު މަރުހަލާތަކެއް އޮންނައިރު، އެކަންކުރުމުގައި ގިނަ ވަގުތު ހޭދަވާކަމާއި އެއް މުއައްސަސާއިން އަނެއް މުއައްސަސާއަށް ބޭނުންވާ ހުއްދަ ނުވަތަ ސޮއި ހޯދުމަށް ޚިދުމަތް ހޯދާ ފަރާތްތަކުން ދާން ޖެހުމަކީ އަބަދުވެސް ލިބޭ ޝަކުވާއެއް ކަމަށް އެމްޕީއެލްއިން ބުނެފައިވެއެވެ. އެހެންކަމުން ޚިދުމަތް ހޯދާ ފަރާތުން އުފުލަމުންދާ ތަކުލީފުތަކަށް ހައްލެއް ހޯދައިދިނުމަށްޓައި ގިނަ މަޝްވަރާތަކެއްކޮށް، ކުންފުނިން ދޭ ހިދުމަތްތައް ފަސޭހަކޮށް، އޮންލައިންކޮށް ދިނުމަށް އެ ކުންފުނީގެ ބޯޑުން ނިންމާފައިވާކަމަށް އެމްޕީއެލްއިން ބުނެފައިވެއެވެ.
އެމްޕީއެލްއިން ބުނީ މި ޚިދުމަތް ތައާރަފްކުރުމުގެ ކުރިން މުދާ ކްލިއަރ ކުރަން ގާތްގަނޑަކަށް 6 ގަޑިއިރު ހޭދަވާކަމަށެވެ. މި ގެނައި ބަދަލާއިއެކު އެ މަސައްކަތައްދާ ވަގުތު 15 މިނެޓަށް ވަނީ ކުޑަވެފައެވެ. މި ބަދަލުގެ ސަބަބުން، ކޮންމެ ތަނެއްގައި ހުރެމެ، އީ ގޭޓް ފާހަށް އެދެވޭނެކަމަސް އެމްޕީއެލްއިން ބުނެއެވެ.
އެމްޕީއެލްގެ އެންމެ ބޮޑު އަމަޒަކީ 2023 ވަނަ އަހަރާއި ހަމަޔަށް އެކުންފުންޏަކީ 99 އިންސައްތަ ކަރުދާހަށް ބަރޯސާނުވާ ކުންފުންޏަކަށް ހެދުމެވެ. މީގެއިތުރުން، ވޯލްޑް ބޭންކުން ނެރޭ "އީޒް އޮފް ޑުއިންގ ބިޒްނަސް" ގައުމުތަކުގެ ލިސްޓުގެ އެންމެ ރަނގަޅު 20 ގައުމު ތެރޭގައި ރާއްޖެ ހިމެނުމަށް ވަނީ އަމާޒުހިފާފައެވެ. އެކުންފުނިން ދެކޭ ގޮތުގައި ޑޮކިއުމެންޓޭޝަން މަރުހަލާ ޑިޖިޓަލް ކުރެވުމުން، މިހާރު ލިސްޓުގައި އޮތް 147 ވަނައިން އެންމެ ރަނގަޅު 20 ގައުމުތަކުގެ ތެރޭގައި ހިމެނިގެންދާނެ ކަމަށް އެމްޕީއެލްއިން ބުނެއެވެ.
މި ހަފްލާގައި އެމްޕީއެލްއިން ވަނީ، އެ ކުންފުނީގެ މައި ބަނދަރު ޕޯޓަލްއަށް ކަސްޓަމަރ ޕޯޓަލްގެ ނަމުގައި ޑޭޝްބޯޑެއް ތައާރަފްކޮށްފައެވެ. މިއީ އެ ކުންފުނީގެ ޚިދުމަތް ހޯދާ ކަސްޓަމަރުންނަށް ބޭނުންވާ ހުރިހާ މައުލޫމާތު އެއްތަނަކުން ގެނައުމަށް ތައާރަފްކުރި ޚާއްސަ "ކަސްޓަމަރ ޕޯޓަލް"އެކެވެ. މި ތަނުން، ބޯޓު އުޅަނދުފަހަރު އަންނާނެކަމަށް ލަފާކުރެވޭ ވަގުތުގެ މައުލޫމާތާއި، މިހާރު ޕޯޓުގައި ހުރި އުޅަނދު ފަހަރުތަކާއި، ކޮންޓެއިނަރު ޑިސްޗާޖު ޑީޓެއިލްއާއި، މަހުންމަހަށް ޕޯޓުގެ ސްޓެޓިސްޓިކްސްގެ މައުލޫމާތު ލިބެން ހުންނާނެއެވެ.
މީގެއިތުރުން، ކްލިއަރިންގ ޕްރޮސެސްއާއި ބެހޭ މައުލޫމާތާއި، ފްރީކުއެންޓް ކްލިއަރިންގ އެޖޭނޓުން، ޝިޕިންގް އެޖޭންޓުންނާއި ބެހޭ މައުލޫމާތާއި ޓެރިފްއާއި ބެހޭ މައުލޫމާތުގެ އިތުރަށް އެކުންފުނީގެ ޕޮލިސީތަކުގެ މައުލޫމާތު ލިބެން ހުންނާނެއެވެ. ޚިދުމަތް ހޯދާ ފަރާތްތަކަށް އެމްޕީއެލްގެ ކަމާއި ގުޅުންހުރި ހުރިހާ ބޭފުޅުންނަށް ގުޅޭނެ ނަމްބަރުވެސް އެއް ވިއުގައަކުން ލިބެން ހުންނާއެވެ. މި ޕޯޓަލްގެ ސަބަބުން، އަލަށް ރާއްޖެއަށް މުދާ ގެންނަން ބޭނުންވާ ފަރާތްތަކަށްވެސް ފަސޭހަކަމާއި އެކު އަމަލުކުރަންވީ ގޮތުގެ ހުރިހާ މައުލޫމާތެއް ލިބެން ހުންނާނެ ކަމަށް އެމްޕީއެލްއިން ބުނެފައިވެއެވެ.
