ސަރުކާރުގެ މި ދައުރު ނިމުމުގެ ކުރިން ކިރިޔާ ޖާގައެއް ލިބުނަސް އިންޑޯ ފުޓްސަލް ދަނޑެއް ގާއިމުކުރާނެކަމަށް ކުޅިވަރާއި ބެހޭ ވަޒީރު އަހްމަދު މަހްލޫފް ވިދާޅުވެއްޖެއެވެ.
ރާއްޖޭގައި އިންޑޯ ފުޓްސަލް ދަނޑެއް އަޅާނެ އިރަކާމެދު ރައްޔިތުންގެ މަޖިލީހުގައި މިއަދު ވަނީ މިނިސްޓަރު މަހްލޫފާއި މެމްބަރަކު ސުވާލުކުރައްވާފައެވެ. އެސުވާލަށް ޖަވާބު ދެއްވަމުން މިނިސްޓަރ ވިދާޅުވީ ހަގީގަތުގައި މިހާރު ރާއްޖޭގައި އެއްވެސް ފުޓްސަލް ދަނޑެއް ނެތް ކަމަށެވެ. އަދި މިހާރު ފުޓްސަލްގެ ގަވައިދަށް ކުޅެމުން އަންނަނީ މިނީ ފުޓްބޯޅަ ދަނޑުތަކެއްގައި ކަމަށެވެ. މިއީ ރާއްޖޭގެ ކުޅުންތެރިން ހިމެނޭ ގޮތަށް، ހުރިހާ ރައްޔިތުންނަށް އެނގުން މުހިންމު ކަމެއްގެ ގޮތުގައި މިނިސްޓަރު ފާހަގަކުރެއްވިއެވެ.
ފުޓްސަލްއޭ ކިޔާފަ އަޅުގަނޑުމެން ހަދައިގެން މިތިބީ މިނީ ފުޓްބޯޅަ ޕިޗުތަކެއް. އެތަނަށް އަރާ ފުޓްސަލްގެ ގަވައިދާ އެއްގޮތަށް މިކުޅެވެނީ އަސްލު އެހެން އެއްޗެއް.އަހުމަދު މަހްލޫފް | ކުޅިވަރާއި ބެހޭ ވަޒީރު
މިނިސްޓަރު ވިދާޅުވީ އަސްލު ފުޓްސަލް ކޯޓުގައި ކުޅުމުގެ ފުރުސަތު ލިބުނީ ގައުމީ ފުޓްސަލް ޓީމެއް އެކުލަވާލުމަށްފަހު ބޭރުގެ މުބާރާތްތައް ކުޅުމަށް ފޮނުވަން ފެށުމުން ކަމަށެވެ. ނަމަވެސް ގައުމީ ފުޓްސަލް ޓީމު ފަރިތަކުރާނެ އިންޑޯ ފުޓްސަލް ކޯޓެއް ނެތުމުން އެކަމުގެ ދަތިކަން ޓީމަށް ކުރިމަތިވެފައިވާ ކަމަށް ވިދާޅުވިއެވެ.
އެކަމަކު ޓީމުގެ ފަރިތަކުރުންތައް ކުރިޔަށް ނުގެންދެވިފައި ތިބެން ނުޖެހޭނެ ކަމަށާއި، ސަރުކާރުން އަޅާފައިވާ ދަނޑުތަކުގައި ފަރިތަކުރުންތައް ކުރިއަށް ގެންދެވޭނެ ކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ ކިރިޔާ ޖާގައެއް ލިބުނު ނަމަވެސް އިންޑޯ ފުޓްސަލް ދަނޑެއް ގާއިމުކޮށްދެއްވާނެ ކަމަށެވެ. އަދި މި ދައުރު ނިމުމުގެ ކުރިން ދަނޑު އެޅޭނެކަމުގެ ވަރަށް ބޮޑު ޔަގީންކަމެއް އެބައޮތް ކަމަށް މިނިސްޓަރު ވިދާޅުވިއެވެ.
