މުދާ ކްލިއަރ ކުރުމުގައި އެންމެ އިސްކަމެއްދެނީ ސަލާމަތާއި ރައްކާތެރިކަން ކަށަވަރު ކުރުމަށް: ޝާހިދު

މުދާ ކްލިއަރ ކުރުމުގައި އެންމެ އިސްކަމެއްދެނީ ސަލާމަތާއި ރައްކާތެރިކަން ކަށަވަރު ކުރުމަށް ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ސީއީއޯ ޝާހިދު އަލީ ވިދާޅުވެއްޖެއެވެ.

އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ޝާހިދު ވިދާޅުވީ ހުރިހާ އޮޕަރޭޝަނެއްގައި ސަލާމަތާއި ރައްކާތެރިކަމަކީ އެންމެ އިސްކަންދޭ މަސައްކަތް ކަމަށާއި، ޚާއްސަ އުސޫލެއްގެ ތެރެއިން މިހާރު މަސައްކަތްތައް ކުރިއަށްދާ ކަމަށެވެ. އަދި އެކަމަށް ޚާއްސަ އެސްއޯޕީތަކެއް އެކުލަވާލާފައިވާކަން ޝާހިދު ފާހަގަކުރެއްވިއެވެ.

މީގެ ކުރީގައި ހިތާމެރި ހާދިސާތައް ހިނގާފައިވާކަން ފާހަގަކުރައްވައި ޝާހިދު ވިދާޅުވީ އެފަދަ ހާދިސާއެއް ހިނގާދިޔަ ނުދިނުމަށް އެޅެންހުރި ހުރިހާ ފިޔަވަޅެއް އަޅާފައިވާ ކަމަށާއި، ޕޯޓްސްގެ ތެރެއަށް ވަންނަ ހުރިހާ މީހުންގެ ސަލާމަތާއި ރައްކާތެރިކަން ކަށަވަރުކުރާނެ ކަމަށެވެ. އަދި މުދާ ކްލިއަރ ކުރުމުގެ މަސައްކަތްތައް ކުރާއިރު، އެ މަސައްކަތް ކުރަނީ އުސޫލުގެ ތެރެއިންތޯ ކަށަވަރު ކުރުމުގެ ގޮތުން ކާގޯ އޮޕަރޭޝަންގައި ތަޖުރިބާ ހުރި ޓީމެއް އަބަދުވެސް ހަރަކާތްތެރިވަމުންދާ ކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ ސަލާމާތާއި ރައްކާތެރިކަމަށް އިސްކަން ދިނުމުގެ ގޮތުން އިތުރަށް މިމަސައްކަތް ފުޅާކުރަމުން ގެންދާ ކަމަށެވެ. އެގޮތުން ސަލާމާތާއި ރައްކާތެރިކަމަށް ހޭލުންތެރިކުރުވުމުގެ ގޮތުން ގިނަ ތަމްރީން ޕްރޮގްރާމްތައް ކުރިއަށް ގެންދާ ކަމަށް ޝާހިދު ވިދާޅުވިއެވެ.